1 Owuso sho osapa nyakwu wonyonya bwipu kasuse la, kweyi asho shini na wiyi wa ebe ko Owuso, shini ona zeshi kweyi peshi do Owuso ikweyi ko ozalabi. 2 Byoni Osapa Nyakwu abiyinu nye owe lewewa ni, ogbotu mene kpase ni gbogyogye lo kweyi nyowe ni. 3 Oza ni ya ni oya peshi do Owuso ikweyi ko ozalabi kasuse kin lalo, ka kiyinu mama ni.

4 Mani oni ashishe gboshu ko shiyi nu wo Osapa Nyakwu lo, Owuso pini ya sho la, byoni osha Aruna ni. 5 Mamani, Okristi diyinu oshu ko wo Osapa Nyakwu lo. Owuso ke ka danu mo,

<<Awo wo Oyi hin;

ikyeni nwa Ada wo.>> 6 Kweyi oki ka ebye mo,

<<Oya wo Osapa ko ogbogbo-gbogbo,

Byoni Omelkizedek we ni.>>

7 Ishini Oyesu yese mani ni, otinarigwu kpo oko nwa kpi ize iyi do Owuso, shini ona ngma anu shi ikwu. Owuso pwo koni ozi ikweyi iso lo kweyi ogeyagye danu. 8 Koni Oyesu wo Oyi ko Owuso ni, ofu ko geyagye bwebe ko owe ni oma ni 9 Owuso yo gyogya, oki wotu ko olayi ko gbogbo-gbogbo da awase ni geyagye danu ni. 10 Owuso mo ona osapa nyakwu bwogwu ko Omelkizedek.

11 Aha gbo oza nwashika ko ka ikweyi kela mani, oke lono dami ko gwi ikweyi nu, koni ala ba gyoza papa lo ni. 12 Kwokwoshi ala shu ko wa awofoza byo nabani, kwikyikye ni ala ke ba doka kashe ko fala ela ko Owuso bwikyikyo. Ala shu ko roza loshu la, kwikikyeni ala ke tayoyo ba gwame! 13 Kpiri kase ni ya gwame, otayoyo wo oyi meme la, ogyo ojije ikweyi koza fofu ko neshi kwo labi lo. 14 Ozarore loshu ke wa ka anyakwase la, awa ni fu ko gyo neshi kpo obibi.