1 Pecai RAMPAUBE sam a da gwang eh ranggai, 2 "Mina nabo, Ammonme de mmau eh pielu nah penuide caihasam rang mmaulu. 3 Ammonme dage ranglu, ‘RAMPAUBE Tinggwang sam kingnei lu. RAMPAUBE Tinggwang aide rangla: Kedanemene nang, "Tei dau da!" de eh ranggai, a kerecaki tei hera kedidau, nah Israelme deu tei mrwa kedidau, nah Judahme de langgi kedidau, 4 ciziemne, ainie, Ih ncu naimiak petle kebam minadung de ncu peu dizie penui mabam ge nzwa. Penui nang kebam gade ramzeuki tei luzie nah nnui kakga penui paikidung tei cuh luzie. Penui ngu matsi tyei zie nah ngu tungdui sak zie. 5 Ih Rabbah de utdung ziemne cehei luh ge tei dizie nah Ammonme de kauhau ziemne heluh ge. Iciulude Ih RAMPAUBE lie kecu nang cilu zie. 6 Kedanemene RAMPAUBE Tinggwang aide ranggai: Nang n ba bapeu nah n pi piceu dida, nah Israel deu de ngkau zu eh n sui yi dida. 7 Cine, ainie! Ih ncu a ba le dap zie nah heleuhdung de tuikelu nia nzwa peu dizie. Ih ncu minadung dade keuntsam dizie nah deudidung kakgade ncu tei nggah dizie! Ih ncu teingkap dizie, nah Ih RAMPAUBE lie kecu nang cilu zie.’

8 RAMPAUBE Tinggwang aide ranggai, ‘Kedanemene Moab nah Seir aide ranggai, "Ainie! Judah au heleuh kedadung nzwa da." 9 Cine, ainie! Ih Moab langkiedung de ngkei gai zie, pe namdidung deurai gade ndeu eh, Beth Jeshimoth, Baal meon, nah Kiriathaim gu hezukeyi de, 10 naimiak kepetle bie ga minadung Ammon minadung de ncau kelame dage. Ih penuide mabam ge nzwa peu dizie iciu eh heleuhdung kakgade Ammonme de nsungta dizie. 11 Cine Ih Moabme tu tiak zie, nah penui Ih RAMPAUBE lie kecu cilu zie.’

12 RAMPAUBE Tinggwang aide ranggai, ‘Judahme kiga de Edom pekum peei luda nah cide teikegai ne kemau tei dida. 13 Ciziemne, RAMPAUBE Tinggwang aide ranggai: Ih a ba le Edom de saja peu zie nah mina pelane de nah cika kebam makaune de ngkap dizie. Ih penuide ngkap dizie, mina lungh kemak heni ge tei dizie, Teman gade Dedan ga kecang. Penui kingtie gade kau dizie. 14 Israel a minadung ba gade Ih Edom dade a kum keuzie, nah a rata nah a lunghop rehi gade penui Edom dage tei zie, nah penui Ih hekum peei kelade cilu zie, aide RAMPAUBE Tinggwang ne ndugai.’

15 RAMPAUBE Tinggwang aide ranggai, ‘Philistinme zai siasüt eh pekum peeilu da nah penui kakgade penui Judah de teingkau kera teidai dai. 16 Cine aide RAMPAUBE Tinggwang rang kebeu deda: Ainie! Philistinme de Ih ncau eh a ba miecang zie, nah Kerethme de danggi dizie nah jaaidi kungga bang kebamme de ngkap dizie. 17 Kedanemene Ih a ratasüt kecu saja le pwa penui dade hekum peei zie, iciu eh penui Ih RAMPAUBE lie kecu cilu zie, Ih penui dade a kum peei kecudau.