1 Omelkizedek mani wose ko Osalem ki wo osapa ko Owuso Ine ko Oshu Kpiri. Ishini Ibirayi kwikye bwe efu ni oga ngma awose ene ni, ogbayi kpo Omelkizedek kweyi osaboneshi, 2 kweyi Ibirayi danu eshi oye ipu ki igwo ko ojoji ni ogbo ni kpiri. Ase nu wo, <<Ose neshi>> ikweyi koni owose ko Osalem, ase nu kiye nu wo, <<Ose ko Omene.>> 3 Ashishe gyinanu kpa adanu lo, kwo okyikyi nu lo, ashishe gyo omoma nu kwi ikwu nu lo. Ole byo Oyi ko Owuso, owo osapa ko gbogbo-gbogbo.

4 Ala ma ni owase neshi ni: Ibirayi osokwu ka awosokwu ka danu eshi ipu ki igwo kiyo ni okpo ebe ke efu ni. 5 Kweyi kpiri kase ni bwipwoma ko Olawi ni wo osapa na zoye ipu ki igwo ebe kase wa ki Izrayila, koni awa bwipwoma ki Ibirayi ni. 6 Omelkizedek ni ke bwipwoma ko Olawi lo ni zoye ipu ki igwo bwabo ki Ibirayi kweyi oki saboneshi anu ni nyo okoyi ko Owuso ni. 7 Ogba awashu lo, ase ni sa ase aboneshi shase ni pyaboneshi ni. 8 Ikweyi kawo osapa aba dawo oye ipu ki igwo ipu kiyo kawase ni gekwu ni. Omelkizedek ke zoye ipu ki igwo ebe kase ni gbo olayi ni byoni okpa ko Owuso ka ni. 9 Mani oni, ase ba kamo, ishini Ibirayi zoye ipu ki igwo ni, Olawi ni ipwoma nu ba zoye ipu ki igwo ni, ze mama ni, 10 ikweyi koni ishini Omelkizedek gbayi kpi Ibirayi ni, amo Olawi wa lo, oke wokwokwoshi ishi oni otayoyo yi ikpiye ki Ibirayi ni wo okyikyi nu ni.

11 Koni ono ko Omusa kamo osapa shu ko bwipwoma ko Olawi ni, awosapa ba yashishe ya wase neshi lo. Oya shoshi shan gbo osapa byo Omelkizedek, ke wo ni ya bwipwoma ka Aruna ni lalo. 12 Owoni apyi ipwoma ko sho osapa, oya wotiri ko yono pya mama ni. 13 Anu ni aba kela ikweyi nu ni wa Adole ka, owose oye gogo, kweyi ashishe bwipwoma nu yoko ko osapa okpe lo. 14 Ananoho gye ma adole ka bwipwoma ko Oyahuda la, ose ni Omusa ko ojije ikweyi wa lo ishini oya kela ikweyi kawo osapa ni.

15 Kweyi aha kela mani nwa da ala owoni osapa oye gogo bose byo Omelkizedek, 16 Asha nu mani wo osapa bwebe ko ono kwe odu ki ipwoma nu lalo, ke bwebe koshu ko olayi ni gbo okweyi lo ni. 17 Okpa ko Owuso kela ikweyi nu mo:

<<Awo wo osapa ko gbogbo-gbogbo, bwogwu ko Omelkizedek.>>

18 Ayo ono nekye yi tagye ikweyi koni oloshu lo kweyi ogbo oko lo. 19 Ikweyi koni ono ko Omusa loshu ko yoza gyogye lo. Anani iyitagye neshi ni ya byaha gebe ko Owuso ni wa wa.

20 Gohobu Owuso abiyinu gwene. Ishini asho osapa ni. Ogwene mani ishini osha ashini ko osapa ni lo, 21 Oyesu ke wo osapa ishini Owuso gwene kweyi ka danu mo:

<<Adole kwobonu gwene

kweyi oya yo otu nu ya pya lo:

<Awo wo osapa ko gbogbo-gbogbo.>>> 22 Omani yo Oyesu woza ni yaha kyogwu otu oye kponu mokoyi ni shoshi she ni yaba.

23 Edo ka awosapa mani nwashika, ni ikwu wuwobi ko gohobu kpo oko wa ni. 24 Oyesu ke gbo olayi ko gbogbo-gbogbo, oko ko osapa nu aba yi dashe hoha lo. 25 Mani oni, oya gege ko ngmase anani kpi ishi kpiri, awase ni webe ko Owuso bwebe nu, ikweyi koni ogbo olayi ko gbogbo ko bo Owuso dawa.

26 Oyesu wo osapa nyakwu ni ya yoza ni aba doka ni. Owase sere; ogbepwo kwo ozalabi lo; ayo ko kpa awine ko ozalabi, Owuso zo gwisota. 27 Anu lema bya ashini ka awosapa lalo, owotiri danu ko peshi kurutu ikweyi ko ozalabi ki iyinu ikyikyo ome ozalabi kase ashini lalo. Opeshi oye kpokponu igboye kponu, ishini oziyinu peshi ni. 28 Ono ko Omusa sha ango ni nye ni ko wa awosapa nyakwu; okoyi ko Owuso ni oke gwene ikweyi nu ni, okoyi ni wa itikpi ko ono ni, sho Oyi nu ni gyogya ko gbogbo ni.