1 RAMPAUBE sam a da gwang dai eh, ranggai, 2 "Mina nabo, Israelme dage maregwa peu gai nah samregwa ge rang lo. 3 Aide rangbeu lu, ‘RAMPAUBE Tinggwang aipau de rangla:

Liengrie kedi ge pe hesiudung de disüt nah pe hesiu maidung de tie, pe maidung le puipung,

nah cide au pegiak ketsamtsam, cide Lebanon ga mie nah Cedar bang ge tün ga tau bam di.

4 Cide pe kiakdung tündung kiaktütdi nah cidungde keu pwa Canaan deu gage kaidi;

pa cide heli keteime namdi ge gage linggaidi.

5 Pa Israel deudi gade tsileuh kesa keulu nah cide tangdei keyi gage linggaidi.

Pa cide dui kedi tai gage willow bang ge nzwa kailu.

6 Pecai cide pwaklu nah hangdeu ga kubetsibang henabai eh pekiak kepui bang ge teilu.

Pe kiakdung lingrie lambie nreule lungh hanglu, nah pe mahdung hangdeu ge him mcuklu.

Cine cide mabang ge di nah pe kiakdung petlu nah pekiaknadung pwak petlu.

7 Dede keda liengrie kedi ge pe hesiudung disüt cuge nah pe maidung kiee cube bam reu.

Ainie! Aipau kubebang pe mahdung liengrie lam ge nreu bam,

nah cide ling kegai bam gade pe kiakdung liengrie lam ge lungh zang gai bam cinzwa eh cide dui hua bamlu kerane.

8 Cide au dui kedi ge tai ga tangdei keyi ge gage linggai pwabam

cine cide pe kiakdung bwalu nah petsi builu, cinzwa eh hezuyi süt cu kubebang ge teilu kerane.’

9 Minadung dage ranglo, ‘RAMPAUBE Tinggwang aide rangla: Cide lungh yi lubui ni?

Cide pai mpetdi lak ni nah petsi raidi lak ni iciu eh cide regui di kerane?

Pumci kengkingme mede mina kekiee ge de pe mahdung pai mpet kerane teu maisia lak.

10 Cine ainie! Cide ling kelu cai, cide lungh lubui ni? Cide naimiak kepetle tingkai ne gui lwa gai de reguidi lak ni?

Cide au pwak cuh kelu gurie deu gade regui nggah zing dizie.’"

11 Pecai RAMPAUBE sam a da gwang dai eh ranggai, 12 "Samzai tei kerau mina aidungde dade keteu lo, ‘Nnui ma aidungde pekie ci meni? Ainie! Babylon gwangpei Jerusalem ga gwang nah pe hegwangpei nah hegwang napeidung de keuteu pwa di nah penuide Babylon ga peda ngngwa gwang kedi.’ 13 Pecai pa hegwang kilungme gede ngngwa lu, pecu ngngwa samkak teilu, nah pecu peu sampet kelu tei lu. Pa cipau deu ga kedime de ngngwa teu tetdi, 14 cinzwa eh Judah gwangram hena bailu kera nah pekatei pecu teu cuh gai lakti kerane. Pe samkak de kai nzeu kelu gade penui deu kwak luzie. 15 Dede Jerusalem gwangpei hekwendung nah reugwame de keulu kerane pekang kebam kedimedung de Egypt ga lang kegai gade pecu renia di. Pa cide tei dau lubui ni? Ma aidungde tei kebam be nria lubui ni? Magade pa samkak kelude gileu dicai, pa pak lubui ni? 16 Ih ring kebam nzwa!, aide RAMPAUBE Tinggwang ndugai, pa au pecu hegwang tei kebeube gwangpei deu gade tsai bi zie, hegwangpei sampet de pa masi pei ta kedibe de, nah pane pe samkak tei pang kedibe de. Pa au Babylon sum gade tsai zie. 17 Pharaoh nah pe reugwame ngkiengsüt kecudung nah mina maadi ge le de Israel de hereu ketei ga ngha lak, mi kekiee gede teitset kera lampuidung nah twa kengwa kiriedung tei kelu dau. 18 Kedanemene Judah gwangpei samkak kelu teipang kegai gade pe sampet de masi pei tadi. Ainie, pa peba hetwa pet lü sampet ge teilu nah cide cai de pa ma aidungde teidi. Pa au pak gai lakta. 19 Ciziemne RAMPAUBE Tinggwang aide rangla: Ih ring kebam nzwa, pa a sampet gi kah nah a samkak de tei pangdi meluini? Cine Ih pe saja pe peu gage teugwang beu zie! 20 Ih a helang pe reu gage sam gai zie, nah a teihgwa lang gage pecu keu luzie. Pecai Ih pecu Babylon ga ngngwa gwang luzie nah cikade pecu saja peu zie kedanemene pa masang kemak ta tei eh acu cwa kedine! 21 Pe reugwame kakga kwak bamlu kerane pak kelame pelane hereu gade tsai kap dizie, nah bang kelume leune de luga aika ge teizangra dizie. Pecai Ih RAMPAUBE lie kecu nang ci luzie; Aide tei gwang kera Ih rang ndu gai da."

22 RAMPAUBE Tinggwang aide rang eh, ‘Ih cedar bang cehutube sau de keuteu dizie, nah Ih cide pekiak kerenunadung gade kendei gage linggai dizie. Ih cide tei pang dizie, nah Ih cide lamlwatu kehu ge gage ling luzie. 23 Ih Israel lamlwatuhdung gage linggai zie cine cide pe kiakdung bui luzie nah petsi kei luzie, nah cide ngau hezuyi süt kecu cedar ge zie cinzwa eh pe hesiu kebam nruine leune cipau kangga lungh dizie. Cidungde pe kiakdung gage peciep teu luzie.✝ 24 Pecai luh ga tsingbang leune Ih RAMPAUBE lie kecu ci luzie. Ih tsingbang kecehudung tei hena dila nah tsingbang kehenabedung tei cehu beula. Ih dui ga kebam tsingbang de tei regui dizie nah Ih tsingbang kekii be de peu pa luzie. Ih au RAMPAUBE, aide tei gwang kera Ih ndugai da; nah Ih cide teigai dida.’"