1 RAMPAUBE sam ada gwang dai eh, ranggai, 2 "Mina nabo, Israel lamlwatudung lambie ge n zu kaigai lu nah penui dage caihasam rang beulo. 3 Aide ranglu, ‘Israel lamlwatudung, RAMPAUBE Tinggwang sam kingnei lu! RAMPAUBE Tinggwang aide kideutudung nah lamlwatudung, kereukidung de, nah langkamdung dage ainzwa ranggai: Ainie! Ih nnui dage kingtie ge teu gwangla, nah Ih nnui mamie recakela nidung de ngkap dizie. 4 Ciu eh nnui recabamdung de lugai kelak ge dizie nah nnui gu heciadung de tei ngkap dizie, nah Ih nnui ketsai paau de penui gu mamiedung dwa gage kelien nghung gai dizie. 5 Ih Israelme ketsai paaudung penui gu mamiedung dwa gage kaigai zie, nah nnui recabamdung taiga ge nnui raadung teizang twagwa gai dizie. 6 Nang kelungh kehei ga, namdidung ngkap dizie nah nlumkemak reca nidung de tei ngkau dizie, ciu eh nnui recabamdung ngkap dizie nah lugai kelak tei dizie. Ciu eh penui pang nah gah dizie, nnui gu heciadung bi ngkau dizie nah nnui tadung tei nggah dizie. 7 Minadungde kehei gade teitset dizie nah nnui ring kebamme Ih RAMPAUBE lie kecu ci luzie. 8 Dede Ih nnui kakgade mi kangge de kai nzeu zie, nah heleuhdung kakgade midung ge bam zie kiengtie gade pak kelu, nnuide namdidung ga teizang kegai dau. 9 Pecai heleuhdung kakgade pak kelume penuide hebaang tei kebam gade acu nsung luzie, penui kenlum kegah mlungdung a dade nreu tet kedi gade a lung tei rejamdi, nah penui mamiedung luu neu kedi gade. Pecai penui penui zu gade ngau kenghet keu lia dizie penui makesiadung tei kedi de ziemne. 10 Cine penui Ih RAMPAUBE lei kecu ci luzie. Ih pekie ge bam eh Ih rang penui da makesia teu gwang kera de. 11 RAMPAUBE Tinggwang ainzwa ranggai: N badung bapeu lu nah n pidung sap ntip lu! Rang lu, ‘Alas!’ Kedanemene Israelme kelak ga kesia nah kemneudung pelane tei kedine! Kedanemene penui kiengtie, herakum, nah rapiadung ga kau zie. 12 Kemdei ga kebamme ge mateei eh tsai dizie, nah kenna ga kebamme de hereu gade teitset dizie. Bang kelume nah ring kebammedung penui herakum gade tsai dizie. Ainzwa eh Ih penui dage a rata de tei cang luzie. 13 Cipaucai nnui Ih RAMPAUBE lei kecu ci luzie, ketsai paaudung mamiedung kakga nah recabamdung taiga tei zang kegai dau, kideutu kehudung pelane ga, lamlwatudung reu leune ga, nah tsingbang kemdiak pelane kangga nah mhu bang kedi ga, heni pelane ga penui mamiedung de ratak ru gai beu kela ga. 14 Ih a ba hetwa gai zie nah hetaideu nkangle gade Riblah namceu nreule kecang hangdeudung de lugai kelak ge nah kenkap ge tei dizie, penui lungh kebam henidung pelane ga. Iciu eh penui Ih RAMPAUBE lie kecu ci luzie."