1 "Tinggwang adage rang eh, Mina Nabo, nkatei n ziemne itatsu ge keulu nah ndwa gage kailu. Cipaucai cika ge Jerusalem namdi rehi rietlu. 2 Pecai cide gwaketang kerane, kirie kwa twagwalu iciu eh mige de pak gailak kerane. Ramzeukidung teilu, delwe namdi cide gwaketang kerane meurünseu peu miedung le cide tei twagwalu. 3 Cipaucai n ziemne hegeu kwak ge keulu nah cide namdibe nnai kak ga herie ge nzwa tei ncuh lu nah namdi de nco lu, kedanemene cide gwaketang bam dida nah nang ne cide gwaketang bam dida. Aide Israelme kelakdung ziemne ma rehi ge zie. 4 Cipaucai, n hile zeulu nah Israelme kelak maudung nkatei nreu gage kailu; nang penui maudung pung zie nang tingbazie daikie ge Israelme kelak ziemne zip kedi kiee ge. 5 Ih akatei ne ncu heta aide peu la, mmi ramsangne langnai ge penui mau de ziemne keherei zie: tingbazie 390! Ainzwa eh, nang Israelme kelak maudung pung zie. 6 Nang aipau tingbaziedung de cang kedi dau, Cipaucai pia pekena be ziemne zetle zeu dailu, kedanemene nang Judahme kelakdung mau ziemne zie riakdai. Mmi ge ziemne tingnai gege eh Ih heta aide ncu peula. 7 N zu Jerusalem ncwa kebam gage kailu, n bazum ha mene caihasam ranggai lu. 8 Kedanemene ainie! Ih ncu baang nzeu dizie ciu de nang ket lam de keda le ge nreu gai melu kerane ncu twagwa kecu tingbaziedung cang lu kemaktane. 9 Nkatei n ziemne wheat, barley, reteipi, lentils, hetui, nah spelt; mabung ket gage kailu nah nkatei n ziemne tangkudung teilu nang (nlam) bie zeu bam kera tingbazie rehi gage. Nang tingbazie 390 ge ziemne cide tyei zie. 10 Nang taktyei tyei kera cide perüt ria gade zie, rangkanggeu ngkai ge zie tingnai ge ziemne, nah nang cide tingba ramsang peting rietlü tyei zie. 11 Cipaucai nang dui sak zie, hin herok* ge mdet mpet, nah nang peting riet pwa kebam ting ga sak zie. 12 Nang barley tangku nzwa tyei zie, dede nang mina teu teicang kelu be le tangku ru zie mina kengau gade!" 13 Kedanemene RAMPAUBE ranggai, "Aide pekie Israelme tangku tyei kecu de mci ma, cika heleuhdung kakga Ih penuide langgi dizie." 14 Dede Ih rang, "Laklei, RAMPAUBO Tinggwang! Ih madaude acu tei hera di ma! Ih madau de tsai kedi be tyei ma mede makaune ne tei tset kedibe, a rehang tingdau gade cu kecang, nah kemau gu hetei madaude a mui ga lüt ma!"✝ 15 Cine pa ada rang eh, "Pielo! Ih ncu hetum teu ha beu da mina teu mene ciu eh nang cipau reu gage tangku teilu kerane." 16 Pa a dage rang si, "Mina Nabo! Ainie! Ih tangku tuitie tei pang gaila Jerusalem ga, nah cika mina dung tyei kebam taktyei nah sak kebam dui de mdet kempet dau helung keherei dizie nah mbeu dizie. 17 Kedanemene penui ziemne tangku nah dui cam dizie, mina keheibe de pe sinabe de ngau nghet dizie nah penui kesiadung ziemne ngkap nggah dizie."