1 Rampaube a dage rangbeu, Israel gwangpei kena de ziemne suisiet lei tei gailo 2 nah rang eh,

‘Cau n pui no? Hingho pui ge, pa au hingho napei de ngngwa lungh;

hinghodung hena kebamdung kakga, pa au pe nadung de nküt cuh lu.*

3 Pane pe name ket paube de ngküt ngking pwa hingho ge teibeu, hingho cide pa tui kelubedung de teu takcai kecu ciem keteulu, nah pecai pa minadung de tyeidi.

4 Pecai heleuhdung pe ha siulu. Pecu penui gu hebai gage keu pwadi, nah penui pecu gwaklwe Egypt deu ga ngngwa gwanglu.

5 Pecai pa pecu gwang dai kerane kwabam liede, pe keregui gah di, cine pa pe na keda gede keulu nah ngküt ngking pwa hingho ge teilu.

6 Aipau heri heret hingho de hinghodung kakga rwa ladi. Pa au heri heret hingho ge nah pa tui kelubedung de teu takcai kecu ciem keteulu; pa mina de tyeidi.

7 Pa penui gu hemipuidung de tui teudi nah penui namdidung tei msiadi.

Pa mra kegai kwa dene hangdeu nah cika kepuitei kebamdung gi kedi tei di.

8 Dede heleuhdung pecu renia kerane luga aika kebam deuceudung gade gwang;

penui penui gu helangdung pereu gage teu kam lu. Pecu penui taq gage keulu.

9 Penui pecu gwaklwe marak gage kaidi nah pecai penui pecu Babylon gwangpei dage ngngwa gwanglu.

Penui pecu kekwabe ba gage ngngwa gwang beudi, ciciu eh pe mra kwa madaude Israel lamlwatudung gade siu dai melu kerane.

10 N pui au kubebang ge dui tai gage ling kegai nzwa da

Cide au petsi buisüt nah pe kiakdung le kepui tei kedanemene dui kieesüt kebamne.

11 Pe kiakdung au ngking cide keu hegwangme tuitiedung teila,

nah pedi au pe kiakdung nreu hang,

nah pehu au peneidung keyi gade ngaudi.

12 Dede kubebang de rata le pai mpetdi nah kideu gage kelien nghung gaidi, nah tingnaimiak kepet le tingkai ne petsi gui cang gidi.

Pe kiak kenkingdung pakdi nah reguidi nah cidungde mi ne ru nggah di.

13 Cine cu au cide hetaideu gage ling dida, tingrui kemak deu nah kehereu deu gage.

14 Kedanemene pe kiak kedihdung gade mi heu pet nah petsi rudi.

Cika pe kiak kengkieng be kette gahdi, hegwang teu kera hegwangme tuitie gede gahda.’ Aipaude au suisiet ge nah suisiet lei ge nzwa tei lazie."