1 Mapwa ziemne nnui nnui hangdeu mzi kerane dacak kecudau, nnui RAMPAUBE dage reca teigailu maisia; reca aide hangdeu zige zie, petie cubit cang ngkaiemengei,* nah pedi cubit cang kerei. Aide twagwa kebam heni pelane de mci zie. 2 Aide gade petie pedi cubit hai mengei kecu kemci ni ge bam zie,* pe rai pedi cubit riakngei ge de si eh.* 3 Hangdeu aika de nnui petie cubit cang ngkaiemengei nah pedi cang kerei ge heni mdetlu zie; cide kerecaki, heni mcitube zie.* 4 Cingkume RAMPAUBE da gwang nna eh pe ta tei kebamme ziemne heni aide kemci ni ge zie. Cide ga penui kidung nah kerecaki ziemne heni kemci ge zie. 5 Cine cide petie cubit cang ngkaiemengei nah pedi cubit cang kerei ge zie, nah hangdeu cide Levime kerecaki ga heta tei kelame ziemne zie. 6 Nnui namdi be ziemne hangdeu ge keu ntsam luzie, pedi cubit cang mengei nah petie cang ngkaiemengei, cide kemci deu de taiga zie; namdi aide Israelme pelane ziemne zie.* 7 Kemci ni nah namdi be ziemne kai kemzeu lule ailam kebam henidung de hegwangnapei gu zie. Cide naimiak kenlütle nah naimiak kepetle lambie zie. Petie cipau deu ket tiege zie, naimiak kepetle gade naimiak kenlütle kecang. 8 Hangdeu aide Israel hegwangnapei gu mabam zie. A hegwangpei napei a minadung de tei keherei si lakta; meliene, penui hangdeu cide Israelme de ha dizie, penui leuhme ziemne.

9 RAMPAUBE Tinggwang aide rangla: Israel hegwang napeimedung si tadi lu! Zaisiet nah mide tei keherei kelade gidi lu; petau be nah kemzui be tei lulo! A minadung de penui deu gade gwagi si tadi lu!, aide RAMPAUBE Tinggwang ne ndugai. 10 Nnui pe mdet, ephahdung, nah bathdung petau be teu maisia. 11 Ephah* nah bath au nzwa kap, iciu eh bath ge homer gu zi kerei gade zi ge zie; ephah ge homer gu zi kerei gade zi ge zie. Penui mdet au homer de teu mdet zie. 12 Shekel *ge gerah ngkai ge zie; shekel riakherok de n ziemne mina ge zie.

13 Aide rehi gade nnui reca teigai lu: wheat homer ge ziemne ephah zi herok gade zi ge peu zie, nah barley homer ge ziemne ephah zi herok gade zi ge peu zie. 14 Maca reca au cor ge ziemne bath gu zi kerei gade zi ge zie (cide bath kerei ge), mede homer ge ziemne, kedanemene homer ge de bath kerei ge. 15 Makaune hai nana ge gade meurünna ge mede hemeu ge dui kebam Israel nam ga kauhaumaa gade keu mpet eh cide keru ratak mede lungciep ratak mina maudung ziemne keu tei zie, aide RAMPAUBE ne ndugai. 16 Hangdeu ga mina pelane reca aidung de Israel ga hegwangnapei da ha beulu maisia. 17 Hegwangnapei ne keru recadung ziemne, mei recadung ziemne, nah keici ngyi dau zau recadung ziemne, nah Sabbath tingbadung benai ziemne, nah Israelme hengyidung tei bam mui kela ziemne makaune peei beulu maisia. Israelme maudung peu gibeu kerane pa kemau recadung ziemne, mei recadung ziemne, keru recadung ziemne, nah lungciep recadung tei kera ziemne peubeu zie.

18 RAMPAUBE Tinggwang aide rangla: Kei raitu benai, cipau kei langnai ge benai, nang ketumseu zamra mezing kecu ge pehau gade keu eh kemci ni ziemne kemau reca teigai zie. 19 Cingkupei kemau recadung gade hejai kesa keulu zie nah cide kerecaki kikam tsiadung gage nah recabam kimiak mdaidung, nah kilungle kegwang herieki tsiadung gage kai zie. 20 Cipau kum kei raitu bekei lang henane benai minadung kemau zielie eh mene tei kedi mede ci mene tei kedi ziemne aide teigai zie; ainzwa eh kerecaki de nang tei mcilu zie.

21 Raitube kei ziangreiehmdai benai, nnui ziemne hengyi ge bam zie, cide lang henane ziemne hengyi zie. Nnui tsehi kai kemak tangku tyei zie. 22 Cipau benai, hegwangnapei pekatei pe ziemne nah hangdeu ga mina pelane ziemne hetumseu ge pwa kemau reca teigai zie. 23 Hengyi ting lang henane tingkak, hegwangnapei tingba ramsang RAMPAUBE dage keru ratak teigai zie: Hetumseu hena nah zamra kemak meurünseu hena tingba ramsang lang henane ziemne, nah tingba ramsang hemeuseu ge de kemau reca teibeu mui zie. 24 Pecai hegwangnapei taktyei reca ephah ge hetumseu gege ziemne nah ephah ge meurünseu gege ziemne reca teigai zie nah ephah ge ziemne maca hin* ge de si eh reca beu zie. 25 Kei hena bekei ziangreimengei benai, hengyi cudau, hegwangnapei lang henane tingkak de tingba ramsang recadung teigai zie: Kemau recadung, keru recadung, taktyei recadung, nah maca recadung.