1 RAMPAUBE sam ada gwang, rang eh, 2 "Mina nabo, Gog, Magog gu deu, Meshech nah Tubal gu kedibe de piegai lo; nah pe dage caihasam rang mmau gailo.✝ 3 Aide ranglu, ‘RAMPAUBE aide rangla: Ainie! Ih nnuide renia la, Gog, Meshech nah Tubal gu kedibe. 4 Cine Ih ncu teu nreugwang luzie nah kagwak n geija gage kai luzie; Ih nnuide nnui reugwame pelane, hekwendung, nah hekwen teu kelame, hereunet cum cangsiak pwa kelame, hemaa kedi ge hegeu kedi nah keceu pwa kelame, kingtie pwa kela leune de lang mpetdi zie! 5 Persia, Cush, nah Libya penuide ngngwa la, hegeu nah peurwa teu kelame leune! 6 Gomer nah pe reugwamedung pelane, nah Beth Togarmah, tingtünle bie kemdei nidung gade, nah pe reugwamedung pelane! Mina kekiee ge ncu ngngwa la!

7 Mteilu! Yeo, nkatei ncu mteilu nah n reugwame de ntaiga teu hekwalu, nah penui reu kedibe teilu. 8 Tingba kekiee ge cia ncu qu zie, nah mmi kiee kemak ge cai nang heni ge hereu gade piage ngkap di eh cu yidai kebam heni nah ngkap di eh bam kebam Israel lamlwatuhdung ga minadung gwang ngkwa dai luzie. Dede hangdeube gu mina de heleuhdung gade ngngwa mpet luzie, nah penui kwak eh lungh dizie, penui pelane! 9 Cine nang rahang ge nzwa nghang zie; nnui hemwa ge hangdeu de gum kebam nzwa zie, nang nah n reugwame pelane, ncu ngngwa kela reugwame kekiee kebamdung de.

10 RAMPAUBE aide rangla: Cipau benai mariemdung n mlung gade petdi zie, nah nang heciem kesiadung riam zie.’ 11 Cidau nang rang zie, ‘Ih rie kemak deu de ga hang zie; mina zing de kwak eh lungh kebamme da Ih mie zie, tangdeudung mede heriedung bam kemak ga lungh kebamme da, nah namdi kiriekidung bam kemak ga. 12 Ih mabam tui luzie nah süt kelude Ih rega luzie, iciu eh ndaa ngkap kedi heni cu mina lungh kebam de ngkap kerane, nah heleuhdung gade mina ngkwa kelume, minadung kauruine nah mabam ngau kiee kelume, nah kideu sum ga lungh kebamme de.’ 13 Sheba ga minadung nah Dedan namceudung, nah Tarshish namdi ga heliketeime nah cika reugwamedung n dage rangzie, ‘Nang hema tui nah ngkap kerane gwangla ni? Süt kelu hema de tuilu kerane nang n reugwame de hekwa lu deni, rangkanggeu nah kecak de pungteu di kerane, penui gu kauruine nah mabam keulu kerane nah süt kelu hema kekiee ge teu tetti kerane?’

14 Ciziemne caihasam ranglu, mina nabo, nah Gog dage ranglu, ‘RAMPAUBE Tinggwang aide rangla: Cipau tingba benai, a Israel minadung kwak eh lungh kebamdau, nnui penui ha cilu lakni? 15 Tingtünle n bam kemdei ge gade reugwame kedi kengking ge de ngngwa lu eh gwang zie, penui pelane hekwen reuga cwalu eh gwang zie, hemaa kedi ge, reugwame kekiee ge. 16 Nang a Israel minadung de hemwa ne hangdeu de gum pwa kela de nzwa gwaketang zie. Aipaucai Ih nnuide peu a deu de gwaketang zie, iciu eh Ih nnui dade akatei acu lia kegaidau heleuhdung acu cilu zielu, Gog, penui miakngau gade mcilu kerane.

17 RAMPAUBE Tinggwang aide rangla: Nang de meni Ih ndaa a kilame, Israel caihakecime dade n ha kerang de, cipaucai Ih ncu peu penuide renia kera caihasam kerang de? 18 Cine Gog Israelme deu gwaketang kecube nai, aide RAMPAUBE Tinggwang ne ndu gai, a lunghop a rata ga pui dizie. 19 Ih tei keneu gade nah a rata kelum gade, cipau tingba benai Israel deu ga nlui teusüt kera ranggaila. 20 Penui a dwa gade mbeu dizie, jaaidi ga heka nah tinggim ruinedung, luh ga makaunedung, nah kideu ga bwa kela kaune leune, nah kideu ga mina leune. Lamtwatudung de heling ngkei dizie nah hetialwadung meu dizie, kideu ga kirie leune kaumie di kemaktane.✝ 21 A lamlwatuhdung leune gade Ih pecu renia kera kingtie ge teugwang zie, aide RAMPAUBE ne ndu gai, mi hangge ge kecu pekatei pe sinabe de renia cuh dizie. 22 Cidau Ih pecu mateei nah hejai le tiak zie; nah tingrui kedi nah tangheudung le nah heu kebam sulfur pe dage nah pe reugwame nah pecu ngngwa kela heleuhdung leune da rui gai zie.✝ 23 Kedanemene Ih a kedi nah kemci lia gai zie nah Ih akatei acu peu heleuh kekiee ge de ci zie, nah Ih RAMPAUBE lie kecu penui ci luzie.’"