1 Mani oni owotiri shini ahan yabo byo kwokwoshi ni aha pwo ni piya, shini ana ka pyaha shoza ni apwo ni lo. 2 Ela ni ada awokyikyi ka bwebe ka ayoleho ni shaha mo owokwokwoshi, kweyi awase ni tela ko pwo kwe geyagye danu, aba gbuwogo agye gyogye kpoza ni aya ni. 3 Mani oni, aha ba ya moji ba bose, owoni aha tela ko ngmongma nyakwu mani? Adole abiyinu kwobonu ka daha ikweyi ko ngmongma mani, kweyi awase ni pwela mani bwikyikyo ni ka daha mo omani wo kwokwoshi la. 4 Ipu kishi oye kponu Owuso ki yo olobene nu manu bwebe koyi, kpa awoza ki igbashi gogo-gogo, kpeshi ko Omaku ko Owuso ni oko bwebe ko okyokye kotu nu ni.

5 Ese pepe ni ya wa ni ayoleho pini Owuso shuwa ko kpogwu lalo. Okristi pini yawa kpogwu kese ni aha ba kela ikweyi nu ni la. 6 Ebye yaba ipu kokpa ni ashe ke yo olobene mo:

<<Owuso, asuse woji ni oya byotu ikweyi wa;

asuse kpokpo pini oya byotu ikweyi wa yona?

7 Ipu kishi gbayayi oya ayoleho shuwa;

oluwoza keyi ki igyashi kpa abokpa,

8 kweyi oyuwa woteyi kojoji kpiri.>>

Okpa kamo, Owuso yasuse woteyi kojoji kpiri; oni sayi mo, ojoji ayi danu abo. Kwikyikyeni ke aha ma asuse gboshu ikweyi koza ni ayi danu abo ni lo. 9 Aha ke mo Oyesu ni ipu kishi gbayayi aya ayoleho sho ni, shini bwebe keshi ko Owuso ona gekwu dase kpiri, anani alo ozakeyi ki igyashi kpa abokpa ikweyi kikwu nu.

10 Ogyogye ni Owuso ni yojoji kweyi yuwa shagye ni na yo Oyesu na gya bwebe ko mowe, shini ona ya ayi nu nwashika na gbingbo ipu ki igyashi nu. Koni Oyesu pini wotu ko ngmongma wa la.

11 Kase ni yozalabi kase na ni, kawase ni oyuwo ozalabi na ni, Ada wa woye kponu. Oza ni ya ni Oyesu ya yiweyi ko yuwo ogwu ma ayinanu lo ni oma. 12 Oka do Owuso mo,

<<Nyya ka da ayene hin oza ni oya ni,

ipu ko gbayi wa nyya shawiye.>>

13 Kweyi oki kamo,

<<Ami ya yotu hin ya so Owuso.>> Kweyi oki kamo,

<<Nyyoma kpayi no Owuso dami ni.>>

14 Ayi, byoni Oyesu yuwogwu ni, wasuse ni gbebe kpo oyi ni, Oyesu abiyinu wa le byawa kweyi gbi kikpiye kasuse dudu kpawa. Oya mani shini bwebe kikwu nu, ona yo oshu ki Ibiri ni gboshu ikweyi kikwu ni yi kyigbo, 15 kweyi bwebe koni ona ngmawase ni woshe ipu koyagye wa kpiri bwebe ko yoshi kikwu ni. 16 Kokwokwoshi ayoleho pini oya tuwabo lalo, ayi ki ipwoma ki Ibirayi la. 17 Ikweyi ko omani, oshu ko le bya ayinanu owe wonyonya, shini ona wo Osapa Nyakwu ni gbo okwokwoshi kpi iyinyinyi ipu koko nu do Owuso, shini ona yo ozalabi kasuse gbuwa. 18 Koni anu abiyinu mowe ishini amoma ni, ogye ko tawase ni aba muwama ni abo.