1 Pecai Tinggwang sahbak kegai kwa Ih siu, nah rang eh, "Peu kekwamedung de namdi ga hanglu, hangge ge kecu pe ba ga ngkapdi kera reunet keulu." 2 Ge ainie! Mina hang herok kerecaki tingpeule kirie nreu le ncwa kebam lam de gwang, hangge ge kecu hereunet ramcau pe ba ga teu pwa eh. Cika mige penui kakga langcimpaini teu eh pe taiga laisiu keraume ge keraunia teu la. Cine penui hetageu recabam taiga gwang saplu.

3 Pecai Israel Tinggwang kendu tei kela cherubim dade cudi cikade tangtsu le ketei kimui kiga lütdi. Pa mina langcimpai keteu petai ga laisiu keraube keraunia teu kelabe de qugai. 4 RAMPAUBE pe dage ranggai, "Namdi kak gade kah gwanglu, Jerusalem kak gade, nah namdi be ga kemneutadung ketei ziemne helung keherei nah helung sia kebamme pelane sipie gage pegiak giak lu." 5 Pecai Rampaube kedame dage makerang Ih kesiu, "Pecai suimie cu namdi be ga delwe pe sipie ga giak kemakme de tei tsetdi. Nnui mige de de ngaunggia so, nah bang beu so 6 Kecingme de, rehangme de, releikemci, hename de mede mipuidung de liede. Penui pelane de teitset dilu! Dede pe sipie ga pegiak kepungme migede de tung so. A kerecaki gade pebang dwalu!" Cine penui kerecaki dwa ga muiteume de tei cuhdi. 7 Tinggwang penui dage ranggai, "Kerecaki de tei hera dilu, nah ketsai paau le kigu teipuidi. Mie cu!" Cine penui mie Jerusalem namdibe ga minadung de tei cet cudi. 8 Penui cika teitset kebam dau, Ih akatei rünnekebam ngaulu nah Ih hangdeu ga azu nkum mie lwe sahgai eh rang, "O, RAMPAUBE Tinggwang, nang n rata ruipwa Jerusalem gage kai eh Israel leuhme de bang pwa kebamme leune de ngkapdi zie ni?"

9 Tinggwang a dage rang eh, "Israel nah Judah kelak ga kemau kiee sütdi. Hangdeu be hejai le puipung bam dida nah namdi ga helung ketak le puipung bam dida, RAMPAUBE au hangdeu be nsungta dida, nah RAMPAUBE penuide ngau me delie rangla! 10 Cine Ih, penuide ngaunggia beu lak, nah penuide bang beu lak. Meliene penui tei kegai pelane Ih penui reu gage teu gwanggai beu zie." 11 Ainie! Mige langcimpaini teu eh laisiu keraunia teu kelabe de pe taigai cailigwang. Pa rang eh, "Nang a dage aja kai kebeu leune Ih teicang dida de eh paubeu."✝