1 Anuide langgi kedi mmi kereiehket bekum, hekei zie raitu benai, cidau RAMPAUBE sam a da gwang eh ranggai, 2 "Mina nabo, kedanemene Tyre Jerusalem de rang mmau eh aide rang kecune, ‘Aha! Mina kiriedung au pangpop dida! Pa a da nreugwang luda; Ih puinlim dizie kedanemene pa au ngkapdi delu.’ 3 Ciziemne RAMPAUBE Tinggwang aide ranggai, ‘Ainie! Ih ncu mmau bam, Tyre, nah jaaidi dui nswak kecu nzwa eh Ih heleuhdung kekiee gede ncu mmau eh teucuh gai zie. 4 Penui Tyre kiriedung teimsia dizie nah pe hapiadung teingkau dizie. Ih pe rebui de biakgi dizie nah pecu tangtsu ge nzwa tei dizie. 5 Pecu jaaidi ga helangdung pucang kecu heni ge tei dizie, kedanemene Ih ndugai dide kecune, aide RAMPAUBE Tinggwang ne ndugai, nah pa heleuhdung ziemne tui kelunia dizie. 6 Pe napuidung luh ga kelamedung de kingtiedung le teitset dizie, nah Ih RAMPAUBE lie kecu penui cilu zie.’

7 Kedanemene RAMPAUBE aide ranggai: Ainie, tingtünle gade Ih Babylon gwangpei Nebuchadnezzar de ngngwa gwangla, hegwangdung reu hegwang, Tyre de ncau kerane, hekwendung nah bagidung teu eh, nah hekwen keteume nah minadung kekieege de ngngwa lu eh. 8 Pa luh gade n napuidung de teitset zie. Pa tui kera tah tei zie nah n tangdeudung reu gage takswa tei zie nah n ncu renia kerane hegeudung teucuh zie. 9 Pa n tangdeudung de kedeu kera pe tsinglwadung de kaibeu zie, nah pe niadung ne n hapiadung teingkau dizie. 10 Pe hekwendung kieesüt zie iciu eh penui rebui dene nnuide hacim dizie. Hekwenketeume, garidung nah bagidung kwa ne n tangdeudung pung nlai dizie. Pa n kiriedung ga nlüt kecudau, mipeidung namdi ga penui tangdeudung teimsia kedi gade nlüt kecu nzwa pa nlüt zie. 11 Pe hekwen nginglwakdung ne n puidikidung leune ga daucim zie. Pa kingtie le n minadung de teitset zie nah n kengking tangtsu tsusumdung de hangdeu ga kaumie dizie. 12 Penui n maheidung de tuiteu dizie nah ngu maniadung sütteu dizie. Penui n tangdeudung de teingkau dizie nah n ki keyidung de teimsia dizie. N tangtsudung, tsingdung, nah keheradung de penui dui gage kelien gai dizie. 13 Ih n leidung kwa de tei mtak dizie. N harp kwa de siu dai tadi zie.✝ 14 Ih ncu tangtsu pemi kegah ge teigai dizie, ncu helangdung pucang kecu heni ge tei dizie. Ncu teicuh dai lak, kedanemene Ih, RAMPAUBE Tinggwang ranggai dida, aide RAMPAUBE Tinggwang ne ndugai.

15 RAMPAUBE Tinggwang Tyre dage aide ranggai, ‘Duigwadeudung de nang kaumie kecu kwa ne tei nlai dilak ni, nah tei rezam kedime mra kwa ne, kedaptset nnui kakga kebam dau? 16 Ciu eh jaaidi hegwangnapei pelane penui hegwangbam gade nghung dizie nah penui paidung ra mpet nah penui mamie raukelu niadung de keugi dizie. Penui mbeu eh hangdeu ga bam zie, nah kebamtane mbeu zie, nah nnui ziemne penuide keheu pwabam dizie. 17 Penui n ziemne hei eh hap zie nah ncu rang zie,

Nang dainzwa, liem keteume le lungh pui kebamme, ngkap ciau dino. Kenlang namdibe de ngking süt kecube de, cu cide jaaidi gade gah dida.

Peda kelunghme ndaa penui taiga lunghkebam pelane dage penui ha kengngi ge paurwa la.

18 Nang kau kecu benai duikungdeudung de mbeu di.

Duigwadeudung de ngngi di, kedanemene nang n bam ga bamsi mede kecune.’

19 Kedanemene RAMPAUBE Tinggwang aide ranggai: Ih ncu gi kedi namdige tei kedidau, keda namdidung mina lungh kemak nzwa eh, Ih kecokdung teucuh ncu ncau kecudau, nah dui kedidung ne ncu hacim kecudau,✝ 20 pecai Ih ncu ndaa tingdau mina da ngngwa nghung zie, kedame makoiki ga nghung kedi nzwa; kedanemene Ih ncu ndaa tingdau kau kedi kideu heni henatube ga peu lungh dizie. Aide ziemne nang cailigwang dailak nah keringme deu ga saplu tadi zie. 21 Ih n da kengkap kai zie, nah nang kelungta bam tadi zie. Pecai ncu peei zie, dede ncu madaude ngau dailu tadi zie, aide RAMPAUBE Tinggwang ne ndugai."