1 Pecai RAMPAUBE sam a da gwang eh ranggai, 2 "Mina nabo, Tyre ga hegwangbe de ranglu, ‘RAMPAUBE Tinggwang aide rangla: N mlung au ngangla! Nang ranggai, "Ih au tinggwang! Jaaididung sum ga tinggwangdung bam ga Ih bam zie!" Nang au mina ge gwale tinggwang meliede, nang n mlung tinggwang mlung nzwa di;✝ 3 Daniel swade nangbe mteugwa lie de eh cetla, nah ma kengkim ne ncu n swagah tei gailak de eh nang cetla! 4 Nang nkatei ncu maci nah heciemkeyi ne tei mahei luda, nah kecak nah rangkanggeu n mabamdung ga kailu! 5 Maci kedi ge ne nah nang heli ketei dene, nang n mahei tei nkiee si luda, cine n mahei de ziemne n mlung ngang dida. 6 Cine, RAMPAUBE Tinggwang aide ranggai: Kedanemene nang n mlung de tinggwang mlung ge nzwa tei kedine, 7 cine Ih sangmedung de ngngwa gwang ncu ncau zie, mipei ngaukehingdung keda leuhdung gade. Penui penui gu kingtiedung teugwang n maci keyi de de regi zie, nah penui n zuyi de tei hera dizie. 8 Penui ncu hekwaki gage lang nghung gai dizie, nah jaaididung sum gade tsai kedime tsit nzwa nangde tsai zie. 9 Nang rang kesang zie ni, "Ih au tinggwang ge" ncu teitset kecume dage? Nang au mina ge nah Tinggwang au ma, nah nang ncu teikeherei kecume ba ga bam zie. 10 Nang sangme ba gade hegeurum kemak tsit de nzwa tsai zie, kedanemene Ih ndugai dida, aide RAMPAUBE ne ndugai.’"

11 RAMPAUBE sam ada gwang dai eh ranggai, 12 "Mina nabo, Tyre gwangpei ziemne hei eh haplu nah pecu rangbeu lu, ‘RAMPAUBE Tinggwang aide rangla: Nang au yicangsiak kecu hezube da, maci kepui tei nah zuyi ga yicangsiak. 13 Nang au Eden ga bam, Tinggwang gurie ga. Tangtsu pemi kewhung leune le ncu puipung bam: ruby, topaz, emerald, chrysolite, onyx, jasper, sapphire, turquoise, nah beryl. N niadung nah hetei hetadung au kecak le tei pwabam. Ncu damkegai benai gade cidungde mtei pwabam dida.✝ 14 Ih ncu cherub ge nzwa keniak lu eh Tinggwang kemci lamlwa gage kaibeu minadung de gumlu kerane. Nang au heu kebam tangtsudung kakga tet lala. 15 Masangkemak tah n dade ngaulu kemaktane ncu dam kelu benai gade n tahdung ga nang samsang la. 16 Nang heli kedi tei kecu gade n da zaisiet le kepui teidi, nah nang kemau teidi. Cine Ih ncu Tinggwang lamlwatu gade kelien mpetdi, hera kedime ge nzwa eh, nah Ih ncu ngkapdi, mimakepiebe cherub, nah ncu tangtsudung kakgade teu gidi. 17 N zuyi dene n mlung au ngangla; n hezukeyi de ziemne n maci de teingkap dida. Ih ncu kideu gage lang nghung gai. Ih ncu hegwangmedung dwa gage kaibeu iciu eh penui ncu ngaulu kerane. 18 N maudung kekieege ziemne nah nang heli tei masanglu kemakne, nang n kemci ni de teihera dida. Cine Ih n dade mi mpetlu kera teigai; cide ncu ngkap dizie. Kideu ga ncu pie kebamme pelane miakngau gade Ih ncu mimüt ge tei dizie. 19 Ncu ci kecume leune n ngau eh mbeu dizie; penuide keheu pwabam dizie, nah nang kelungta ziemne bamta dizie.’"

20 Pecai RAMPAUBE sam a da gwang eh ranggai, 21 "Mina nabo, Sidon de mmau lu nah caihasam rang pecu mmau lu. 22 Ainzwa rangbeu lu, ‘RAMPAUBE Tinggwang aide rangla: Ainie! Ih ncu mmau la, Sidon! Kedanemene Ih nnui kakgade hetwa ngaulu zie iciu eh n minadung Ih RAMPAUBE lie kecu cilu zie Ih ncu kemzuibe teu saja kepeu dau. N dade Ih mci kecu keulia zie. 23 Ih rapia ge n dage langgai zie nah n lampuikidung ga hejai, nah gitset kedime n dwaga kaumie zie. Twagwa kebam pelane gade kingtie ncu mmau gwang kecudau Ih RAMPAUBE lie kecu nang cilu zie. 24 Pecai Israelme de ngkau kelame pecu twagwa kebam dade pecu rang kemsia nah tau ketei tudung bam lakta, iciu eh Ih RAMPAUBE lie kecu penui cilu zie!’

25 RAMPAUBE Tinggwang aide ranggai, ‘Minadung kakga lungh zang kebam gade Ih Israelme de hekwa keludau, nah Ih penui kakgade teuntsam mpet kegai dau, iciu eh peu heleuhdung de ngau kerane, iciulude a kilabe Jacob de hangdeu ha kebeu de gage penui kidung teilu zie. 26 Pecai penui cika ziune eh lungh nah kidung teicuh luzie, kubebangdung linglu, nah ziune eh lungh, penuide twagwa eh penuide ngkau kebamme pelane de Ih kemzuibe teu eh saja kepeu dau; iciu eh Ih RAMPAUBE lie kecu penui cilu zie!’"