1 Pecai RAMPAUBE sam a da gwang dai eh, ranggai, 2 "Cu nang, mina nabo, nang hetu tiak zie ni? Nang hejai namdi de tiak zie ni? Pe kemneu tah pelane pa tei kedi de pecu peu cilu. 3 Nang aide rangbi beulu, ‘RAMPAUBE Tinggwang aide rangla: Namdi aide pe mina kakga hejai teilwa kela ge kecune pe ting de gwang lubui; namdi cide mamiedung tei lwe pekatei pecu tei hera la. 4 Nang hejai tei lwa mpet kedine mau dida, nah nang mamie tei kegaidung dene hera dida. Nang n tingba teu gwang nna luda, nah n mmidung penli gwang cang lada. Cine Ih heleuhdung de peu ncu henui tei zie nah deudi pelane nuineu tei dizie. 5 Kenna nah kemdei ga kebam leune ncu henui tei zie, nang mcikemak namdi, kebwakswak eh kebam ncu mileune cibam.

6 Ainie! Israel peuketeume dung, pekatei pe kengkieng riep teu, hejai teilwa mpet gai kera n da gwang bam. 7 Penui puipeimedung de herüt peu tadi nnui kakgade, nah nnui kakgade penui sangme de tei keherei kecu tah tei di. Penui nnui kakgade nggianadung nah hemipuidung dage petau kemak zaidung tei di. 8 Nnui a kemci niadung de herüt peu tadi nah a Sabbathdung teihera di. 9 Kenret nah mide teikeherei kera minadung nnui kakga gwang bam dida hejai teilwa gai kerane, nah penui lamlwatudung gade matyei. Penui kesia tah tei eh nnui kakga bamla. 10 Nnui kakgade midungge penui pei paini teukemak ndulia. Nnui kakgade penui mcikemak puidung kemei tei penui makepung tingdau. 11 Mipeidung pe kidacaina nau de ngngwa kemneu tah keteime, nah mikangge pekatei pe napei nau de mcikemak hengam ta tei kegaime; pekatei pe tipui de tei hera di kelame, penui katei penui pei napuidung, aidungde pelane nnui kakga tei bam. 12 Mipei aidungde nnui kakga hejai teilwa mpet gai kerane hetauhenim luula nah nnui pekai keulu nah pemmi gade gieh sütlu, nah nnui nnui kidacaina de kengkieng teu eh tei rezam di, nah nnui acu nsung tadi, aide RAMPAUBE Tinggwang ne ndugai.

13 Pielo! Ih a bazum kai dida nnui petaukemak gade mahei kelume, nah nnui kak gade mide gitset kegaime dage. 14 Ih akatei nnui dage hetah tei kegai benai, nnui mlung petauga saplu buini, nnui badung hwacu kera kengkieng bam zieni? Ih, RAMPAUBE aide rang ndu gaila, nah Ih cide tei bizie. 15 Cine Ih nnuide heleuhdung kakgage teizang dizie nah hangdeudung gage tei zangra gai zie. Ih ainzwa eh nnui bata kesia de nnui dade tei nggah dizie. 16 Cinzwa eh nnui heleuhdung miakngau gade keherame ge dizie. Iciulude Ih RAMPAUBE lie kecu nnui cilu zie.’"

17 Pecai RAMPAUBE sam a da gwang ranggai, 18 "Mina nabo, Israelme a ziemne pekeyi gah da. Penui pelane nnui kakgade gikedi hetageu nah tin, nah hegeu nah lead nzwa dida. Penui n mimang ga rangkanggeu rulu eh hegeuteuh gikedi be nzwa dizie. 19 Cine RAMPAUBE Tinggwang aide rangla, ‘Kedanemene nnui pelane gikedi niadung nzwa di delu, cine, ainie! Ih nnuide Jerusalem sum gage hekwa gai di lauda. 20 Minadung rangkanggeu, hetageu, hegeu, lead, nah tin keu hekwa lu eh mimang gage rulwa kera kai kela nzwa, nah penui mi gui gai eh peu sui lu kerane, cinzwa Ih nnuide a rata nah a lunghop gage keu hekwa luzie, nah Ih nnuide cikage kai luzie nah nnuide peu sui dizie. 21 Ih nnuide hekwa luzie nah nnui reu gage a lunghop miheu müt gai zie, nah nnui cipau sum gade sui dizie. 22 Rangkanggeu mimang gade sui lu kela nzwa, nnui cikade sui dizie, nah nnui ci luzie, Ih RAMPAUBE a lunghop nnui reu gage rui gai kecude!’"

23 RAMPAUBE sam a da gwang eh ranggai, 24 "Mina nabo, penui dage rangbeulo, ‘Nnui au teimci mene kebam deu ge. Lunghop tingba benai cika tingrui lak! 25 Penui caihakecime ha kerang penui kakga bam, hingho mrung eh tui kelu kau de teu takcai bam kela nzwa. Penui mina teilung ngkap dila nah pemi kewhung mabam keu lula; penui penui kakga hemipui tei ngkiee dila! 26 Penui cingkume a zaidung gileu la, nah penui a kemci niadung teihera dila. Penui kemci niadung nah kehera niadung ci ntsam lama, nah penui kemcibe penai mcikemakbe pe kentsam ha ledeu lama. Penui miakdung a Sabbathdung gade mbai dila iciu eh Ih penui kakgade kehera be tei di kerane. 27 Penui kakgade kedimedung au heneudung makaune tuitset lü teurak takcai bam kela nzwa da. Penui masang mene gie lu kerane hejai teilwa nah mina teilung ngkap dila.✝ 28 Penui caihakecime cidungde de kehania le püt; penui kenret marengei ngaula nah gwangkela kenret caiha penui dage rangla. Penui RAMPAUBE Tinggwang rangkemakbe rang eh, "RAMPAUBE Tinggwang ne aide rangla," de eh rangla. 29 Cipau deuga kelungme migu süttyei nah miki raklüt rega eh mide kemneu tah tei, kegahme nah mi ngha teumai kesiame dade penui zai sia la, nah sangme de masang mene mneu la. 30 Cine Ih herie kwalu kebui penui dade mihangge de peei nah hangdeu kau kedi ga kwa eh a dwaga sap kerabe de peei, iciu eh Ih cide ngkap di melu kerane, dede Ih hangge de de ngau luma. 31 Cine Ih a rata penui reu gage rui gai zie da. Ih a rata miheule penuide ngkap dizie penui bata de ziemne, aide RAMPAUBE Tinggwang ne ndugai.’"