Sinais do fim dos tempos

14 Ila kug’hali kuduma hakunafika, Mbuli Inojile ya Undewa wa Nguluwi yodamligwa kota ulolezi kwa isi zeng’ha.

Kuya kwa Mwana wa munhu

29 "Hala hokumala kugaya ako, isanya lowichigwa jiza na nyelezi haibunguzuka. Nhondwe zolagala kulawa kilanga na mong’ho ubatilile vinhu avyo vyeng’ha wotigaswa. 30 Hamba, ulajilo wa Mwana wa munhu wokoneka kilanga, na aho nhanzi zeng’ha muisi zodama, womona Mwana wa munhu yokuya ha ng’hungugu ya kilanga yawele na ludali na ukulu lwinji. 31 Naye kowalajiza wahilisi wa kilanga wa heye wawele na mhalamhanda ilinguyowa ng’hatu, nawo wowakungajiza wahaguligwe wa heye kuli nzingo zeng’ha zine za isi, kulawila kuduma kumwe kwa kilaga mbaka kuduma kuyage.

42 "Lelo mikale meho, kwa vila hamvizelele zuwa hoyokuya Mkulu wa hemwe. 43 Mvizele hino, wone yawele na ng’handa nayavizele mhizi hoyokuya yahawele meho, nahalileka ng’handa ya heye ibenigwe. 44 Leka ahyo, mwime goya, kwa vila Mwana wa munhu kokuya saa yohamuizelele."

20 Muwalanguse kibatilila malajizo geng’ha gondiwapele. Na heni nda hamwe na hemwe mazuwa geng’ha, mbaka kuduma kwa isi."

Kuduhu ne yumwe yovizela zuwa ne saa

32 "Ila, kwa mbuli ya zuwa ama saa kuduhu ne yumwe yavizelele kokuya nili ne wahilisi wa kilanga ne Mwana, ila Mhaza yaliyeng’ha ndo yavizelele.

Mazuwa ga kuduma

1 Ukumbuchile kota, kuli mazuwa ga kuduma kowa na mhela wa magazo. 2 Wanhu wowa wochigana wawo hela, wawele na maya ga sendi na wawele ngidaya na wawele ngiwona watanganika na walingumliga Nguluwi na wawele hambe wawahulichize wahaza wa hewo na wohambe walonje malumbo na wehile, 3 wolawila wanhu walihela igano mnhumbula na walihela isungu na wasonjelezi na wawele na maya na walingung’hanuka, wozudizwa na choneche chiwele chinojile, 4 wowa wowahinduka wayawo na wajuvi na wamemile ibamba na wogana kiheweza ng’hatu ne kumgana Nguluwi. 5 Kwa kuwalola wokoneka kota wanhu walingumfugamila Nguluwi, ila wolema mong’ho wake. Wiyuse ng’hatu na wanhu awo.

17 " ‘Kuli mazuwa gala ga kuduma, Mkulu Nguluwi kanguwikula,

Ndowapa muhe wa heni wanhu weng’ha.

Wana wa hemwe wadala na walume wolavya uloli,

wasekulu wa hemwe wolota kahi,

na wasongolo wa hemwe wowona ulotezi.

18 Mbaka vitumagwa wa heni walume na wadala,

ndowapa Muhe wa heni kuli mazuwa gala,

nawo wolavya uloli.

19 Ndolavya ulajilo kilanga na kuli isi,

na ulajilo hasi kuli isi,

kowa na danda na chiluli na iyosi,

20 isanya lyowichigwa jiza,

na nyelezi yowa ndung’hu kota danda,

kung’hali kuya kwa zuwa lya Mkulu Nguluwi,

zuwa liwele ndo linojile ng’hatu. 21 Ahyo wanhu weng’ha howolanda kwa itagwa lya Mkulu Nguluwi woloholigwa.’

Mkulu Nguluwi kanguwapa wanhu muhe wa heye

28 "Hamba ndowapa muhe wa heni wanhu weng’ha.

Wana wa hemwe wadala na walume wolavya uloli,

wasekulu wa hemwe wolota kahi,

na wasongolo wa hemwe wowona ulotezi.

29 Mbaka vitumagwa walume na wadala,

ndowapa muhe wa heni mhela awo.

15 Ali lotulinguwalonjela ndo ulonzi wa Mkulu, hetwe tulingikala sambi, lotowa tusigale wakomu mhela Mkulu hoyokuya, ndangukomya hatuwalongola wala wawele wabagame. 16 Kwa vila lolavigwa ilajizo, lizi lya mhilisi mkulu na lizi lya mhalamhanda ya Nguluwi, naye Mkulu kodulika hasi kulawa kilanga. Ndo wala wabagame walingumkunda Kilistu wozilipuligwa tandi. 17 Hamba hetwe tuwele wakomu, tusigale, mhela awo tokungajizwa hamwe na hewo kuli ng’hungugu leka kumting’aniza Mkulu kuli ng’hungugu. Ahyo towa hamwe ng’hatu na Mkulu. 18 Lelo migane na mikangaze nhumbula kwa ulonzi awu.

6 Lelo tuleche kuwasa kota wanji, twanguganigwa kikala meho na kuwa na chasi. 7 Walinguwasa, wanguwasa nechilo na walingugala, wangugala nechilo. 8 Ila hetwe twa wanhu wa nemisi na twanguganigwa tilongoze twetwe baha kwa kuwa na chasi. Twanguganigwa kuvala makundo na igano kota nguwo ya kigubika mmambaga na kitumbila kwa hetwe kwa ulohozi kota kofiya ya chuma. 9 Kwa vila Nguluwi hatuhagule leka tusumigwe na kuzudila kwa heye, ila tupegwe ulohozi kukolela Mkulu wa hetwe Yesu Kilistu,

Yanguganigwa kuwa meho

34 "Muwe meho leka nhumbula za hemwe zileche kutunyigwa na mbuli nyinji za kuli ukomu awu, one haiwele ahyo zuwa alyo lyokuya kwa hemwe baho du. 35 Kwa vila lyokuya kota idiwa kwa weng’ha walingikala muisi yeng’ha. 36 Muwe meho mazuwa gose na mlande leka muweze kuloholigwa na gala geng’ha hogolawila na kwima hali Mwana wa munhu."

8 Ila, wang’holozangu, mleche kusemwa chinhu chimwe! Kwa Mkulu zuwa imwe ya kota miyaka elufu, kwa heye ndo kota zuwa imwe. 9 Mkulu halingukawa kweneza gala goyalagane kota wanhu wanji vyowalingijesa kota kokawila. Ila heye kangwimilila kwa chiwalo cha hemwe, mina, halingugana ne yumwe wa hemwe yajilile, ila kanguwakwega weng’ha wamgalamchile Nguluwi.

10 Zuwa lya Mkulu lyokuya kota mhizi. Zuwa alyo, ulanga wokuka kwa lizi ng’hulu, vinhu vya heye vya kilanga vyolakazwa kwa chiluli havikoneka kahi, nayo isi yokuka hamwe na chila chinhu chiwele mgati mwake. 11 Lelo kwa vila chila chinhu chowifigwa kota ahyo, ndaze, hemwe mwanguganigwa kuwa wanhu wa nhanzi yachi? Mwanguganigwa kikala mwelile na kumnojeza Nguluwi, 12 homuibeteza zuwa lila lya Nguluwi na kuidita yuye himahima zuwa iwele kilanga kulakazwa kwa chiluli na kuwifigwa na vinhu vyake vya kilanga vyosungumuligwa kwa ivuche. 13 Ila hetwe, twangikala kwa kulola kula kulagana kwa heye, twangubeteza kilanga kunyale na isi inyale, iwele imemile kutanganika.

51 Mhulichize, ndanguwalonjela mbuli ivisigwe, hetwe hatubagama tweng’ha, ila tweng’ha togalamligwa. 52 Yowa sekunde imwe hela, togalamligwa baho du. Ali lyolawila hala mhalamhanda ya kuduma hoipembigwa. Holihulikwa lizi lya mhalamanda wala wawele nawabagama wozilipuligwa leka wekale mazuwa gose, aho ndo togalamulwa weng’ha.

Ulanga unyale na isi inyale

17 "Lelo, ndolumba ulanga unyale na isi inyale,

mbuli za katali hazikumbuchilwa kahi.

18 Msangalale, mlutilile kusangalala mazuwa gose,

kwa chiwalo cha vinhu viwele ndovilumba.

Muji wa Yelusalemu ndoudita uwe wa kunojeza,

na wanhu wake wosangalala.

19 Nani ndosangalala kwa chiwalo cha muji wa Yelusalemu,

na kwa chiwalo cha wanhu wa heni.

Lizi lya chililo haluhulikwa kahi,

kulombocheza na magazo havyowa amo.

Zuwa lya Mkulu Nguluwi lyanguya

1 Mkulu Nguluwi Yawele na Mong’ho kangulonga, "Ndikomya zuwa lyanguya. Nalyo lyangwaka kota itanulu. Walingidaya na wehile weng’ha wotozigwa amo na kulakazwa kota mibeleje jikalile, wolakazwa ng’hatu mbaka hawe haduhu ne ulajilo. 2 Ila kwa chiwalo cha hemwe mlingundumba, isanya lya hachi lyokuya kwa hemwe, liwele na ludali lwa kulohola kuli ivuche lyake. Namwe molawa mgati kuno mnyonzokanyonzoka kota ilogota lilechelwe kulawa kuli ibani.

Ulanga unyale na isi inyale

1 Hamba, nambona ulanga unyale na isi inyale. Ulanga ula wa mwaluko na isi ila ya mwaluko navyali vipulute, nayo bahali nayali haduhuli kahi. 2 Ndiwona muji welile, Yelusalemu inyale, udulika kulawa kwa Nguluwi kilanga. Nawali uwichigwe goya kota mdala yahesigwe yenolije kiting’hana na mlume wa heye. 3 Hamba nanyulika lizi likulu kulawa kuli chigoda cha undewa ilonga, "Ulole! Hakaye ha Nguluwi ndo hamwe na wanhu. Kochikala hamwe na hewo, nawo wowa wanhu wa heye, naye kowa Nguluwi wa hewo. 4 Heye kobagusa mahozi ga hewo geng’ha, mina kubagama kowa kuduhuli ng’hatu na ne usungu na ne chililo na ne kutama, kwa vila vinhu vya mwaluko vipuluta!"