1 RAMPAUBE kengkieng a reu ga la, nah RAMPAUBE rabe ne acu nzang mpetlu nah acu nzang mie langkam sum gage kailu; cika ma ra le puiting eh bam. 2 Pecai pa acu peu cidungde tet twagwa eh tetkah gwang. Ainie! Aidungde kekiee ge au langkam ga bam. Ainie! cidung au canghsüt bam. 3 Pa a dade, "Mina nabo, ma ra aidungde ringdai lubui ni?" dedi. Cine Ih pe dage rangbeu, "RAMPAUBE Tinggwang nang rünne ci." 4 Pecai pa a dage ranggai, "Ma ra aidungde dage caihasam rangbeulu nah penui dage ainzwa rangbeulu, ‘Ma ra kecanghbedung. RAMPAUBE sam kingnei lulo. 5 RAMPAUBE Tinggwang ma ra aidungde dage aide ranggai: Ainie! Ih nnui dage cuingi kaibeu zie da, nah nnui ring luzie. 6 Ih nnui dage nnui ria nah pumteih kai beuzie. Ih nnuide nnui geu le tei gum beuzie nah nnui lung gage nnui lunghlu kera cuingi kai beuzie. Iciu lude nnui Ih RAMPAUBE lie kecu cilu zie.’"

7 Cine acu teilo kebeu nzwa Ih caihasam ranggai beu; Ih cairasam ranggai beu ge, ainie, makwa ge kecui kecu kwa kenzwa ge gwang. Iciu ge ma radung ket reuga ket gwang delwe tamtok di. 8 Ih piebam nah, ainie, periadung ma radung ga koplu, nah pumteihdung bwalu nah pe geudung lungh gumlu. Dede penui da cuingi bamma. 9 Pecai RAMPAUBE a dage rangdi, "Cuingi dage caihasam rang beulu, caihasam, mina nabo, nah ngngilu de rang beulo, ‘RAMPAUBE Tinggwang ainzwa aide rangla: Cuingi, gwang lulo tingkai tu mdai lamde, delwe tsaidi kecume reu gage ngngi gailo, penui ring lu kerane.’" 10 Cine acu teilo kebeu nzwa eh Ih penui dage caihasam ranggai; iciu ge cuingi penui da gwang luge penui ringgwang lu. Pecai penui saplu, reugwame maadi ge.

11 Pecai RAMPAUBE a dage rang, "Mina nabo, aipau radung au Israel leuhme pelane delei. Ainie! Penui au ainzwa rang, ‘Anui radung au cangh dida, nah anui keregui de gah da. Anuide au gidi delu.’ 12 Ciziemne caihasam penui dage rangbeu lo, ‘RAMPAUBE tinggwang ainzwa rangzeu: Ainie! Ih nnui raudung ngkei gai zie nah nnuide cikade teu mpet luzie, a minadung. Ih nnuide nzang Israelme deu ga cailigwang dai beuzie.✝ 13 Pecai nnui Ih RAMPAUBE lie kecu cilu zie, Ih nnui raudung ngkei lu nah nnuide cikade nzang mpet kegaidau, a minadung. 14 Nnui ringlu kerane Ih a rabe nnui lungh gage kai beuzie, nah nnui Ih au RAMPAUBE lie kecu cilu de nnuide peu nnui deu gade mtak luzie. Ih aide ndugai nah cide tei bi zie, aide RAMPAUBE ne ndu gai.’"✝

15 Pecai RAMPAUBE sam a da gwang, rang eh, 16 "Cine cu nang, mina nabo, tsingtie ge keulu delwe cikage ainzwa rau lulo, ‘Judah nah Israelme ziemne, pe kangngwame.’ Pecai tsingtie kedage keulu delwe ainzwa raudai gailu, ‘Joseph ziemne, Ephraim leuhmedung, nah Israelme pelane, nah penuide ngngwa la kecume ziemne.’ 17 Tsingtie kenana de keu ncütlu delwe keugwanglu, iciu eh cide n ba gade ket teilu kerane. 18 N minadung n dade, ‘Nang anui dage aidung dai lie au bi ranglia lakni?’ de eh keteu cai 19 penui dage ainzwa rangbeu lu, ‘RAMPAUBE Tinggwang ainzwa eh rangla: Ainie! Ih Joseph tsingtie Ephraimme ba ga kebam de nah Israel leuhme nzangla kecume de ngngwa gwang Judah leuhme de tei ncüt dizie, iciu lude penui leuhme ket tei dizie, nah penui a ba gade ket tei dizie.’ 20 Nang penui dwa gade tsingtie gage rau kelude n ba gage keulu.

21 Penui dage ainzwa rangbeu lo, ‘RAMPAUBE Tinggwang ainzwa eh rangla: Ainie! Ih Israelme de heleuh keda ga ladi kecudung de nzang lu lauda. Ih penuide hangdeu twagwapung kebamdung gade hekwalu zie nah Ih penuide ngngwa penui deu gage kai dizie. 22 Ih penuide peu penui deu ga heleuh ket tei dizie, Israelme gu lamlwatuhdung ga, nah penui gu hegwang ket ne penui pelane reuga peu hegwang tei dizie, nah penui au heleuh kena tei si ta dizie. Penuide au hegwangram kena gage mzi gai sita dizie. 23 Iciu lude penui gu mamie rabedung le, penui zai kengkau zaidung, mede penui mau keheibe de le penuide tei hera daidi lakta. Kedanemene Ih penuide nlum kemak kemau keteidung gade kelibeu zie, nah Ih penuide tei mci dizie, iciu lude penui au a mina dizie nah Ih penui Tinggwang dizie.✝

24 David a kilabe ne penui reu hegwang tei zie. Iciu lude hangge ne penui pelane de kekwabe tei zie, nah a aja gade tet gwang zie nah a samdung mzai zie.✝ 25 Ih ne penuide a kilabe Jacob de ha kebeu deu dega, nnui paumedung lungh kecu ga lungh dizie. Penui cika kelungta lungh dizie, penui, penui namedung, na penui tsamedung, kedanemene a kilabe David penui reu kedibe tei bammui zie lu. 26 Ih penuide ngngwa kezuyi samting samkak luzie. Penuide ngngwa samkak kelu aide kelungta bam dizie. Ih penui teilung dwa beu zie nah peu hingpet luzie nah a kemci bam de penui kakga kelungta bam kera tei gai dizie.✝ 27 Ih kelungh bam au penui kakga bamzie, Ih penui Tinggwang zie nah penui au a mina tei dizie.✝ 28 Pecai heleuhdung Ih RAMPAUBE Israelme de teu mpet tsam kelu be lie kecu penui ci luzie, a kemci ni de penui kakga kelungta bam lude.’"