1 Anuide langgi kedi mmi kereiehkena bekum, kei kereiekena bekei, hekei raitu dau, cidau RAMPAUBE sam a da gwang eh ranggai, 2 "Mina nabo, Egypt ga hegwangpei Pharaoh ziemne suisiet lia gailo; pe dage rang beulo, ‘Heleuhdung kakga nang au hingho keceuna ge nzwa,

dede nang au jaaididung ga neidi nzwa; nang dui de tei nswak cuh gai,

n pi le dui de tei mlai gai nah dui de tei hera di. 3 RAMPAUBE ainzwa ranggai:

mina kekiee ngkwa kebam dau Ih helang pwa n reu gage samgai zie, nah penui agu lang gage ncu teucuh luzie.

4 Ih ncu hangdeu gage gi gai beuzie. Ih luh gage ncu kelien gai dizie

nah tinggim ruinedung n reu ga gwang bam dizie; kideu ga mzeu kela makaunedung ncu tyei eh nggei luzie.

5 Ih n pumteih lamlwatudung gage kaigai zie, nah chabakdung ga pekau ne tyei eh rim kebam n paau le kai pui dizie.

6 Cidau Ih nnui jai de pwa lamlwatudung gage ruigai zie,

nah reuceudung singdung n jai le pui dizie.

7 Pecai Ih ncu ngkap kedidau, Ih tinggimdung ha dizie nah hegidung tei mui dizie;

Ih tingnaimiak hemwadung le ha dizie, nah hekei pe kebaa gah dizie.*

8 Tinggimdung ga baa mhei kebam leune Ih cidungde n dade tei mui dizie,

nah Ih n deu gage kemui kaigai zie, aide RAMPAUBE ne ndugai. 9 Nang cikemak deudung ga minadung da Ih kengngi kaigai zie, heleuhdung kakgade Ih ncu tei ngkap kegaidau, nang cikemak heleuhdung kakga. 10 N ziemne Ih mina kekiee de keheu kecu peugai zie; n ziemne penui hegwangmedung de keheu di eh ngngi nah mbeu dizie Ih a kiengtie pwalu eh kezip kegaidau. Kehei dau de mina leune n ziemne mbeu dizie, nang kau kedi tingba benai.

11 Kedanemene RAMPAUBE ainzwa ranggai: Babylon ga hegwangpei kiengtie ncu renia zie.

12 Ih n maadibe de reugwame kingtie le ngkap kecu teugwang gai zie, reugwame leune heleuh be da kengngi bam.

Reugwamedung Egypt kemdu de tei nggah dizie nah pe maadi pelane de ngkap dizie.

13 Ih kauruine leune de dui kekiee ge kebam tai gade ngkap dizie;

mina pi dui deu mlai si lakta, nah makaune pidung dele dui deu mlai si lakta.

14 Pecai Ih penui duidung de peu mtak ziune dizie nah penui reukidung maca dui nzwa peu lwa dizie,

aide RAMPAUBE Tinggwang ne ndugai.

15 Ih Egypt de gikedi deu ge tei kedi dau, pui nliem kebam de keugi kedi dau,

cide ga lungh kebamme leune de Ih gwaketang kegai dau, Ih RAMPAUBE lie kecu penui ci luzie.

16 Suisiet kehap bam dizie; heleuhbe napuimedung pe ziemne hap zie; Egypt ziemne penui hap zie,

maadi leune ziemne penui hap zie, aide RAMPAUBE Tinggwang ne ndugai.’"

17 Cipaucai mmi kereiehkena bekum, hekei ziangrei mengei benai, RAMPAUBE sam a da gwang eh ranggai,

18 "Mina nabo, Egypt ga maadidung ziemne haplu nah penuide tei ngkau dilu,

penuide nah kendu leuh napuimedung de, hangdeu henatu ga hekwaki kecok gage kai kedime dage ngngwa gai dilu.

19 ‘Nang kedamedung swa de hezu yiki kesang ni? Hegeurum kemakme da gwang eh penui maa ga bam ncütlu.’

20 Kingtie ne teitset kedimedung kakga penui kaugai dizie. Kingtie pwa mpetlu da! Pecu kingtie kang gage kai dida; penui pecu nah pe maadi be de tui teu dizie.

21 Sheol ga reugwame kakgade ngkiengtube ne Egypt ha nah pe maa ha rang ndu zie,

‘Penui aika nghung luda! Penui hegeu rum kemakme de ngngwa bam dizie, kingtie gade tsai kedime de ngngwa bam dizie.’

22 Assyria penui reugwa maadi de ngngwa cika bam. Penui raudung ne penuide twagwa bam;

penui pelane de kingtie le teitsetdi.

23 Hekwaki kungga penui raudung mtei pwabam, pe maame pecu cika ngngwa bam.

Kingtie gade tsai kedimedung de, penui rau ne twagwa pung bam,

cidungde ring kebamme deuga kehing teugwang kegaime.

24 Elam cide ga pe maadi de ngngwa bam. Penui raune penuide twagwa pung bam; penui pelane de teitset dida.

Kiengtie ne penuide ngkap kedime, hegeu rum kemakme hangdeu henatu be set ga mie kedime,

keringme deu ga kehebwak teugwang kegaime nah penui ta ziemne hengam kepungme, hekwaki ga lüt kedime de ngngwa ncüt eh lüt dida.

25 Penui Elam nah pe maadibe ziemne tsai kedime kakga zeu ge mtei pwabam; penui rau ne penuide twagwa pung bam.

Penui pelane hegeu rum kemakme, penuide kingtie ne kui dida, kedanemene penui keringme deu ga kehebwak teugwang kegaine.

Penui tei kegai nzwa hengam ngau luda, tsai di eh hekwa kiga lüt kedime de ngngwa ncüt dida. Teitset kedime kakga Elam de ncütla.

26 Meshech, Tubal, nah pe reugwame pelane cika bam! Penui rau ne penuide twagwa pung bam.

Penui hegeu rum kemakme ciak, kingtie ne penuide teitsetdi, kedanemene penui keringme deu ga kehebwak teugwang kegaine.

27 Penui hegeurum kemak reugwa tsaikedime Sheol ga mie kedime de ngngwa ncüt ma

penui hereu nia leune de si eh, nah penui kingtie penui peu kangga kailu eh kebamme

nah penui kesiadung penui radung reu gage kailu eh kebamme. Kedanemene penui au keringme deuga kengngi teugwang gai kela reugwame kecune.

28 Cine nang, Egypt, hegeurum kemakme kakga kauzeu dizie! Kingtie ne ngkap kedime kakga nang de bam dizie.

29 Edom pe hegwangme nah muiteume pelane de ngngwa eh cika bam. Penui ngking liede penuide de kingtie ne teitset kedime dage kai ncütdi. Penui hekwaki ga lüt kedime de, hegeurum kemakme de ngngwa ncütla. 30 Tingtünle hegwangnapei cika bam, penui pelane nah Sidonme pelane kingtie le ngkap kedime de ngngwa eh. Penui ngkiengsüt nah kedame penuide hingla, dede cu au penui hengam teibam dida, kingtie gade tsai kedime nzwa eh penui hegeu rum ma. Penui katei penui hengam pungbam, hekwaki ga lüt kedime de ngngwa eh.

31 Pharaoh pe mina maadi ngkap kedi de pie eh pelung sia kebam gade pa nah pe reugwame penui lung relui dai luzie, aide RAMPAUBE ne ndugai. 32 Ih pecu teu eh keringme deu ga kehebwak teugwang gai, dede hegeu rum kemakme kiengtie ne ngkap kedime kakgage Pharaoh nah pe mina maadi de kai dizie, aide RAMPAUBE Tinggwang ne ndugai.