1 Mani oni, ahan sho ozafofu kikyikyo ikweyi ko Okristi bita, shini ahan gohobu kpo oza ni ya yaha gye ni. Ahan ka kwikye goza fofu kikyikyo lo, akwobonu gye mo, oshoshi ko shagbotu shoko ki ikwu shini ahan kyogwu kpo Owuso; 2 kpo ozafofu ikweyi ko obatisma, kpo sabo eyi ko onyiso bwikwu, kpe epwo koka ko gbogbo-gbogbo. 3 Ahan gohobu oza ni aba ya ni yoma owoni Owuso kyogwu.

4 Awase ni kwikye itikpi sho otuse wa ni, aba yamoji ba kwikye awa kowa shagbotu sho ozalabi wa lo. Awase ni abyuwa webe yoyu ko Owuso, awa pini ba monye keshi ki iso, kweyi apya abola wa ipu ko Omaku ko Owuso; 5 agye mo ela ko Owuso shoshi kweyi aba rela ko oshu ni ya wa ni ishini Oyesu wese. 6 Kweyi owoni akwikye itikpi sho otuse wa! Oya lono dawa ko kwikye wa shagbotu, ikweyi koni aki yo Oyi ko Owuso yi poshi, kweyi agbowuru obutu kasuse.

7 Okpagye ni owuso ya yiwo sho kurutu, oya bwedo ki izire neshi gogo-gogo dawase ni sheho ni, kweyi aba pye eshi ko Owuso. 8 Okpagye ni ke ya bwigye kpi ikyashi, okpagye ni gbo oko lo, okpagye ni Owuso kwobonu yo kwunu wa. Okweyi nu aba yoyo ola.

9 Ayene hin, koni aha ke ka mani, aha gbi ikpiye loshu ikweyi kala. Agye mo ala gba aboneshi ni wa ko ngma ala ni. 10 Owuso shoshi kurutu. Oya nwanyi kpo oko ni ala ya ni lo, kwe imu ni ala shiya nu ni, bwebe kabo ni ala tawase ko Owuso nu ni kweyi ala gohobu ko otuwabo. 11 Ozani aba yimu ni yoma, shini ananoho kala na byotu nehe nu gigbo, shini oza ni ala ba gbo ko ya otu kala na wa kokwokwoshi. 12 Aba yimu shini ala wo okwashi lo, ala ke le bya awase ni kyogwu kpo otumene ni shini ala pye eshi ko oza ni Owuso shokoyi ni.

13 Ishini Owuso shi Ibirayi okoyi ni, ogwene ko yoza ni oshokoyi ni. Ikweyi koni ashishe sho ni oya gwene kpi iye nu ni lo, Owuso gwene kpi iye kiyi nu ishini oshokoyi ni. 14 Okamo, <<Kwokwoshi, nyya saboneshi kweyi nyya yi ipwoma wo ya nwashika.>> 15 Ishini Ibirayi zotu kweyi gbeyi ni, opyoza ni Owuso shokoyi ni.

16 Ase ba gwene kpase ni shuwa ni, kweyi ene ni ya yoza ni aka ni kweyi oya ya awashu ya kweyi. 17 Awase ni nyoza ni oshuwokoyi ni, Owuso yimu shini ona yo kya dawa mo oza ni ya ni ogwene ishini oshokoyi ni oma. 18 Mani oni, oza epa mani gbipya lo, Owuso ya kokame lo. Aha ni pyo olayi ipu nu ni, aha yi iyitagye ko pyoza ni Owuso shaha okoyi neshi kpo otugbagba loshu bwebe ki iyitagye ni odaha ni. 19 Iyitagye ka na byaha hagye loshu kpo olayi ka. Anu pini gitikpi ka ayiki kpitiri kole ko Owuso iso ohobu ko okpe la. 20 Abishi ka Oyesu kwobonu daha gipu kebe ni. Owo osapa nyakwu ko gbogbo-gbogbo, bwogwu ko Omelkizedek.