1 Ge anuide langgi kedi mmi kereiehket bekum, keicum bekei, cipau kei langnaige benai, RAMPAUBE sam ainzwa a dage rang, 2 "Mina nabo, Pharaoh Egypt hegwangpei, nah pe mina pecu twagwapung kebamme dage ranglo,

‘Cauge n kedi de keu keda lulai?

3 Ainie! Assyria au Lebanon ga cedar ge, pe kiakdung hezuyi, hegung ga kensiu peula,

nah hutube nah pe kiak le pe tün lungh puibam.

4 Dui kekiee ge ne cide tei cehu beu; dui kecok dene pe luilung tei mdibeu. Hereukidung lwa eh penuide twagwa bam,

kedanemene pe reunadung hegung ga tsingbangdung kebam leune da mie cang kebamne.

5 Hegung cide ga tsingbang kedabe swa pa hu gwala, nah pe kiakdung au kieesüt;

Pe kiakdung tiesüt lula kedanemene dui kekiee ge kebamne.

6 Tinggim ruinedung leune pe kiak gage pe ciep teila, nah kideu ga kelungh kaune leu pe kiak sung kangga ge nkak gaila.

Heleuh kekiee ge pe sung kangga lungh bam.✝

7 Pa lungdi kelu nah pe kiakdung tie kelu au pe mahdung dui ga lungh him kelune.

8 Tinggwang gurie ga kebam cedardung de cide hia tei luma.

Cypress bangdung kakgade kette cinkenzwa pe kiak gah, nah bang ceuna penai pekiak kedibe au nsam ma.

Tinggwang gurie ga kebam tsingbang kedabe kette cide nzwa hezukeyi gah.

9 Ih pe kiak kekiee ge le cide tei hezuyi gaibeu

nah Tinggwang gurie ga kebam Eden ga tsingbang kebam leune cide de periak la.

10 Cine RAMPAUBE ainzwa ranggai: Cide pe hu cehusüt kecu ziemne, nah pe kiakdung kakgade pe bang tün de lungh cuhlu, pe hu de ziemne pa hegie la. 11 Ih penuide heleuh kengkiengbe ba gage kai dida, penui kesia ta ketei nzüt gade penuide saja peu kerane. Ih penuide kelien mpet dida. 12 Sangmedung heleuh leune de kebwak keladung ne penuide ngkap dida nah penuide peu tsai kerane gi dida. Pe kiakdung lamlwatudung nah chabakdung ga cakmie dida, nah pe kiak kedidung cum mie hangdeu hekwaki leune ga bamdi. Pecai kideu ga heleuh leune pe nsiu kang gade mpetdi nah cikade penui tetdi.

13 Tinggim ruine leune tanglet kedi bang dega kemtak ngaulu,

nah hegung cide ga makaune leune pe kiakdung ga gwang di.

14 Ainzwa teikedi kedanemene dui kebam ga lungyi cuh liede tsingbang hutube nzwa gai lakta, nah tsingbang gede dui kebam ga ci kenzwa hu ge lungh gailak. Pelane de ketsai dau zie, kideu kangga, minadung kakga, kideu kecok ga nghung kedime de nzang eh. 15 RAMPAUBE Tinggwang ainzwa ranggai: Cedar Sheol ga kauzeu kedi benai Ih kehap kideu gage kaizie. Ih dui kecok rwakdung hekap di, nah jaaidi dui de kam di. Ih dui kedi de kam di, nah Ih Lebanon lamlwatudung dage kehap teugwang gai. Cine cide ziemne hegung ga tsingbangdung leune hei eh hapdi. 16 Ih penuide teungkau kegai kwa dene heleuhdung ngngi nah mbeu di, Ih penuide Sheol ga hekwaki ga kelame kakgage kelien kegaidau. Eden ga tsingbangdung kideu henatu ga lungh kebamdung de Ih teucuh dailu. Aidungde Lebanon ga tsingbang kakde yitube; dui sak kebam tsingbangdung. 17 Kedanemene cidungde de ngngwa eh Sheol ga cakmie di, kingtie ne teitset kedime da. Aidungde au pe kengking ba, pe kensiu bam kangga lungh kebam heleuhdung. 18 Eden ga kebam tsingbang daidung de n kemdu nah n kedi de keda lu kera bamno? Kedanemene Eden ga tsingbangdung de nzang eh peu ncu hegeu rum kemakme kakga kideu henatu deu gage teungkau dizie; kingtie le teitset kedime de nang ngngwa lungh dizie.’

Aide Pharaoh nah pe mina leune, aide RAMPAUBE ne ndugai."