1 RAMPAUBE sam a da gwang eh ranggai, 2 "Tsaidikela mina nabo, mipui hangna bam, penai puige napui.* 3 Penai relei tingdau Egypt gade helipui tei eh gwang. Penai cikade helipui nzwa hetah tei. Penai tung kerak nah penai kemci tungtün de cikade hekip. 4 Penai zi Oholah, kecingbe pui, nah Oholibah, henabe pui. Penai de agu teilu nah hena mipeina nah mipuina dung lungh beu. Penai zi pekie becai aide: Ohola pekie Samaria, nah Oholibah pekie Jerusalem.

5 Dede Oholah agu lie bam de helipui nzwa heta tei di; pa pe mraimedung de hengim di, ngkieng kebam Assyriame de, 6 deuceudime penui nia kemzai teu kelame, nah pe kangga kedime, penui ngking nah rehang hezu keyimedung, penui pelane hekwen keteume. 7 Cine Assyriame yitume dade helipui ge tei eh pekatei pecu penui dage peudi, nah penui gu mamiedung de reca nah pa hengim kelame leune de ngngwa pekatei pecu teihera di. 8 Kedanemene pa Egypt gade helipui tei kela zai de pütti ma, cidau penui pa relei cuhrwa dau pecu ngngwa henauhepei zai tei, penui pe kemci tung herak nah pe reu gage penui hengim de ruigai. 9 Cine Ih pecu Assyriame pe mraipeime pa hengim kelamedung ba gage kaibeu di. 10 Penui pe paini radi, pe napeime nah pe napuime de tuilu, kingtie le pecu teitsetti, nah keda mipuidung dade pa au tei kesia pui ge di, cine penui pecu saja peu.

11 Pecai sinapui Oholibah aide ngau, dede pa au hengim kidi nah pe sinapui swade pa au helipui ta tei kiee kidi. 12 Pa Assyriame de hengim di, penui deuceudime nah kengkieng teu kebammedung penui niateu keyi teu kelame de, hekwendung teu kelame de. Penui pelane ngking, nah hezu keyime. 13 Pa pekatei pecu teihera kedi Ih ngau. Penai sina hangnana de nzwakap. 14 Nah pa pe helipui ta tei ngkiee di. Pa tangdeu gage mina mie tei kenzeu ngau, Chaldeame kedime mie kegie le keniak kelu, 15 penui kiadung ga kiakang teulu, penui peu gade peuzui pai kezumie. Penui pelane kedime hekwen teu kela maa ge rehi nzwa ngau, Babylonme napeime nzwa, penui lungh kegwang deu au Chaldea. 16 Pa penuide ngau ge ngau, pa penuide hengim di, cine pa samgwame de Chaldea gage langgai. 17 Pecai Babylonme peda gwang pe kemmha zeulie ga, nah penui pecu tei hera di. Pa tei kegai dene pecu teihera di, cine pa penuide ngkau süt eh nreu tetti.

18 Pa pepum paula nah helipui tah keteidung pwalia kegai dau,

Ih pe dade nreu tetdi, Ih pe sinapui de ngkau eh nreutet kedi nzwa.

19 Iciu eh pa Egypt deu gade helipui tei kela perelei tingdung de nsunggwang eh

pa ndaa swade helipui tah tei mtei kidi.

20 Cine pa pe mraimedung de hengim di,

penui kengkiem teih gada gu kenzwame de, nah hekwenseudung kemmha zai kepui tei bam kelame kenzwame de hengim di.

21 Nang peu Egyptmedung de n tungtün hekip kecu gade nah n tung herak kecu gade n relei tingdau hengam tah tei di.

22 Cine Oholibah, RAMPAUBE Tinggwang aide rangla, ‘Ainie! Ih n nraipeime de ncu peu ncau zie.

Nang nreutet kedimedung de Ih penuide ngngwa gwang ncu peu keheileu gade ncau zie:

23 Babylonme nah Chaldeanme pelane, Pekod, Shoa, nah Koa, nah penuide si eh Assyriame pelane,

kengkiengme, rehang hezu keyime, deuceudime nah reugwa kedime, penui pelane kedime nah kenlangme, penui pelane hekwen keteume kap.

24 Penui hereu reunet teu eh nnuide ncau zie, nah hekwen bagidung nah mania recai kebeu bagidung, nah mina maa kedi ge si eh.

Penui hegeu kedi keceu nah peurwadung mteilu nah nnuide twagwalu eh ncau zie.

Ih penuide peting keyi peu zie nnuide saja peu kera, nah penui penui tah zaidung le nnuide saja zie.

25 Kedanemene Ih a riaksiet rata nnui dage kaigai zie, nah penui lunghop teu eh nnuide ngngwa hetah tei zie. Penui nnui ngkiedung nah nnui kwendung dang mpet dizie, nah nnui ringkebamme de kingtie le bitset dizie. Penui nnui napeime nah napuime de ngngwa tet dizie, nah nnui ringkebamme de mi gage ngkap dizie. 26 Penui nnui painidung hiet dizie nah nnui gu hetei hetadung keutet dizie. 27 Cine Ih n dade n kemmha zaidung keugi dizie nah Egypt deu gade nang helipui tah tei kelade. Nang n miak ngang cuh penuide regui eh pie lakta, nah nang Egypt de madaude nsung dai lakta.’ 28 Kedanemene RAMPAUBE Tinggwang aide rangla, ‘Ainie! Ih ncu nang ngkau kelame ba gage peu dizie, nang nreutet kedimedung ba gage kai dizie. 29 Penui ncu ngkau eh ngngwa hetah tei zie; penui ngu mabam leune keuteu dizie nah ncu paula eh gi dizie, nah nang n paula de mide liagai zie, nang helipui tei kela nah mmha kela dau nzwa. 30 Nang helipui ge tei kela nzwa ma aidungde n dage teigai zie, heleuhdung de hengim eh nang penui mamiedung gade ncu tei heradi. 31 Nang n sinapui lampui ga tetla dida, cine Ih pe saja piak de n ba gage kai dizie’.

32 RAMPAUBE Tinggwang aide rangla, ‘Nang n sinapui piak kedi nah kecok de pwa sak zie.

Nang mi nuineu nah ncu kekii pui ge tei dizie, hepiak aide au puibam.

33 N da kemie nah lungrei le pui dizie,

kengngi nah kengkap piak de;

n sinapui Samaria piak de.

34 Nang cide sak luzie nah sak mrwa dizie; delwe nang cide teipang dizie nah n hekakrak cidungde le teurak zie.

Kedanemene Ih ndugai dida, aide RAMPAUBE Tinggwang ne ndugai.’ 35 Ciziemne, RAMPAUBE Tinggwang aide rannggai, ‘Nang acu nsungta kedine nah n cai gage acu kelien gai kedine, cinzwa nangde n kemmha de nah helipui tah de ziemne keherei ziehi pung zie.’"

36 RAMPAUBE a dage ranggai, "Mina nabo, nang Oholah nah Oholibah tutiak zie mi? Cine penaide penai kemneu tahdung de liagai beulu, 37 penai kemmha tah tei kedi ziemne, nah penai mide teitset kedi ziemne. Penai penui gu mamiedung de ngngwa kemmha tah tei dida, nah penai napeimedung de de penui gu mamiedung ziemne taktyeipok teibeu eh mi gage ratak teigai. 38 Pecaide penai mtakmene aide a da tei bam di: penai a kerecaki teihera di, nah cipau benai a Sabbath gileu di. 39 Penai name de pwa mamiedung de ratak teibeu eh tei ketset benai, cipau benai penai a kerecaki tei hera kerane gwang! Cine ainie! Ainzwa eh penai a ki sum gage teigai. 40 Nnai mina kemdei gade gwang kelame de qu kerane langgai, penuide qu kerane samgwame de langgai, cu ainie. Penui gwang luda, penui ziemne nnai dui pia, nnai miaksung keniaklu, nah hetei hetah teu eh nnai katei nnai de tei hezuyi gai. 41 Hezukeyi zeu ga penai bamlu nah mabam ge pedwa mtei pwa kebam gage a gu perim kehengui nah maca si eh kailu. 42 Iciu eh maadi kwa ge penai siu gwang; mina ketsamtsam leune ncüt eh hetaideu gade mina maa gede ngngwa nlüt lu, nah penui penai ba gage hetah kaibeu nah penai peu gage hezukeyi hegwang peurwa kaibeu.

43 Pecai kemmha ta teisüt eh leu mie kela pui ha Ih ranggai, ‘Cu au penui penai dage kemmha ta tei zie da, nah penai penui dage.’ 44 Penui pe da mie, mina helipui da mie kecu nzwa. Ainzwa eh mipui kemmha Oholah nah Oholibah da penui gwang bam di. 45 Dede makesangme hetu tiak mpet zie nah penaide kemmhame lie eh saja peu zie, nah mide tei ketsetme de kepeu saja de teu penaide peulu, kedanemene penai au kemmhame nah penai badung ga hejai bam kedine. 46 Cine RAMPAUBE Tinggwang aide rangla: Ih hemaa ge ncuh luzie penaide ncau kerane nah penaide keheu nah penai gu niadung leune sütteu di kerane gi dizie. 47 Iciu eh cipau maa dene penaide tangtsudung le sam zie nah kingtiedung le penai de bikau dizie. Penui penai napeime nah napuime de gitset dizie nah penai kidung ru dizie. 48 Kedanemene Ih kideu gade kemmha tahdung de keugi dizie nah mipui leune de hezaikeyi ledeu beuzie iciu eh penui helipui tahdung nzwa tei dai di melu kerane. 49 Cine penui nnai kemmha zaireli de ziemne nnaide ncau zie. Nnai nnai gu mamiedung de ngngwa kemau tei kedi mau püt de pung zie, nah ainzwa kegai gade nnai Ih RAMPAUBE Tinggwang lie kecu cilu zie."