1 Anani Owuso shokoyi daha ko pyo ominyo ni okela ikweyi nu ni. Ahan gbera shini ashishe ipu kala naka nye ko nyoza ni oshokoyi ni lo. 2 Koni aha pwo Oshu Neshi byoni awa pwo ni. Oshu ni apwo ni yoko ko ojije dawa lo, ikweyi koni ishini apwo ni akyogwu kpo otuse lo. 3 Aha ni kyogwu ni ba pyo ominyo ni Owuso shokoyi ni, byoni okamo,

<<Nkyanya kweyi ngwene mo:

<Aba gipu ko ominyo hin lo.>>>

Oka mani koni oko nu ke kweyi bwi ishini oyese ni. 4 Ikweyi koni ebye ipu ko okpa ko Owuso kela ikweyi ke eno ko omwahapa mo: <<Owuso minyo eno komwahapa koko noya ni kpiri.>> 5 Kwikyikye ni Owuso kela ipu kokpa mo, <<Aba gipu ko minyo hin lo.>>

6 Awase ni pwela koshu neshi mani ikyikyo ni gipu ko minyo mani lo, ikweyi koni agbo otuse lo ni. Mani oni, ase shini no Owuso shuwa bita shini ana gipu ko minyo kpanu. 7 Mani oni, Owuso ki she enoye, oyogwu mo Ikyeni. Okela ikweyi ke eno mani bwokwunu ko Odawuda byoni Okpa ko Owuso ka nekye-nekye ni mo:

<<Ikyeni, owoni ala pwoko nu, ala ka tela ko pwela nu lo.>> 8 Owoni Ojoshuwa bi dawo ominyo ni Owuso shokoyi ni, Owuso bi ki ya kela ikweyi ko ominyo mani enoye ke lo. 9 Mani oni omani ya shiyaha mo eno ko ominyo oye yaba dase ko Owuso byoni Owuso minyo eno ko omwahapa ni. 10 Kpiri kawase ni gipu ko ominyo ko Owuso, oya minyo kpoko nu byoni Owuso minyo kpo oko nu ni. 11 Mani oni ahan takirikwu shini ahan gipu ko ominyo oni, shini ashishe naka nyowe byoni awa ni nyowe bwebe ko gbotuse lo ni lo.

12 Ela ko Owuso gbo olayi kpo oshu ko oko. Ore sho okwunu ke ewakpa pepa. Ojije ya re byo ela ko Owuso lo, Oya shoza gipu ko otu kpo omaku, ogo okpokwu kpo omu ki ipunu; ela ni ya kepwo ikweyi koza ni ase ba gbo ipu kotu kpo oza ni aba yimu ni. 13 Ojije yaba ni oyayi teba do Owuso ni lo. Oya yojoji ya fu tese dase ni aba wa za arisawu danu ni.

14 Byoni aha gbo Osapa Nyakwu neshi ni kwobonu giso ni, owo Oyesu Oyi ko Owuso, ahan yabo byotuse kaha ni aba koshu nu ni kposhu. 15 Osapa Nyakwu wase ni ya tela ko miyinyinyi ka ishini oshu ka nye ni la lo, aha ke gbo oye ni amoma bwowe wonyonya, byoni amaha ma ni, anu ke yo ozalabi lo. 16 Ikpiye kaha na loshu shan go obutu ke ebe ke eshi ko Owuso shini ona miyinyinyi ka, shini ahan pye eshi ni wa taha abo ishini aha ba doka ni.