1 Anuide Babylonia gage langgi kedi mmi hekui bekum kei kerei bekei langkerei ne benai a da RAMPAUBE sam gwang eh, ranggai, 2 "Mina nabo, henai tingba gu hezi de nkatei raugai lu, henai tingba gapte, kedanemene henai tingba gapte Babylon gwangpei Jerusalem de gwaketang da. 3 Cine macisam ge ranggai lo samzai tei keraume dage, samregwa ge. Penui da ranggai, ‘RAMPAUBE Tinggwang aide rangla:

Makelang li de kailu. Cide kailu nah cikage dui rui gailu.

4 Heteihdung cika kai hekwalu, heteih keyi leune, pe pipum nah pe bakwak,

nah pera yitube dung le kaipui lu.

5 Hekaune hau gade yitube keulu nah peradung de pekang gage hekwalu.

Dui teilum pwa kebam ga keugwanglu nah peradung de cikage langlu.

6 Cine RAMPAUBE Tinggwang aide ranggai: Ainie keherei hejai namdibe da gwang zieda, makelang heli ge ga mtutyei bam nah mtutyei kebam cide gade mpet lak. Cide gade kangge cai kangge ge keulu, dede cide le dacak so. 7 Kedanemene pe jai au peda la kedine. Pa tsura kemdui gage kailu; pa rebui le cide hacim di kerane hangdeu gage ruigai ma,✝ 8 cine cide rata teisüt eh hekum peei kera teidi. Ih pe jai tangtsu kemdui gage kaigai iciu eh cide hacim di melu kerane. 9 Cine, RAMPAUBE Tinggwang aide ranggai: Ainie keherei hejai namdibe ga gwang zieda. Ih tsingpak dungde de tei nkiee beuzie. 10 Tsing keu hekwalu nah mi teiheu gai. Heteihkang lang hemipang lu nah teichidung gage kaincüt lu nah peradung de ru dilu. 11 Pecai kemrwa li cide miceudung reu gage kailu, hetageu de ru nah teilum kerane, iciu eh cide ga kebam keheradung de lwapak dizie, keheradung de gah dizie.’ 12 Pa mrisüt kegaide ziemne leu bam dida, dede peda keheradung de mi ne tei mpetdi luma. 13 Nang mci kemak ga n kengngam zaireli bam. Kedanemene Ih ncu tei mci kera teida dede iciuliede nang mcikemak gade ncu teimci luma, Ih n dage a rata de tei mnunglu kemaktane nang mcilu tadi zie da. 14 Ih, RAMPAUBE, cide ndulia dida, nah Ih cide tei zie. Ih cide gade nciep mede mtakti lak. N zairehidung gade, nah nang tei kegai tahdung gade, penui ncu tiak zie!, aide RAMPAUBE Tinggwang ne ndugai."

15 Pecai RAMPAUBE sam de a da gwang eh ranggai, 16 "Mina nabo! Ainie, Ih n dade n miak hengim kelade mateei ge le keugi dizie, dede nang n sui sia mede hap kerabe ma, nah n miakdui lwa kerabe ma. 17 Nang zingde n lung keherei bam maisia. Ketsaime ziemne tsaibai tah teiso. N peuzui n da kangteu lalu nah n picum n pidung gage kailu, dede n zu mai kezui diso mede mipei pe nau gah kedine pesui sia eh kebamme dade tangku tyei so." 18 Cine Ih tingcang minadung de resiu, nah a nau tinghegi tsaidi. Acu teilo kebeu aja de Ih tingcang dau teilu.

19 Minadung acu keteu eh, "Aidungde pekie dai bi nang anuide ranglia lak ni, nang tei kebamdung de?" 20 Cine Ih penui dage rang eh, "RAMPAUBE sam a da gwang eh ranggai, 21 ‘Israelme dage rangbeulo, RAMPAUBE Tinggwang aide ranggai: Ainie! Ih a kerecaki de teimsia dizie, nang hegie kela kengkieng de, n miak suiyi de, nah n rabe hengim kelade, nah n napeidung nah n napuidung nang püt kedi cipaume kiengtie gade kau dizie. 22 Ciu eh Ih tei kedi siakte nzwa eh nang tei zie: nang n zu mai kezui diso, mede mipei pesui sia kebamme gu tangku tyei lak! 23 Meliene, n peuzui n peu ga bam zie, nah n picum n pidung ga; nang n sui sialak mede hap lak, kedanemene n tah kesiadung gade nang suih tet dizie, nah hangge ge kecu pe sinabe ziemne pelung sia eh mra zie. 24 Cine Ezekiel nnui ziemne marengei ge zie, aide gwang kecudau pa mapelane tei kegai de nzwa eh nang de tei zie. Iciulude Ih RAMPAUBE Tinggwang lie kecu nang cilu zie.

25 "Dede nang, mina nabo, Ih penui kerecaki tuikelu benai, cide penui suiyi de, penui hegie, nah penui ngau eh hengim kelade, nah Ih penui napeidung nah napuidung de keuteudi kecudau, 26 cipau benai, kekap gade pak kelume ge n da gwang zie ncu hacidung peu kerane! 27 Cipau benai kekap gade pak kelume dage n mui ngkei gaizie nah nang marang zie, nang zingde bam si lak. Nang penui ziemne marengei ge zie iciu eh penui Ih RAMPAUBE lie kecu cilu zie."