1 Pecai minabe acu tingpeule kerecaki kigu gwale gage lang mpet gai, nah pa kigu hegwale dwa ga kibungdung nah tingpeule kebam hegwale tangdeu ga acu ngngwa gai. 2 Cipau kibungdung de pe dwa ga cubit hai nah pedi cubit riakngei. 3 Kibungdung kesa kigu helungle mcwa bam nah kemci ni gade cubit ngkai* dei gega bam. Kibungdung pe set kecum ge bam, nreu lebie kebam kibungdung de nkang ga kebam kibungdung de pie ngkei ngau, nah cika tet kera lampuiki ngkei pwa bam. Kibungdung kesa hegwale kigu de mcwa bam. 4 Kibungdung kakga lampui ge kebam cide pedi cubit kerei nah petie hai. Tingpeule ge kibung kikamdung bam. 5 Dede kibung nreule kebamdung de heni nrumki, kedanemene cika nggwa kera lampui sumbe ga nah nkangbe setdung ga swa heni keu kiee lugu. 6 Set pekecumbe de ga kibung tsiadung gah, kigu ga petsiadung kebam de nzwa ma. Cine nreutu ga kebam kibungdung de nkangtu nah sumbe set ga kebam kibungdung swa nrumki. 7 Hegwale tangdeudung de kibungdung nah kibungdung dwa ga hegwale kigu kakga kwacu pwa bam. Tangdeu cide petie cubit riakngei. 8 Kigu hegwale kebam kibungdung au pe tie cubit riakngei, nah kibungdung kerecaki de mcwa kebambedung au petie cubit hai ge. 9 Nkangtube kibungdung gu naimiak kepetle, kigu hegwale de kepet kimuiki ge bam.

10 Hegwale kigu naimiak kepetle lam tangdeu taiga, nah helungle kebam kemci ni dwa gade, kibungdung ge bam 11 nah cipau dwaga nggwa kera lampui ge de bam. Kibungdung cide pe rehi tingpeule kebam kibungdung nzwa da. Petie pedi nah kempet lampui nah kikamdung de nzwakap. 12 Tingpile kebam kikamdung tingpeule kebam kikamdung nzwakap. Pelungle bie kenlüt lampuiki ga kikam ge bam, nah lampui cide gade kibungdung ketsamtsam ga nlütlu bui. Naimiak kepetle lam lampuiki tu ge lam ga kikam ge bam.

13 Pecai minabe acu ranggai, "Tingtünle nah tingbangle kibungdung hegwale kigu dwaga kebamdung au kemci kibungdung cika cingkumedung RAMPAUBE tai ga gwang mnatu eh heta tei kebamme mcitube taktyei tyeilu bui. Penui cika reca mcitubedung kai zie, taktyei ratak, kemau ratak, nah mnung kemak ratak, kedanemene aide kemci ni gelu. 14 Cingkumedung cika nlüt kecudau, penui kemci ni gade, penui paini teu delwe heta tei kecube lwak mpetdi mene kigu hegwale pet kerabe ma, kedanemene cide mci lu. Cine penui mina kakga mie kemakne penui penui paini keda teu kerabe."

15 Minabe helungle ki de mdet canglu nah pa acu naimiak kepetle lam mcwa kebam herieki ge ga ngngwa mpet nah cika twagwa kebam henidung de mdet. 16 Kemdet tie pwa delwe pa naimiak kepetle lam mdet, kemdet tie le cide mdet kelu cubit hai mengei.* 17 Pa tingpeule lam mdet, kemdet tie le cide mdet kelu cubit hai mengei. 18 Pa tingpile lam de mdet, kemdet tie le cide mdet kelu cubit hai mengei. 19 Pa nreu gwang naimiak kenlütle lam de mdet gai, kemdet tie le cide mdet kelu cubit hai mengei. 20 Pa tu mdai gade mdet. Cide tangdeu petie cubit hai mengei, nah pedi cubit hai mengei kecu gele twagwa pung bam, tangdeu cide mcikemak be gade kemci be kaitsam pwa bam.