1 RAMPAUBE sam a da gwang dai eh rang, 2 "Mina nabo, Israel ga caihakecime caihakecisam rang kelame de caihakecisam dele mmau lo, nah pekatei pe lungcet gade caihakecisam rang kelame dage rang beulu, ‘RAMPAUBE sam kingnei lulo. 3 RAMPAUBE Tinggwang aide ranggai: Ainie kemie caihakecime pekatei pe lungcet gade tei kelame, dede magede ngaula kemakme! 4 Israel, nnui caihakecime au maiserungdung hetaideu ga kebam nzwa da. 5 Nnui Israel deu ga kirie sia kedide mie retak kerane mie ma, iciu eh RAMPAUBE tingba benai hereu keregi gade saplu kerane.* 6 Mina aidungde da kenret marengeidung bam nah kenret mrai samdung rangla, penui, "Ma aikenzwadung au RAMPAUBE ne rang ndugai beu," de eh rang kelame. RAMPAUBE au penuide langgai ma, dede penui mina de penui sam kerang de gwang kesang zielie de eh keregui peu. 7 Nnui kenret marengei ngau meni nah kenret mrai samdung rang meni, nnui, "Ma aikenzwadung au RAMPAUBE ne ndugai," de eh rang kelame, Ih ranggai kemak dau de?’

8 Ciziemne RAMPAUBE Tinggwang aide rangla, ‘kedanemene nnui kenret marengei ngau nah kenret rang kecune, cine RAMPAUBE Tinggwang aide nnuide rang mmau gaila: 9 Caihakecime marengei kenret rang kelamedung de nah mraisamdung kenret rang kelame de a ba le mlai dizie. A minadung ngkwa kecu ga penui bam lak, mede Israelme ha raupwa kenzeu gade bam lak; penui Israelme deu ga gwang lak. Kedanemene Ih RAMPAUBE Tinggwang lie kecu nnui cilu zielu. 10 Aide ziemne, nah kedanemene penui a minadung de sau maula dida, "Kezuyi!" Cika kezuyi kegah dau de, penui tangdeu ge teibam nah cide kehania le kemai luzie.’* 11 Kehania le kirie püt kelamedung dage ranglu, ‘Cide kaumie dizie; cika tingrui süt zie, nah Ih tangheudung langgai eh cide tei ngkau mie dizie, nah heratingkai le cide gui ngkau dizie. 12 Pielo, kirie kaumie dizie. Minadung nnui dage rang meni, "Nnui kehania le kemai kelude daiga bamno?" 13 Ciziemne RAMPAUBE Tinggwang aide ranggai: A rata gade Ih heratingkai teu gwang zie, nah a lunghop gade cika peu tingrui duinai gwang zie! A rata gade tangheudung le cide teingkap cangsiak dizie.✝ 14 Nnui kirie kemai ha kelude Ih teipang mie dizie, nah Ih cide hangdeu gage tei ngkau gai dizie nah pesing ndeu kelu rünne bam dizie. Iciu eh cide kaumie dizie, nah sum kakgade nnui pelane de ngkap cangsiak dizie. Pecai Ih RAMPAUBE lie kecu nnui cilu zie. 15 Kirie de nah kehania le cide kemai kecume de a rata süt eh ngkap cangsiak dizie. Ih nnui dage rang zie, "Kirie de bam si meda, mede mina cide kehania le kemai kecume de, 16 Israel ga caihakecimedung Jerusalem caiha rang kelame nah mangdak gade kezuyi pe ziemne ngau kelame. Dede cika kezuyi gah!, Aide RAMPAUBE Tinggwang ndugai."’

17 Cine nang, mina nabo, n zu pwa n mina napuidung de mmau lo penui katei penui lungcet gade caihakecisam rangla, nah caihakecisam rang penuide mmau lu. 18 Aide rangbeu lu, ‘RAMPAUBE Tinggwang aide rangla: Ainie mipuidung penui ba gage kekemeu nia herui teula kecume nah penui peudung gage kai kerane penui peuzui pe rehi ketsamtsam teilu eh mina de tui kerane tei kelame. Nnui a mina de tui zieni nah nnui katei nnui teilungh kelilu zieni? 19 Nnui barley kwakli kepui ge nah tangku kecam nage ngau lu kera ziemne a minadung kakgade acu rüt kemak keulia la, tsaibui kemakmedung de teitset dila, nah nnui mina lungh bam si mede yi keramedung de peu lungh bamla, kedanemene n kenret samdung a mina kingnei kelude ziemne.

20 Ciziemne RAMPAUBE Tinggwang aide rangla: Nnui kekemeudung teu eh minadung de nruinedung nzwa tui kelude Ih ngkaula. Ih cidungde nnui ba gade cak mpetdi bi zie; nah nnui minadung de nruinedung nzwa keupwa kebam de, Ih penuide lungmpet peu dizie. 21 Ih nnui peuzuidung hiet gi dizie, nah a minadung de nnui ba gade keli luzie, iciu eh nnui ba gage penuide baangpwa bam sita dizie. Iciu eh nnui cilu zie Ih RAMPAUBE lie kecu. 22 Nnui makesangme mlung kenret le teiceu dila, Ih peu penui mlung ceu di neu meliede, nah nnui kesia keteime de kam meliene pe bata kesia keteide kecung si gaila iciu eh pe teilungh kelilu kera lampui gage nreu gwang luta dila, 23 ciziemne nnui kenret marengei ngau si lakta mede mrai samdung rang si lakta, Ih a minadung de nnui ba gade kelilu zie kecune. Ih RAMPAUBE lie kecu nnui ci luzie.’"