1 RAMPAUBE sam a da gwang eh ranggai 2 "Mina nabo, caihasam rang eh rangbeulu, ‘RAMPAUBE aide rangla:

Haplu, "Kesia tingbadung gwang zeu."

3 Tingba cide nna dida. RAMPAUBE tingba de nna dida. Cide hemwa ne kepui tingba ge zie, heleuhdung ziemne keherei tingba ge zie.

4 Pecai kingtie ge gwang eh Egypt de renia zie, nah Egypt ga teitset kedidung kauzeu kecudau Cush ga suisiet bam dizie,

penui pe mabam keuteu kedi dau, nah pe bangdwa ngkap kedi dau.

5 Cush nah Put, Lydia nah Arabia pelane, nah Libya, samkak tei pwa kebam minadung de ngngwa eh, kiengtie gade penui kau ciak dizie.

6 RAMPAUBE ainzwa rangla:

Cine caudung Egypt lam pwabi kau zie, nah pe kengking ziemne ngang kela de gah dizie.

Migdol gade Syene kecang reugwamedung kingtie gade kau dizie, Aide RAMPAUBE Tinggwang ne ndugai.

7 Penui gi kedi deudung ga penui swa gah eh bam dizie, nah penui namdidung ngkap kedi namdidung kakga bam. 8 Pecai penui Ih RAMPAUBE lie kecu cilu zie, Ih Egypt gage miheu lang kegai dau, nah penui kenghamedung de ngkap kedi dau. 9 Cipaunai samgwame a dwa gade liem gade tet mie kwak kebam Cush de ngkap kera mie zie, nah Egypt dage kengkap kekai benai penui kakga lungrei le pui dizie. Kedanemene ainie! Cide gwang lada.

10 RAMPAUBE Tinggwang ainzwa eh ranggai: Ih Egypt kedi de Babylon hegwangpei Nebuchadnezzar de peu ngkap dizie. 11 Pa nah reugwame pecu nzang kelame kengngi peu kela leuhdung de teugwang penui deu ngkap dizie; penui kiengtie teu eh Egypt de renia zie nah teitset kedime ne kideu de pui dizie. 12 Ih hereukidung de pwa hangdeu kecangh ge tei dizie, nah hangdeu de zwa pwa kesiame ba gage kai dizie. Ih penui deu nah maheidung sangme de peu tei mrwa dizie, Ih, RAMPAUBE, a sam rang gaila.

13 RAMPAUBE Tinggwang ainzwa ranggai: Ih mamiedung tei msia dizie, nah Memphis namdi ga kemta miedung peu bam si lak. Egypt ga peu hegwang bam si lakta, nah Egypt gage kengngi teugwang gai beuzie. 14 Pecai Ih Pathros de pwa kemrwa bam ge tei dizie nah Zoan namdi de mi le ngkap dizie, nah Thebes namdi ga tutiak teu penui reuga kai zie. 15 Ih Pelusium namdi dage a rata liagai zie, Egypt gu rie kelu namdi, nah Thebes bam tei msia dizie. 16 Pecai mi gele Ih Egypt de ngkap dizie; Pelusium da lungrei kehap kedi ge gwang zie, Thebes pangpop dizie, nah Memphis tingnai ramsangne ngauraume de ngngwa regi zie. 17 Heliopolis namdidung nah Bubastis ga rehangmedung kingtie le penuide ngkap dizie, nah penui namdi de tui teu dizie. 18 Tahpanhes namdi ga, Ih Egypt de kangpwa kebam de hiak kegaidau mui dizie, nah penui kengkieng de ziemne hegie kela de gah dizie. Pecu hemwa ge ne kezui dizie, nah pe napuimedung de hebaang tei dizie. 19 Egypt ga tutiak ge kai zie, cinzwa eh penui Ih RAMPAUBE lie kecu ci luzie.’"

20 Pecai mmi kereiehket bekum, hekei raitube ga, cipau kei lang henane benai, RAMPAUBE sam a da gwang eh ranggai, 21 "Mina nabo, Ih Egypt ga hegwangpei Pharaoh ba teicum dida. Ainie! Cide kang de ma, mede cide tei hemi lu kerane lamlui de ma, iciu eh cide ngking eh kingtie pwalu kerane. 22 Cine RAMPAUBE ainzwa ranggai, ‘Ainie, Ih Egypt gwangpei Pharaoh de ncau la. Ih pe ba teicum dizie, kengkieng de nah cum kebam kenana de, nah pe ba gade kingtie de peu nghai dizie. 23 Ih Egypt de heleuh kedadung dage nah hangdeu kedadung gage tei zanggai dizie. 24 Ih Babylon gwangpei ba tei ngking gai zie nah a kingtie de pe ba gage kaigai zie iciu eh Ih Pharaoh ba tei msia dilu kerane. Pa Babylon gwangpei dwa gade tsaidi lai eh kebamme nzwa eh mrasüt gai zie. 25 Ih Babylon gwangpei ba tei ngking beuzie, nah Pharaoh ba nnei dizie. Egypt deu de renia kerane Ih kingtie de pwa Babylon gwangpei da peu kegaidau penui Ih RAMPAUBE lie kecu ci luzie; kedanemene pa cide le Egypt deu de gwaketang zie lu. 26 Cine Ih Egyptmedung de heleuhdung kakgage nah hangdeu kedadung ga teizang gai dizie. Iciulude penui Ih RAMPAUBE lie kecu cilu zie.’"