1 Cherubim peudung reu ga kebam tingkam ga Ih pie kegaidau, pe reu ga madung ge hegwangbam rehi kenzwa ge sapphire lie tei kelu ngau. 2 Ge RAMPAUBE langcimpaini teu kela mina be de resiu eh rang, "Cherubim kangga pe pitadung kakga lütlu, nah cherubim kakgade miceu heu kebam n ba kenana pwa puilu delwe cidungde Jerusalem namdibe reu gage teizang gailu." Ge Ih pie bam ge mina be de lütdi. 3 Minabe kelüt dau ki nzetle cherubim sapbam, nah kilungbung helungle hemwale puidi. 4 RAMPAUBE kendu cherubim gade cuhdi nah tangtsu kimuiki ga sap bamdi. Ki cide hemwale pui pungdi, nah kibungbe RAMPAUBE kendu keba le puidi. 5 Cherubim hesiu kwa kibung gwale kecang de siudi, Pa marang kegai dau Kengkieng Tinggwang kwa nzwa di. 6 Tinggwang mina langcimpaini teu kela minabe dage aja kai eh ranggai, "Cherubim kakga pepitadung kakgade mi keulu," Minabe tet lüt pepita taiga saplu. 7 Cherub ge cherubim kakgade peba hetwa pet mi gage kai cide au cherubim kakgade, nah cide pwa cuhlu eh langcimpaini teu kebaabe ba gage kaigai. Minabe cide keulwe tet caili mpetdi. 8 Cherubim hesiudung kang ga madung ge mina ba kenzwa ge Ih ngau.

9 Cine Ih piegai, nah ainie! Pita mdaidung cherubim taiga bam, pepita ge cherub ge taiga, nah pepitadung rehicai beryl tangtsu ge nzwa. 10 Penui rehi mdaidung au nzwa gapte ciak, pepita ge pita kedage de kecapreu kecu nzwa. 11 Penui nlai gai kecu dau, penui nreu mene lampui mdai gade mie lubui penui tet kela nzwa eh; dede pepeu dailam bie pie bam bi, penui cide caisui mie eh nreu caili dai mene. 12 Penui pum pelane, penui cailedung ncüt, penui badung, nah penui hesiudung, pemiak le kezui pung nah petadung pelane mdai ga pemiak si eh pui pung.✝ 13 Ih kingnei gai kecu, pepitadung qupwa, "Nrui." 14 Penui ketket kecu pezu mdai bam; pe zu raitube au cherub zu ge, pe kenabe zu au mina zu ge, pe kecumbe au hingho zu ge, nah pe mdai be zu au lingrie zu ge.✝

15 Ge cherubim, ring kela kaune aidungde Ih Kebar Kereuki gade, cuh kecu Ih ngau. 16 Keheidau de cherubim mlaigai ge, petadung penuide ngngwa tetti, nah keheidau de cherubim kideu gade cuhdi kerane pe hesiu nzang lu ge, petadung nreu di lama. Pepitadung cidungde taiga bamla. 17 Cherubim kesap tane, petadung de sap bamla, penui cuhgai kecu dau, petadung penuide ngngwa cuh dila, pepitadung ga kering makaune rabe kela ziemne.

18 Pecai RAMPAUBE kendu tangtsu kimuiki gade mpet lwe cherubim peureu ga sap bam dila. 19 Cherubim a dwa gade pe hesiudung nzang pet eh kideu gade cuhlwe tetpet kedi dau, delwe pepitadung petai gade cidungde de nsam eh tetla. Cidungde RAMPAUBE kerecaki kepetle kirie ga saplu, nah Israel Tinggwang kendu nreule de penui da gwanglu.

20 Ring kela makaune aidungde Israel Tinggwang kang gade Kebar Kereuki gade Ih ngau kecude lie, cine penui cherubim kecu Ih ci! 21 Penui ketket pezu mdai nah pe hesiu mdai bam, nah mina badung kesiakke pe hesiudung kangki gala, 22 nah penui zudung au Kebar Kereuki gade Ih mangdak kengau zudung de kesiakke, nah penui ketket kecu nzuizang eh pedwa le mlai gaidi.