Sinais do fim dos tempos

14 Hegwangram samliakeyi aide kideu pelane dage pau zie, heleuh pelane dage zierang tei eh. Pecai penlibe gwang zie.

29 Dede keherei ciciu kedicai zette tingnaimiak mui dizie, nah hekei baabeu ta dizie, nah heghidung tinggim gade cakmie zie, nah tinggim kengkieng de teu kelai dizie. 30 Pecai Mina Nabe rehi tinggim gade ngau dizie, nah pecai kideu ga heleuh leune hap dizie. Penui Mina Nabe kengkieng nah kendu kedige teu delwe hemwa reu gade kegwang ngauzie. 31 Khrista pe tinggimgwamedung de langgai eh telui kwa sahbak gaizie, nah penui kedetkelume de tinggim kungdung mdai lebie de hekwa luzie, tinggim penli ket lamde keda lambie kecang.

42 Ciziemne nnui mriak bam lulo, kedanemene nnui Rampaube daipau nai gwang zie bi nnui ci melu. 43 Dede aide cilu, ki mpaube keregabe daipau tingdau gwang zie bi kecu ci liecai, pa kwabam zie nah peu pe ki mide raklüt lak. 44 Ciziemne, nnui de mtei lwe bamlu maisia, kedanemene Mina Nabe nnui cet mene kebam bamdakkak ga gwang zielu.

20 Nah Ih nnui dage rang kebeudung leune mzai lulo ledeu beu lulo. Ainie, Ih au nnuida lamui zie, tingkideu kegah benai kecang de."

Tingba nah bamdakkak cima

32 Dede cipau tingba de nah pe bamdakkakbe au migede cima, tinggim ga tinggimgwame de, mede Nabe liede, dede Peibe rünne ci.

Kekamle Tinggwang miehing tadi zie

1 Peting kekamle bie keherei kecu ting gwang kera ci lulo. 2 Kedanemene mina pekatei pe ziu ci, rangkang hengin, hegie, helia, mide rangkemsia, mipui mipei samzai tei kemak, leirau kegah, mci kemak, 3 mide ku kemak, kezuyi kegah, sam kesia kerang, mide ketip kemak, zaisiet, keyi ngau ngkau, 4 mide cwa, pe suira ketei, ngang, nah penui Tinggwang de swade penui hengindung de hungki dizie, 5 penui hegwazu gade renet mzui zie, dede pe kengkieng de mlai dizie. Mina ci kenzwame dade nreutet dilu.

17 ‘Peting kekam lebie ainzwa dizie,’ Tinggwang rangla,

‘Mina leune dage Ih a Rabe ruigai zie.

Nnui napeime nah nnui napuime caihakecisam rang zie,

nah nnui rehangme marengeidung ngau zie,

nah nnui kecingpeidung hemangdung mmi zie.

18 Cipau tingdau a kilame, mipei nah mipui dage

Ih a Rabe ruigai beuzie, nah penui caihakecisam rang zie.

19 Ih nreule tingkam gade miswakegahdung* teilia zie

nah ngkangle kideu gade marehidung teilia zie,

hejai nah mi nah mika cuidung.

20 Tingnaimiak mui dizie

nah hekei hejai nzwa dizie,

Rampaube tingba kedi nah kendu de kegwang dwa.

21 Iciu eh keheibede Rampaube zi qu kegaime de kelilu zie.’*

Rampaube Tingba

28 Aipaucai ainzwa gwang zie,

Ih mina pumteih leune ga a Rabe rui gai zie,

nah nnui napeidung nah nnui napuidung caiha rangzie.

Nnui mina hangkiame hemang mmi zie,

nnui rehangme ma rengei ngau zie.*

29 Kilamepei nah kilamepei dung da dede,

cipau tingdau Ih a Rabe rui gai zie.

Peting Penli

1 "Cipau ting dau Michael, hegwangnapei kedibe n mina mapie kelabe, cuh luzie. Cidau keherei kecu ting ge zie, heleuhbe lungh cuhkelu gade aipauting de kecang madaude ciciula kemak ge zie. Cipau tingdau n minadungde, laisiukwak* ga pe zi rau pwabam eh ngaukelu leune de kelilu zie. 2 Kideube rebui ga zip kedime ringcuh zie, kangge kelungta kering ga nah kangge hengam ga nah kelungta keherei zie. 3 Kemteumedung tinggim kebaa nzwa baa zie, nah kekieege lungh tei nreupwa makesang gage kai kelume, cipaume au kelungta nah kelungta hegidung nzwa zie.✝

15 Kedanemene anui Rampaube sam gade aide nnui dage rangla, cide anui ring kebamme, Rampaube gwangdai kera ga bang kebamme, zip kedimedung dwarai eh tetlak. 16 Rampaube tinggim gade nghung zie. Pa ma sahbak gai eh gwang zie, tinggimgwame kedibe aja kai gaizie, nah Tinggwang teluibe kwagai zie, nah Khrista da la eh tsaikedime ringcuh raizie. 17 Pecai anui ring kebamme, bang kelume, penuide ngngwa nghang hemwa gade keu ncütlwe tingkai gade Rampaube de redau zie. Iciu eh anui Rampaube de ngngwa lamui dizie. 18 Ciziemne, sam aidungde teu eh hange ge lung taumla lulo.

6 Cine, anui kedame nzwa zip kerabe ma. Meliene, anui mrak nah mcing bam lugo. 7 Zip kelame, tingmui zip la, nah sakmie kelame, tingmui mie bamla. 8 Dede anui au tingkebaa gu kecu ziemne, anui mcing bam eh kenlum nah keku hekarakcum de kailu maisia nah kelikelu keregui dele anui peurwa teilwe bam maisia.✝ 9 Kedanemene Tinggwang anuide lunghop ziemne kedet luma, dede anui Rampaube Jisu Khrista gade kelikelu ngaulu kerane.

34 Dede nlien nah sakmie kecu nah cudau teilung nangdung tei eh nnuilung naangbam melu kerane nah cipau tingba de zette gwang nnuide hekit teu di melu kerane nnuide mriak eh kwabam lulo, 35 kedanemene cide kideureu ga kelung leune pelane da hetak nzwa gwang zielu. 36 Dede peting pelane mriak nah kekie tei eh bamlu, iciude nnui ngkieng eh ma aidung peciakne teigwang kera gade mbailu kerane, nah Mina Nabe dwa saplu kerane."*

8 Dede mage nsungta diso, akumedung, Rampaube dwade au tingnaige de mmi cangge nzwa, nah mmi cangge de tingnaige nzwalie.✝ 9 Midungge cet kela nzwa eh Rampaube au pe sampetdung teibeu kera nneu lama. Meliene, peu nnui migede de kapdi neu mene nnui dade pe lungtie bamla. Dede pelane de penui mau gade nreudi neula.✝ 10 Iciuliede, Rampaube cailikegwang tingba keregame ge nzwa gwangzie, iciu eh makwa ge sahbak eh tinggim gah dizie. Dede Tinggim pumgimdung mi ne ru dizie, nah kideube nah pe reuga heta leune de liagai dizie.* 11 Aiciu eh ma aidung pelane ngkap dizie nnui mina daikenzwadung ge lu maisia no? Nnui zai mci nah masang lu, 12 Tinggwang cailigwang kera tingba de regui nah kelwa eh kwa bamlu, cide ziemne tinggimdung mi ne ngkap dizie nah tinggim pumgimdung kelum ne teisui dizie.✝ 13 Dede anui pe sampet kai kebeude nzwa eh, anui makesang lungh kera tinggimdung keheci, nah kideu keheci ge kwa bam.✝

51 Ainie! Ih nnui dage macetkecok ge ranggai la: anui pelane zip dilak, dede anui pelane tsam dizie, 52 kaknage gage, miakhip kegai gage, telui kamtube kwa kegai gage. Kedanemene telui kwa gaizie, nah ketsaime tsaidaidi kelakme tei eh ringcuh luzie, nah anui tsam dizie.

17 Kedanemene pielo, Ih tinggimdung keheci nah kideu keheci ge teigai lai eh bam;

nah teigwang kedidung de de nsung dailak mede milung ga gwang dailak.*

18 Dede Ih dam gai lai eh kebam gade nnui renga zie nah kelungta nnui sui yizie. Pielo, Ih dam gai lai eh kebam Jerusalem de suiyi ge zie, nah pe minadung suiyi ge zie.

19 Ih Jerusalem reu renga zie nah a minadung ziemne a sui yizie;

cika keherei ziemne hei eh hap kecu peda siu si lakta.*

Rampaube Tingba

1 Cine pielo, pe tingba gwangla dida,* miheu nzwa heubam dizie, ngang kelame nah kesiata tei kelame leune makwarie dizie. Peting gwang kela de penuide ru dizie," de eh reugwame reu RAMPAUBE rang, "ciciu de penui da pemaah mede pekiak bam silak.✝ 2 Dede nnui a zi de hingla kelame, kesamsang tingnaimiak cuh eh pe hesiudung gade teingkei beuzie. Nnui tetpet zie, nah nnui hetumna peki gade hiak mpet kegai nzwa nding tetzie.

Jerusalem kehecibe

1 Pecai Ih tinggim keheci ge nah kideu keheci ge ngau. Tinggim keraide nah kideu keraide gahdi, nah jaaidi bam si tadi.✝ 2 Nah Ih namdi kemci, Jerusalem keheci de, tinggim ga Tinggwang dade lakciube pui pe nahpei ziemne mtei teu eh kela nzwa hungla eh ngau. 3 Cidau Ih hegwangbam gade makwa ge sahbak eh rang kecu siu, "Ainie! Tinggwang paiki mina de ngngwa lungh dida, nah pa penuide ngngwa lungh zie. Penui pe minadung tei dizie, nah Tinggwang penuide ngngwa bamzie.* 4 Pa ne penui miak gade penui miakdui leune neu gi dizie nah cika ketsai, lungrei mede kehap mede keteei bam si lak. Cidungde bam si lakta kedanemene ma keraibedung gah dida.✝