1 Anuide langgi kedi mmi kerei bekum, kei kerei bekei ziangreiehkena benai, RAMPAUBE sam a da gwang eh ranggai, 2 "Mina Nabo, n zu Pharaoh de punglie lu, Egypt gwangpei de; cairasam rang pecu nah Egyptme pelane de mmaulu. 3 Ndugai nah ranglu, ‘RAMPAUBE Tinggwang aide ranggai:

Ainie! Ih ncu mmau la, Pharaoh, Egypt gwangpei.

Neidi, nang mbai eh hereuki sumga kwabam,

aide rang kelabe, "A reuki au akatei agu. Akatei a ziemne Ih ne teilu." 4 Kedanemene Ih n geiza gage kagwakdung zagai zie, nah ngu Nile gu heka ncu gwang n liepdung ga gwang koplu zie; Ih n hereuki sum gade ncu teu ncuh zie hereuki ga ncu kop pwala kebam heka pelane de si eh.

5 Ih ncu hetaideu gage kelien nghung gai dizie, nang nah n hereuki ga heka pelane de.

Nang luhpak kemza ga kaugai zie; ncu hekwa mede teu ncuh lak.

Ih ncu kideu ga keringria kebamdung nah tinggimdung ga nruinedung de taktyei ge nzwa ha dizie.

6 Ciciu eh Egypt ga lungh kebamme pelane Ih RAMPAUBE lie kecu cilu zie, kedanemene penui Israelme ziemne meibang kemnei ge kecune.

7 Penui ncu penui ba le kerak keludau, nang penui hekeutu teicum nah teurak di;

nah penui ncu ngngei kecudau, nang pang di, nah nang penui pidung de peu sap ntiplu tadi.

8 Cine RAMPAUBE Tinggwang aide ranggai: Ainie! Ih kiengtie ge keugwang ncu mmau zie. Ih n da kebam mina nah makaune kenana de danggi dizie. 9 Cine Egyptme deu de mrwa nah ngkap dizie. Pecai Ih RAMPAUBE lie kecu penui cilu zie, kedanemene neidi ranggai, "Hereuki de agu, Ih ne cide tei kelune." 10 Cine, ainie! Ih ncu mmau nah hereuki de mmaula, cine Ih Egyptme deu de kemrwa nah kemta gede pwapeu dizie, nah nang kemtadeu ge dizie Migdol gade Syene ga kecang nah Cush gu raidung dega kecang. 11 Mina pi ge de cide tetkah lak, nah renaam kaune pi gede cide tetkah lak. Cika mmi riakdai ziemne migede lungh lak. 12 Kedanemene Ih Egyptme deu tei mrwa dizie mina lungh kemak deudung kakgade, nah cipau namdidung de kemta ketei namdidung kakgade mmi riakdai ziemne mrwa bam dizie; pecai Ih heleuhdung kakgade Egyptme de teizang gaizie, nah Ih penuide hangdeudung gage langgai dizie.

13 Kedanemene RAMPAUBE Tinggwang aide ranggai: Mmi riakdai canglu de Ih minadung zangla kedimedung kakgade Egyptme de teu hekwa luzie. 14 Ih Egyptme de penui maheidung peu dai beuzie nah penuide Pathros cuikui ga ngngwa caili dai beuzie, penuide damgaikebeu deu gage. Pecai penui cika kehena hegwangram ge tei dizie. 15 Cide hegwangramdung kakgade henatube zie, nah cide heleuhdung kakgade teu ncuh si gailak dizie. Ih penuide tei nggah dizie ciu eh penui heleuhdung reu hegwang teisi tadi zie. 16 Egyptme dage Israel pe kekuu kebam de bamsi lakta. Meliene, Israel Egyptme dage kengha kie kegaide gade kemau tei kedide nsungdai luzie. Iciu eh Ih RAMPAUBE Tinggwang lie kecu penui cilu zie.’"

17 Pecai anuide langgi kedi ga la kedi mmi ngkaiehhena bekum kei raitu bekei zie raitu benai, RAMPAUBE sam a da gwang eh ranggai, 18 "Mina Nabo, Babylon gwangpei Nebuchadnezzar Tyre de gwaketang kerane heni gega pe reugwame de peu heta kehung tei. Penui peu pelane kwak di kemaktane hemui gwang, nah pelane hekeutu teirejam di. Pa nah pe reugwame heta kehung tei eh cide gwaketang kecu pa teuswa pet liede Tyre dade penui ziehi ngaulu ma. 19 Cine RAMPAUBE Tinggwang aide ranggai, ‘Ainie! Ih Babylon gwangpei Nebuchadnezzar de Egyptme deu peu di lauda, nah pa pe mahei keuteu dizie, pe mabamdung tuiteu dizie, nah cikade ngau kelu pelane pa pungtet dizie; cide pe reugwamedung ziehidung zie. 20 A ziemne heta tei kegai de ziemne Ih pecu Egyptme deu de le pe ziehi teibeu eh pecu peu dida, aide RAMPAUBE Tinggwang ne ndugai. 21 Cipau benai Ih hekii ge Israelme kigade peu pwakcuh zie, nah penui kebam kakgade Ih ncu peu marang zie, iciu eh Ih RAMPAUBE lie kecu penui cilu zie.’"