1 Okoyi kikyikyo gbo ono nwashika ikweyi ko ogeyagye kpe ebe ni akyanutu ko geyagye ese ni. 2 Agwa adaba, oda kese ni aba yogwu mo Ebe Sere ni. Ipu nu gbo oka ki ikwomu kpo oda ki ikyoga na peshi do Owuso ni yikweyi nu. 3 Itikpi ka ayiki kpitiri ko omwepa, gba adaba ni ayogwu mo Okpe ko Owuso. 4 Ipu nu gbo okpe ko ozinariya ni aba yola ki iwola ni kpo odudu ko okoyi ni aya kpo ozinariya, ipu nu gbi ikpete ko ozinariya kpo ozarore ni aba yogwu mo omana ni, kpo okposhi ka Aruna ni ya fe efu ni, kpi ikyikpo epa ni atono ikpiye wa ni. 5 Iso ko odudu ko okoyi mani gbo oyi epa ni gba akya hagye okwunu ko Owuso kweyi ya akya wa gwa kebe ni aba yepwo labi gbase ni. Anani ishi ke gye ko kyogwu koza kpiri wa lo.

6 Oweni aba yoza ni yoma. Awosapa ba bwole wa ba ga yoko wa kurutu okpe ko Owuso, 7 osapa nyakwu kin pini ke ya gipu ka adaba kipu la, kweyi oya gipu nu igboye ipu kishayi. Oya ga kpo oyi ni oya peshi do Owuso ikweyi kiyinu kpo ozalabi ni asuse ya kpo ogyegye wa lo ni. 8 Omaku ko Owuso faha oza mani neneshi mo, owe ko gole ko Owuso tayoyo gwa wa lo, ikweyi koni adaba ko Owuso kese tayayo hagye. 9 Omani woyi ni ya shiya ase kishi mani me eshi ni aba ze kweyi peshi kpo obize do Owuso ni ya yotu ka awino geyagye ya sha lo, 10 aba byotu ikweyi ko ozarore, kpi inyi, kpo noza gogo-gogo kawi imya. Kpiri wo ono kese la, ni ya gbeyi kishi ni Owuso ya kwono pepe ni.

11 Okristi ke wa wo osapa nyakwu kawoza neshi ni kwobonu yebe mani wa. Adaba ni oya yoko anu ni wo onyakwu kweyi shoshi she, owa adaba ni asuse ma ni lalo, adaba mani ke wa kese mani lo. 12 Ishini Okristi gipu ka adaba kweyi oganu igboye kpokponu, ogipu ko Okpe ko Owuso sere, obyo oyi ki ikpowu kwe ena ko peshi lo; oke yoko kpo oyi nu ko peshi ko daha shan gbo olayi kogbogbo-gbogbo. 13 Owoni oyi ki ikpowu kpe ena kpi iyawu koyi ke ena ni ayodu kpa anu ko myase ni gbinyi ni ikpiye, ya gege ko yuwa na, omani ki ya yi ikpiye wa shoshi. 14 Oya lemoji kpo oyi ko Okristi ni gbinyi lo! Oyi ko Okristi ya loshu kpo oshu ko Omaku ko Owuso, oziyinu do Owuso wo opopa ko kwokwoshi. Oyi nu yayo otu ka pya shozalabi shini ahan geyagye do Owuso ine ko olayi.

15 Ikweyi ko omani Okristi pini yo okoyi pepe mo, shini awase ni Owuso yuwogwu ni na pya aboneshi ko gbogbo-gbogbo, ni Owuso shuwo okoyi ni. Omani ya gbodagye ikweyi koni Okristi gekwu kweyi ikwu nu ngmase sho ozalabi wa ni aya ishini okoyi kikyikyo tayoyo ni.

16 Owoni ashe tiye kase ni ya rogwu nu ishini ogekwu, awase ni yi iwene kenena mani bagye mo ogekwu ome lalo ashishe ya da ase ni otiye nu ni ogwu nu lo, 17 okpa ko ogwu rore ni ota ni gbo oshu lo si ishini ase ni ta ni gekwu ome. Ishini otayoyo gbo olayi ashishe gboshu ko yoko kpa anu ko pyoza ni oshokoyi ni lo. 18 Oza ni ya ni okoyi kikyikyo shoshi ni wo so oyi shonu. 19 Ikyikyo, Omusa ka da ananoho oza ni yipu ko ono ni. Ozo oyi ka ayi ke ena kpa ki ikpowu kweyi oyi pwinyo, kweyi aye efu pwayi kpo omowu nowa yi lipu koyi kweyi myo okpa ko Ono kpa asuse. 20 Okamo, <<Omani woyi ko okoyi ni Owuso mala geyagye da nu ni.>> 21 Mamani Omusa ki myo oyi oni ikweyi ka adaba kpi iyo ni aba yoko kpanu ebe ko geyagye ni. 22 Ono mo ana yo ojoji na kpo oyi kweyi owoni oyi shonu lo aba yo ozalabi gbase lo.

23 Mani oni, awoza mani ni wo ogbogba kawoza kokwokwoshi ni biso ni, wa ko yi na mani. Awoza ni ke biso ni abiyiwa ba doka ko peshi ni she mani. 24 Koni Okristi gipu ke Ebe Sere ni asuse ma ni lalo, ni wo ogbogba ka ko kwokwoshi ni; ogiso abiyinu, ebeni anani oya bose obutu ko Owuso okwunu ka ni. 25 Osapa nyakwu ka Awoyahuda ya gipu ke Ebe Sere ipu ki ishayi kpo oyi ko obize. Okristi ke gipu ko yiyinu pa kya pa lo, 26 Obi lemani obi ya mowe nwashika bwishini ayese ni. Anani ke, ni oyi kpiri kishi ba wokweyi ni, obose igboye kpokponu, ko yozalabi bize bwebe ko yiyinu peshi. 27 Byoni aya asuse ko gekwu igboye kpokponu ni, itikpi koni we epwo koka ko Owuso. 28 Mamani ayo Okristi peshi igboye kpokponu shini ona yo ozalabi kase nwashika bize. Oki ya bose ko omwepa, ko zo ozalabi lalo, ke wa ko ngmawase ni ba gbeyi nu ni olayi.