1 Anuide lang gikedi mmi hena eh keimengei bekei ziangrei benai, Israel muiteumedung RAMPAUBE lungning keteu zie lie a da gwanglu delwe a dwaga ntumlu. 2 Ge RAMPAUBE sam a da gwang eh, ranggai 3 "Mina Nabo, Israel muiteumedung dage rang ndu beulo nah penui dage rang beulo, ‘Aide RAMPAUBE Tinggwang ne rangla: Nnui acu keteu zie lie eh gwang lani? Ih ringla kela nzwa, acu nnui ne keteu lak!, aide RAMPAUBE Tinggwang ndugai.’ 4 Nang penui tutiak zie ni? Nang mmau zieni, mina nabo? Peu penuide penui paume kemneu ta tei kedidungde cilu. 5 Penui dage rang beulo, ‘RAMPAUBE Tinggwang aide rangla: Ih Israel de kedetkelu benai gade nah Ih a ba hwalwe Jacob leuhme dage a sampet gai, nah Egyptme deu gade Ih akatei acu penuide peu ci gai, Ih a ba hwalwe penui dage sampet kecu dau. Ih ranggai, "Ih au RAMPAUBE nnui Tinggwang", 6 cipau benai Ih a ba hwalwe penui dage sampet ge kaibeu. Cide Ih penuide Egypt deu gade Ih penui ziemne kedet teune kelu hangdeu gage ngngwa mpetlu kera. Cika heliadui nah tungdui lwa bam; cide hangdeu pelane kakgade hezuyi tube deu ge. 7 Ih penuide rangbeu dida, peu mige ge kecude kemneu niadung nah Egyptme mamiedung de pe dwa gade kelien gi dilu. Nkatei ncu tei hera diso; Ih RAMPAUBE n Tinggwang." 8 Dede penui acu mlai di nah a kwa kingnei meidi. Migede kemneu niadung penui dwa gade kelien gidi ma mede penui Egyptme miedung gidi ma, cine Ih a rata penui dage pwa ruigai zie penui kakga Egyptme deu sum gage, a ratasüt kecu gade mnunglu kerane. 9 Ih a zi ziemne teigai iciu eh penui ngngwa lungh kebam heleuhdung dwa gade heradi melu kerane. Ih akatei acu peu penuide cigai, penui dwa gade, Egyptme deu gade ngngwa mpet kebeu gade.

10 Cine Ih penuide Egyptme deu gade lang mpetdi delwe penuide hetaideu ga ngngwa gwanglu. 11 Pecai Ih penuide a ajadung kaibeu nah a zaidung peu penuide cigai, mige cidungde pa mzai lucai ring luzie. 12 Ih penuide a Sabbathdung peu, Ih nah penui kakga marengei ge tei eh, penuide peu Ih RAMPAUBE penuide tei mci beu kelabe lie kecu cilu kerane. 13 Dede Israel leuhme hetaideu gade acu mlaidi. Penui a aja ga tet tadi; meliene, a zaidung de gileu di, mige pa cidungde mzai lucai keringme ge teilu kera de. Penui agu Sabbath de teihera cangsiakdi, cine Ih rang eh, Ih a rata penui reu gage ruigai zie, hetaideu gade penuide ngkap di kera ziemne. 14 Dede Ih a zi ziemne teigai iciu eh Ih Egypt gade penuide ngngwa kempet kengau heleuhdung dwa gade tei heradi melu kerane. 15 Cine Ih akatei a ba hwacuh eh hetaideu gade penui dage sampet ge kaibeu Ih penuide ha zie lie kebam deu dega ngngwa gwang tadi kerane, hangdeu cide ga tungdui nah heliadui lwa, cide hangdeu pelane kakgade hezuyitu deu ge. 16 Ih sampet aide teigai kedanemene penui a zaidung de gikah nah Ih hezai kai kebeu de ga tetta kedine, nah penui Sabbath de tei heradi kedine, kedanemene penui mlungdung penui gu mamiedung da la kedine. 17 Dede penuide ngkap di kera gade ngaunggia di, nah Ih penuide hetaideu gade ngkap tadi.

18 Ih penui name de hetaideu gade rangbeu, "Nnui paume teikela zai ga tet so, mede penui zaidung kainzeu so, mede penui gu mamiedung dele nnuide teihera diso. 19 Ih RAMPAUBE nnui Tinggwang, ajadung; nah azaidung mzailu. 20 Sabbathdung teu mcilu iciu lude cidene nnui nah a kakga marehi ge bam luzie, iciu de nnui ci luzie Ih RAMPAUBE nnui Tinggwang lie kecu." 21 Dede penui napeime nah napuime de acu mlaidi. Penui ajadung mede a zaidung ga tetla ma, migade mige cidungde mzailu cai ring luzie. Penui Sabbathdung tei heradi, cine Ih a rata hetaideu gade penui reuga ge ruigai kera cetlu, a ratasüt kecu gade mnunglu kerane. 22 Dede Ih a ba teu caililu nah cide a zi ziemne teigai, iciu eh Ih Israelme de ngngwa kempet kengau heleuhdung dwa gade ngamdi melu kerane. 23 Ih a ba hwacu penuide hetaideu gade sampet ge teilu, Ih penuide heleuhdung kakga ge nah hangdeu pelane kakga ge tei zangra gai dizie. 24 Ih aide teikera cetlu kedanemene penui ajadung mzai luta kedine, nah penui azaidung de mlaidi delwe Sabbathdung teihera kedine. Penui miakpiede penui paume reca kela miedung de regui kelane. 25 Pecai Ih penuide azaidung yi kemakpe, nah ajadung kering penuide teugwang beula kemakbe peu gai. 26 Penui mapeudung ziemne penui mci tadi delie Ih penuide rang ndu gai, penui neraibe de teu ratak tei nah penuide peu mi gade tet kahgwang, iciu eh Ih mi ngau kehing keherei penui da kaigai eh penuide peu Ih RAMPAUBE lie kecu cilu kerane.

27 Ciziemne, mina nabo, Israelme dage rang beulo, ‘RAMPAUBE Tinggwang aide rangla: Aide gade de nnui paumedung acu kiidi penui a dade masanglu ta kedi dau. 28 Ih penuide peu zie lie sampet kebeu deu ga, Ih penuide ngngwa gwang kelu dau, penui kideutu kehu keheibe nah tsingbang penei kepui kebam ngau luge, penui ratak cidung dage tei di, nah cikage penui perim kehengui ru kegai nah penui zau recadung rui kegai de ziemne penui reca de le a rata teidi. 29 Pecai Ih penuide ranggai, "Heni kehu nnui ratak pwagwang kebam heni aide daino?" Cine heni cide de Bamah lie henai kecang de qudi.’

30 Ciziemne Israelme dage rang beulo, ‘RAMPAUBE Tinggwang aide rangla: Daitei nnui paume zaidung mzui eh nnui katei nnuide tei hera la no? Cine daitei nnui helipuidung nzwa lano, ma kengkaudung peei eh. 31 Nnui reca pwapeu kegai dau, nnui napeidung de peu mi gage ratakdung kegwang dau, henai kecang nnui katei nnui mamiedung de le nnuide teiheradi bam. Cine daitei Ih nnuide peu acu peei lai, Israelmedung? Ih ringkela nzwa, aide RAMPAUBE Tinggwang ndugai, Ih nnuide peu acu peei lakta. 32 Nnui kecet nnui lungga kebam de madauge de tei gailak. Nnui rangla, "Heleuh kedadung nzwa lungh go de eh, nah heleuhdung kedale deudung ga lungh kelame tsingbang nah tangtsu de reca kela nzwa".

33 Ih ringkela nzwa, aide RAMPAUBE Tinggwang ndugai, Ih nnui reu dizie a kengking teu eh, a ba hwacuh lwe, nah nnui reu gage a rata ruigai zie.✝ 34 Ih nnui de ngngwa mpet luzie, mina kedame dade nah nnui de keu hekwa luzie deudi ketsamtsam kakga lungh zangra kela gade. Aide Ih tei gai zie kengking teu eh delwe a rata de ruigai zie. 35 Pecai Ih nnuide hetaideu ga heleuhdung dage ngngwa gwang gai beu zie, nah cikade Ih nnuide kezumok eh nnui tutiak zie. 36 Ih nnui paume de Egyptme deu hetaideu gade tiak kecu nzwa, nnuide de tiak zie, aide Rampaube RAMPAUBE mdugai. 37 Ih nnuide a tsingria kang gade peu tet zie, nah Ih nnuide peu samkak kelu zaidung de peu mzai luzie. 38 Ih nnui kakgade acu mcau nah mlai kecume de keugi di zie. Ih penui de gwagi di zie sangme ge tei eh lungh kebam deu gade, dede penui Israel deu ga nlüt lak. Ciciu de nnui Ih Rampaube lie kecu ci luzie. 39 Cine nnui Israelmedung dage RAMPAUBE Tinggwang aide rangla: nnui gu mamiedung da gwang cu, cidung dede reca cu, nnui a sam kingnei gailak di cai, dede nnui a zi kemci de teihera sita dilu nnui mapeu nah nnui gu mamiedung dele.

40 Kedanemene a kemci lamlwatu gade, Israel lamlwatu kehu gade, aide RAMPAUBE Tinggwang ndugai, Israelme pelane cipau deu gade acu reca zie. Ih a suiyi eh nnui ratakdung regui bam zie cikade, nah bui kelu nnui gu matsi raitube suiyi reca nah kemci niadung pelane de si zie. 41 Ih nnuide perim kehengui nzwa eh luu luzie, Ih nnuide minadung dade ngngwa mpetlu de nah deudidung ga zangrariep kela gade nnuide hekwa kelu dau. Nah acu nnui kakgage Ih mci kecude lia zie peu heleuhdung de ngau kerane.✝ 42 Pecai Ih nnuide Israel deu ga ngngwa gwangkelu dau, Ih nnui paumedung de peu zie lie aba hwa lwe sampet kebeu deu ga de, nnui ci luzie Ih RAMPAUBE lie kecu. 43 Cikade nnui nnui zai reli nsung luzie nah nnuikatei nnuide teihera kedi nnui tadung de, nah nnuikatei nnui miakngau gade nnui kemau ta teikedi pelane ziemne nnui katei nnuide ngkau dizie. 44 Cine nnui cilu zie Ih RAMPAUBE lie kecu, Ih nnui dage aide a zi ziemne tei kegai dau, nah nnui kemau nah kesia keteidung ziemne ma, Israelmedung, aide RAMPAUBE Tinggwang ndugai.

45 Pecai RAMPAUBE sam ada gwang eh ranggai. 46 "Mina nabo, n zu nreu tingpile deudung le pie gailo, nah tingpile bie de rang mmau gailo; Negev gung dage caiha rang mmau gailo. 47 Negev gung dage ranglo, ‘Aide RAMPAUBE rang ndu gaila, aide RAMPAUBE Tinggwang rangla: Pielo, Ih nnui kak gage mi twagai zie. Cide nnui kakgade tsingbang ketsai nah kendiak pelane ru dizie, miheu cide tei mmüt gai lak; tingpile de tingpeule kecang ma pelane rudi zie. 48 Pecai Ih mi twa kegai dau mina nah makaune pelane Ih RAMPAUBE lie kecu ngau luzie, nah cide tei mmüt gai lak.’" 49 Pecai Ih rangdi, "O! RAMPAUBE Tinggwang, penui a ha rangla, ‘Pa samregwa rang kela kauge meni?’"