1 "Cu nang, mina nabo, Israel lamlwatudung dage caihasam ranglo nah aide ranglu, ‘Israel lamlwatudung, RAMPAUBE sam kingnei lulo. 2 RAMPAUBE Tinggwang aide rangla: Ngauraume n ha ranggai, "Aha!" nah "Ndaa kehu henidung de anui gu dida."’ 3 Ciziemne caihasam rang eh rangbeulu, ‘RAMPAUBE Tinggwang aide rangla: Nang kap kedi de ziemne nah tu leune gade ncu gwang gwaketang kecu ziemne, nnui au heleuh kedadung kangga la dida; nnuide au kesiabe rang kela muileudung nah mleudung ne kii, nah nnui ha mina rangla dida. 4 Ciziemne, Israel lamlwatuhdung, RAMPAUBE Tinggwang sam kingneilu: RAMPAUBE Tinggwang aide lamlwatuhdung nah kecehu kideutuhdung dage, reuceunadung nah chabakdung dage, mina lungh kemak kemrwa deudung nah ngkap di eh gikedi namdidung nah penuide twagwapung kebam leuhdung ne penuide tei ngkap nah teu henui tei kedi leuhdung dage ranggai, 5 ciziemne RAMPAUBE Tinggwang aide rangla: Ih heleuh kedadung dage a rata kelum le ranggai dida, Edom dage nah caugamme a deu de luu pwa pekatei pe mabam teicume dage, keheibe de penui mlung ga suiyi de nah penui rabe ga mide ngau ngkaula kecume dage de ranggai dida, kedanemene penui a deu luulu eh cika cehei keyi deu de penui gu teilu kerane gumpwa di.’ 6 Ciziemne, Israel deu dage caihasam ranglu nah lamlwatudung nah kecehu kideutudung dage ranglu, reuceunadung nah chabakdung dage ranglu, ‘RAMPAUBE Tinggwang aide rangla: Ainie! A lunghop nah a rata gade Ih aide rang ndu gaila kedanemene nnui heleuhdung ne nnuide rang kemsia de lialu kecune. 7 Ciziemne, RAMPAUBE Tinggwang aide rangla: Ih akatei a ba hwapwa eh reset gai zie iciu eh nnuide twagwapung kebam heleuhdung penui katei penui hengam pung luzie.

8 Dede nang, Israel lamlwatuhdung, a Israel minadung ziemne pekiakdung nah petsi bui luzie, kedanemene penui au nnui da cailigwang zette zielu. 9 Kedanemene ainie, Ih au nnuide a lung nei bam, nah Ih nnuide ngaunggia beu la; nnuide puu luzie nah heleuh ling zie. 10 Cine Ih nnui mina tei ngkiee beuzie, Israelme leune de de. Namdidung ga mina lungh dizie nah ngkap kedidung retak dai luzie. 11 Ih peu minadung de nah makaune de nnui lamlwatuhdung ga tei ngkiee beu zie iciu eh penui lungh hinglu nah petsi builu kerane. Pecai nnuide ndaa nzwa peu lungh dai luzie, nah Ih nnuide peu ndaa swade lungh yiki luzie, iciu eh nnui Ih RAMPAUBE lie kecu ci luzie. 12 Ih mina de ngngwa gwang zie, Israel a minadung de, n reuga tet kerane. Penui ncu luu luzie, nah nang penui mapwa zie, nah nang peu penui namedung de peu tsai dai silak. 13 RAMPAUBE Tinggwang aide rangla: Kedanemene penui n dage aide rangla, "Nang mina de tyei la, n leuh ga hename de tei ngkap lala," 14 ciziemne nang minadung de tuityei si lakta, nah nang n leuhme de penui tsitdung ziemne peu heei eh hap lakta. Aide RAMPAUBE Tinggwang ne ndu gai. 15 Mede heleuhdung nnuide rang kemsia de peu Ih nnuide siu si lakta; ncu peu minadung gu hengam de lia si lak mede n leuh de peu kau dilak, aide RAMPAUBE Tinggwang ne ndu gai.’"

16 Cidau RAMPAUBE sam a da gwang, rang eh, 17 "Mina nabo, Israel leuhme penui deu ga lungh kecudau, penui penui zairehidung nah penui tadung le cide tei hera di. Penui zairehidung au a dwa gade mipui ge pekei ramsang mci tadi kela de nzwa di. 18 Penui hejai hangdeu gage tei lwa kegaide ziemne nah mamiedung de reca eh cide tei hera kedine Ih penui dage a rata rui gai. 19 Ih penuide heleuhdung kakgage teizang gai di; penui hangdeudung ga zangra ladi. Ih penui zaireli nah penui tahdung rehi gade penuide tiak. 20 Pecai penui heleuhdung da mie, nah penui kemie leune ga, penui a kemci zi de tei hera minadung penui dage, ‘Aidungde RAMPAUBE minadung kesang deni? de rang kegaidau, kedanemene penuide au pe deu gade kelien mpet kedine.’✝ 21 Dede Israel leuhme heleuhdung kakga mie kecudau a zi tei hera kedi ziemne Ih a kemci zi de a lung siadi.

22 Ciziemne Israel leuhme dage ranglu, ‘RAMPAUBE Tinggwang aide rangla: Ih aide nnui ziemne tei ma, Israel leuhme, dede a kemci zi ziemne teibam, nnui mie kecu leune ga heleuhdung kakgage tei hera kedi de. 23 Ih a zi kedi de tei mci luzie, nnui ne heleuhdung kakgage tei hera kedi de, heleuhdung kakgade, nnui cide tei hera di. Iciulu de heleuhdung Ih RAMPAUBE lie ci luzie, aide RAMPAUBE Tinggwang ne ndu gai, nnui Ih mci lie kecu ngau kegaidau.✝ 24 Ih nnuide heleuhdung gade ngngwa luzie nah hangdeu leune gade keu hekwa luzie, nah Ih nnuide nnui deu gage ngngwa gai luzie. 25 Pecai Ih nnui reu gage dui kemci kezin gai zie iciu eh nnui maudung gade nnuide tei mci lu kerane, nah nnui gu mamiedung leune gade nnuide tei mci beuzie.✝ 26 Ih nnuide mlung keheci ge nah rabe keheci ge nnui lung coktu gage peu zie, nah nnui pumteih gade nnui mlung tangtsu nzwa ketak de keugi dizie. Kedanemene Ih nnuide samzai ketei mlung peu zielu.✝ 27 Ih n dage a rabe kaigai beuzie nah Ih peu nnuide a zaidung nah a ajadung leune mzai luzie, iciu eh nnui cidungde tei kerane.✝ 28 Iciulu de Ih nnui paume de peu kebeu deu ga nnui lungh luzie; nnui a minadung zie, nah Ih nnui Tinggwang zie. 29 Kedanemene Ih nnuide nnui kehera leune gade keli beuzie. Ih mei de peu buisüt lulo de aja kaigai beuzie. Ih nnui reuga ge herakum teugwang beusi lakta. 30 Ih peu matsibangdung de nah luhdung de petsi bui kiee luzie iciu eh peu heleuhdung kakgade peu herakum ziemne nnuide hengam teisi di melu kerane. 31 Cidau nnui nnui kemau zaireli nah nnui bata kesiadung de cet zie, nah nnui kenneu zu lia gai zie nnui maudung nah nnui kenneu tadung ziemne.

32 Ih aide nnui ziemne tei ma, aide RAMPAUBE ne ndu gai, aide nnui ci lulo. Cine nnui zaireli ziemne ngngam lu, Israel leuhme. 33 RAMPAUBE Tinggwang aide rangla: Ih nnuide nnui kemau leune gade tei mci kelu benai, Ih nnuide peu namdidung ga lungh nah ngkap kedi henidung de peu retak dai luzie. 34 Nnui ngkap kedi henidung de tetkah kelame miakngau gade ngkap kedi heni ge nzwa tadi kemaktane cide puu zie. 35 Pecai penui rangzie, "Hangdeu aide ndaa gi kedi deu ge, dede cu au Eden gurie nzwa dida; kemrwa namdidung nah migede lungh kemak ngkap kedi henidung ndaa ngkap kebam de cu au rie twagwa luda nah mina lungh bam dida." 36 Cidau nnuide twagwapung kebam heleuh kedadung Ih RAMPAUBE lie kecu ci luzie, ngkap kedi henidung de Ih ne retak dailu kecu nah gi kedi henidung de Ih ne tei hemi dailu kecude. Ih au RAMPAUBE. Ih cide rang ndu gai dida nah Ih cide tei zie.

37 RAMPAUBE Tinggwang aide rangla: Israel leuhme acu cide penui dage tei dai gailo de kie zie, penuide tei ngkiee pwa meurün hau nzwa beu kera. 38 Meuründung de ratak ziemne kai ntsam pwa kela de nzwa,* Jerusalem ga hengyi ziemne kai kenzeu meuründung de nzwa, cinzwa eh ngkap kedi namdidung de minadung meurün haudung nzwa pui dizie nah penui Ih RAMPAUBE lie kecu ci luzie.’"