1 Cine cide mmi herok bekum nah kei herok bekei tei gwang, lang mengei ne benai, Ih a ki ga ntumlu ge Judah ga muiteumedung adwa ga ntumlu, cika de RAMPAUBE Tinggwang kengking a da gwang dai. 2 Cine Ih pie gai, nah ainie, cika mipei ge rehi nzwa ngau gai. Pekia nkangle gade mi nzwa ngau. Nah pekia nreule gade mage taubaa kecu ngau, hegeu baha kecu ge nzwa. 3 Pecai pa heba kenzwa ge hetwa pet nah a peu tam teulu; Tinggwang Rabe ne acu kideu nah tinggim kak ga ge keucu cehu gai, nah Tinggwang dade marengeidung, pa acu Jerusalem ga ngngwa gwang beu, tingpeule bie rieki helungbe kimui ga ngngwa gwanglu, cika riaksiet kedi ketei mamie ge sap bam. 4 Pecai anie, Israel Tinggwang kebaa baha eh cika bam, Ih langkie gade kengau rehi de kesiakge. 5 Pecai pa a dage rangdi, "Mina Nabe, tingpeule ge n miak ngngang cuh pie gailo." Cine Ih a miak tingpeule ge ngang cuh gai, nah tingpeule kirie kebam recabam lebie ge, cika kirieki kimui ga, riaksiet mamie ge bam. 6 Cine pa a dage rangdi, "Mina Nabe, penui daipai tei bam bi nang ngau mi? Aidungde au kemneudung kedih ge Israelme kelakdung aika de tei bam, peu acu a kemci bam gade tet ndei di lu kerane. Dede nang nreu gwang delwe kemneudung dih gwa cube ngau zie."

7 Pecai pa acu kigu kimui ga ngngwa gwanglu, nah Ih piegai, nah cika kirie ga makoiki ge bam. 8 Pa a dage rangdi, "Mina nabo, aipau tangdeu ga kui cu." Cine Ih tangdeu ga kuilüt, nah cika kikam ge bam. 9 Pecai pa a dage rangdi, "Mie cu nah penui aika de kenlien kemneutadung tei kebam de pielo." 10 Cine Ih lütlu delwe piegai, nah anie! Tangdeudung ga bwa kela kaune nah mci kemak kaune leune miedung heri pwabam! Israelme kelakdung mie leune tangdeu pelane gage heri lüt bam. 11 Israelme muiteume mina riakhena ge ki cika bam, nah Shaphan napei Jaazaniah penui kakga sap bam. Penui mamiedung dwa ga sap bam, mige ge kecu kehengui keru kwak penui ba ga pwabam ciu eh perim kehengui mika cuhdi. 12 Tinggwang a dage rangdi, "Mina nabo, nang Israelme muiteumedung kemui ga daipai tei bam bi pie neu mi? Hangge ge kecu aide mamie kibung ga mbailwe tei bam, Kedanemene penui rang eh, ‘RAMPAUBE anuide ngau ma! RAMPAUBE au hangdeu be de gidi delu.’" 13 Pecai pa a dage rangdi, "Nreu dailu delwe penui kemneutadung kedih keda tei kebam de pie gailo."

14 Pecai pa acu RAMPAUBE ki kirie tingpeule kebam kimui ga ngngwa gwanglu, nah ainie! Mipuidung cika ntumlwe Tammuz ziemne hap bam. 15 Cine pa a dage rangdi, "Nang aide ngau mi, mina nabo? Nreu dailu delwe aidungde swa de kemneutadung kedih de pielo."

16 Pa acu RAMPAUBE ki kigu lung ga ngngwa gwanglu, nah ainie! RAMPAUBE kereca ki kimui ga lampui nah recabam kakga, cika mipei hang ngkai mengei kenzwa ge RAMPAUBE reca ki lebie cainok lü bam nah penui zudung naimiak kepetle ge nreu gai bam, nah penui tingnaimiak de reca bam. 17 Tinggwang a dage rangdi, "Nang aide ngau mi, mina nabo? Judahme ziemne aipau kemneutadung aika tei kebam de ma keceu nage lie bam ni? Kedanemene penui au hangdeu ga zaisiet le pui bam dida nah penui au nreu gwang dailwe a rata tei nkiee si gai, penui ngkiedung kiak kai lü. 18 Cine Ih liede penui da teigai zie; Ih penuide ngau nggia bam lak, nah Ih penuide mbai beulak. Penui a kün gage hap bit gai liede, Ih penui kwa kingnei lak."