1 "Cu nang, mina nabo, Gog dage caihasam rangbeulo nah aide ranglu, ‘RAMPAUBE Tinggwang aide rangla: Ainie! Ih ncu renia la, Gog, Meshech nah Tubal gu kedibe. 2 Ih ncu teu mreu gai zie nah n lampui saubeu zie; Ih ncu tingtünle kemdei gade ngngwa gwang zie nah Israel lamlwatuhdung gage ngngwa gai zie. 3 Pecai Ih n lakpi n ba hile gade keugidi zie nah lakpitsidung n ba zetle gade peu kaumie dizie. 4 Nang Israel lamlwatuhdung gade tsai zie, nang nah n reugwame nah ncu ngngwa kela maadung pelane. Ih nnuide nruinedung nah luh teikuudung taktyei pok tei kera peudi zie. 5 Nang rie kemak luh reuga tsai zie, kedanemene cide Ih akatei ne rang ndu gai da, aide RAMPAUBE Tinggwang ne ndu gai. 6 Pecai Ih Magog reu gage mi langgai zie nah jaaidikung ga kwak eh lung kebammedung dage, nah penui Ih RAMPAUBE lie kecu ci luzie.✝ 7 Kedanemene Ih a zi kemci de a Israel minadung de peu ci zie, nah Ih a zi kemci de de peu tei hera sidai lakta; heleuhdung Ih RAMPAUBE lie kecu ci luzie, Israel ga Kemci be de. 8 Ainie! Pe tingba de gwang lada, nah cide teicang bi zie, aide RAMPAUBE Tinggwang ne ndu gai. 9 Israel namdidung ga lungh kebamme hegwale mpet zie nah penui reunetdung teu eh mi twa gai zie nah mi tei zie nah cidungde ru dizie, hegeu keceunadung, hegeu kedidung, lakpi, lakpitsidung, hengeidung nah tsingtandung; mmi hena ge ziemne penui cidungde le mi tei zie. 10 Penui luhdung gade tsing hekwa lak mede renaamkang gade tsingbandung bi lak, kedanemene penui reunetdung diak zielu; penui penui dade ma tuilu neu eh kelame gu penui ne tui luzie; penui penui gu süt lu neu eh kelame gu penui ne süt luzie, aide RAMPAUBE Tinggwang ne ndu gai."

11 Pecai cipau tingba benai Ih Gog ziemne cika heni ge tei zie, Israel ga heraukie ge, jaaidi naimiak kepetle ge mbeu kelame ziemne chabak ge. Cide ne tetkah neu kelame de kaam dizie. Cika ge penui Gog de nah pe minadung de kung zie. Penui cide de Hamon Gog Chabak de eh qu zie. 12 Kei hena ge ziemne Israel leuhme hangdeu be de tei mci lu kerane penuide kung dizie. 13 Hangdeu cika mina leune cidungde teu kung zie; acu hetwa pwa peu kegai benai cide penui ziemne nsung lalu kera tingba ge zie, aide RAMPAUBE Tinggwang ne ndu gai. 14 Pecai penui hangdeu be ga rwa bamsap kerane mipeidung de kedet luzie, cika mbeu tetkah kelame de peeilu kerane, dede penui tsaidi nah penui pumteihbe de hangdeu reu ga bam di, iciude penui penuide kung di eh hangdeu be de tei mcilu kerane. Kei hena de cang dide penui peei ndeu dizie. 15 Mipei aidungde hangdeu be ga tetkahgwang kecudau, penui mina ra ngau keludau, penui cikage giak heci gai zie, herau kui kelame gwang eh cide Hamon Gog Langkam gage kung di kemaktane. 16 Cika Hamonah de eh qu kela namdi ge bam zie. Ainzwa eh penui hangdeu be de tei mci luzie.

17 Cu n dage, mina nabo, RAMPAUBE Tinggwang aide rangla: Luh ga pe hesiu pung kela ruinedung nah renaam kaune leune dage ranglu, ‘Gwang ngkwalu nah gwanglu. Twagwa kebam leune gade nnui ziemne Ih ratak tei kegai ga gwang twagwalu, Israel lamlwatu ga ratak kedi ge, iciu eh nnui heteih nah hejai saklu kerane. 18 Nnui reugwame teih tyei zie nah kideu ga muiteume jai sak zie; penui au meurünseudung, meurünnadung, hemeudung, nah hetumseudung, Bashan gade pelui keyi kaunedung. 19 Pecai nnui maca nnui nnung tyei zie; nnui sak mie di kemakta hejai sak zie; aide nnui ziemne Ih mtei gai kebeu ratak ge zie. 20 Nnui a taktyeibam gade hekwendung, bagi, reugwame, nah hereu tei kelame leune de ngngwa eh nnung luzie, aide RAMPAUBE Tinggwang ne ndu gai.’

21 Ih heleuhdung kakga a kemdu lia gai zie, nah heleuh leune Ih tei kegai a tutiak nah a ba penuide renia kelade ngau zie. 22 Cipau benai gade Israel leuhme Ih RAMPAUBE penui Tinggwang lie kecu ci luzie. 23 Heleuhdung au Israel leuhme acu cwa kecu gade a dage kemau tei gai kedi maudung ziemne lang gi kedi ga mie kecu ci luzie, cine penui dade Ih a zu hebai di nah penuide penui ngauraume ba gage kaigai beu di iciu eh penui pelane kingtie gade kau dilu kerane. 24 Ih penuide penui mci kemak nah penui maudung ziemne ngaulu kebui ge penuide peu, Ih a zu penui dade hebai kedi dau.

25 Ciziemne RAMPAUBE Tinggwang aide rangla: Cu au Ih Jacob gu maheidung peu dai beu zie, nah lsrael leuhme de ngaunggia beu zie, Ih a zi kemci de ziemne helung kaisüt eh hetah tei kegaidau. 26 Pecai penui penui hengam de pung zie nah acu cwa kegai tah ketei leune de. Penui penui deu ga kwak eh mtak di kecudau nah migede penuide tei keherei gai kera gah kedidau penui ma aidungde pelane nsungta dizie,. 27 Ih penuide minadung kak gade peu kwak lu nah penui ngauraume deu gade penuide ngngwa keludau, Ih heleuhdung kekiee ge dwa gade Ih mci kecu lia gai luzie. 28 Cidau penui Ih RAMPAUBE penui Tinggwang lie kecu ci luzie, kedanemene Ih penuide heleuhdung kakgage hebaang tei eh lang gidi, dede Ih penuide penui deu gage ngngwa gwang dai zie. Ih penui migede de heleuhdung kak gage gidi lak. 29 Ih a Rabe Israel leuhme reu gage rui kegaidau Ih a zu penui dade hebai sita dizie, aide RAMPAUBE Tinggwang ne ndu gai."