1 Israel muiteume kangge a da gwang eh a dwa ga bamlu. 2 Ge RAMPAUBE sam a da gwang eh, ranggai, 3 Mina nabo, a mina aidungde mamie kereca gage penui lung kai dida nah penui makesia ketei puikam ge penui katei penui dwa gage kai pwa bam. Daiteilu Ih penui kie kela kwa de kingnei lai no? 4 Ciziemne penui dage aide rang beulu nah penui dage ranglo, ‘RAMPAUBE Tinggwang aide rangla: Israelme keheibe liede pe mlung gage kerecamie kai teu kelame, mede pedwa gage kesiaketei puikam ge kai pwa kebamme, nah caihakecime da gwang kecume, Ih, RAMPAUBE, pa kerecamie daikenzwa kiee ge bam bi kecu rehi gade pesam kelibeu zie. 5 Ih aide teigai zie iciu eh Israelme penui mlung penui mamiedung ne a dade teu mdei teu kelade keu cailigwang dailu kerane.’

6 Ciziemne Israelme dage rang beulo, ‘RAMPAUBE Tinggwang aide rangla: Helung nreulu nah mamie kerecadung gade nreu tet dilu! Kemneutadung tei kela pelane gade nnui zudung pung nreu caili lulo. 7 Israelme keheibe de nah sangmedung Israel ga lungh kebamme keheibe de acu püt kedime, pe mlung gage kerecamie kai teu kelame nah pedwa gage kesiaketei puikam ge kai pwa kebamme, nah caihakecime da gwang acu peei kelame, Ih, RAMPAUBE, pecu Ih kelibeu zie. 8 Cine Ih cikenzwame de renia zie nah penuide puisau kesia ge tei dizie, delwe a minadung kakgade penuide keu gi dizie. Iciu de nnui Ih RAMPAUBE lie kecu cilu zie. 9 Caihakecime gede cwa lwe samdung ge paula lie cai, iciu cai Ih, RAMPAUBE caihakecibe de cwa zie; Ih a ba hwapwa pecu renia zie nah Israel a minadung kakgade pecu ngkap dizie. 10 Penuikatei penui saja rip ngau zie; caihakecibe nah pe puisau peei kegwang keheibe de nzwa kap eh saja ngau zie. 11 Aide ziemne, Israelme de peu a dade pak mdei si la tadi zie nah penui kemau gade penuikatei penuide tei hera sita dizie. Penui au a mina dizie, nah Ih penui Tinggwang dizie, aide RAMPAUBE Tinggwang ndugai.’"

12 Ge RAMPAUBE sam a da gwang eh, ranggai, 13 Mina nabo, hangdeu be matei mau di eh kemau de le acu renia dicai iciu eh Ih a ba hwapwa cide de renia eh pe taktyeipok de ngkap dicai, nah cipau reu gage herakum langgai nah hangdeu be gade mina nah makaune kenana de ngkap dicai; 14 iciucai mina aipau hangcum de, Noah, Daniel, nah Job, kideu kakga bam liede, penui masang gade penui katei penui teilungh rünne keli luzie, aide RAMPAUBE Tinggwang ndugai. 15 Magade Ih hangdeu gage teikuudung langgai delwe cide tei mta di iciu eh hetaideu teidi eh teikuudung ziemne cika migede tet kahgwang ta dicai, 16 iciu eh mina makesangme hangcum de bam liede, Ih ring kela nzwa, RAMPAUBE Tinggwang ndugai, penui katei penui napeidung mede penui napuidung kecang de keligai lak dizie; penui teilungh katei rünne kelilu zie, dede hangdeube hetaideu ge tei dizie. 17 Mede magade Ih hangdeu cide dage hereu ketei teu gwang delwe rang eh, ‘Ih reugwame de langgai eh, mina nah makaune kenana de ngkapdi liede’, 18 magade mina makesang aipau hangcum de hangdeu sum kakga bam liede, Ih ring kela nzwa, RAMPAUBE Tinggwang ndugai, penui katei penui napeidung mede penui napui kecang de keligai lak; penui teilung katei rünne kelilu zie. 19 Mede magade Ih hangdeu aika ge mateei nah a rata gade hejai kelwa langgai eh, mina nah makaune kenana de ngkapdi kerane, 20 iciu eh Noah, Daniel nah Job cipau deu ga bam liede, Ih ring kela nzwa, RAMPAUBE Tinggwang ndugai, penui katei penui napeime mede penui napuimedung kecang de keligai lak dizie; penui masang gade penui teilungh katei rünne kelilu zie.

21 Kedanemene RAMPAUBE Tinggwang aide ranggai: Ih sajadung mdai langgai eh matei msia gwa dizie, herakum, hereu, renaam kaunedung, nah mateei, Jerusalem de mmau eh mina nah teikuu kenana de ngkap dizie.✝ 22 Ciuliede, ainie! Pecu mina ketsamnage bang diak beu zie, ring kelumedung pe napeime nah pe napuimedung de ngngwa mpet luzie. Ainie! Penui ncu ngngwa eh mpet zie, nah nang penui kemau nah batadung ngau zie nah Ih Jerusalem dage saja lang kegaide petau delie luu luzie, nah hangdeu be dage Ih makeheibe tei kegaidung de. 23 Nang penui kemau nah penui batadung ngau lude ring kelumedung ne nnui lung tei relui dizie, iciu eh Ih penui dage tei kegaidung de pekie kegah gade teigai kemak nnui ci luzie!, aide RAMPAUBE Tinggwang ne ndugai."