1 Mmi camrei bekum, kei mdai bekei, nah lang mengeine benai, Ih Kebar kereuki kung ga hebaangme kakga lungh bam. Tinggimdung nkeigai, nah Ih Tinggwang rengei ge ngau.✝ 2 Cipau kei lang mengei ne benai, cipau kum de Hegwangpei Jehoiachin de miram gage langgi kedi mmi mengei bekum, 3 RAMPAUBE sam cingkupei Buzi napei Ezekiel da gwang, Chaldeame deu Kebar kereuki kung gade, nah cika de RAMPAUBE ba pereu ga bamdi. 4 Cipaucai Ih piegai, nah tingpeule de rahang ge gwang la eh ngau; hemwa kedi ge gade mi hepik bam nah cide tingkeba le twagwa bam nah pelung gade, nah hemwa lung ki ga mi hetah geu giak nzwa. 5 Hemwa sum ga ring kela kaune mdai nzwa bam. Penui au mina teilui nzwa: Aide nzwa penuide ngau, 6 dede penui au ketket kecu zu mdaidai, nah penui hesiu mdaidai bam. 7 Penui pidung au mzui, dede penui pi nginglwak au hetumna pi nginglwak nzwa hetageu tei mci kelube nzwa tau ba bam. 8 Dede penui mina ba bam penui hesiu kang ga mdaidai lam de. Pelane hangmdai ziemne, penui zu nah penui hesiu au ainzwa: 9 penui hesiudung au pecia kebam kau hesiudung de keretung lü bam, nah penui au tet kecu dau nreu ma; meliene, ketket de mzui zang eh tetdi. 10 Penui zudung kenzwa de au mina zu nzwa. Zetle kebam mdai de au hingho zu nzwa, nah hile kebam mdai de au hetum seu zu nzwa. Penui mdai de helie zu nzwa.✝ 11 Penui zu au cinzwa, nah penui hesiudung au nreu le mzang hang, cine ketket makaunedung penui hesiudung kena bam keda kaune hesiu tunglwe, nah hesiudung kena penui pumdung gumlu. 12 Ketket de mzui cing eh pedwa le tetdi, cine kehei ga de rabe* ne tet kera lang kegai ga nreu mene penui tetla. 13 Ring kela kaunedung rehi au miceudung ru kebamdung nzwa, kekitbadung nzwa; keba mi de makaunedung kakga nzang eh tet, nah cika tingkehepik kebaadung nzwa.* 14 Kering kaunedung mzet süt eh pecai pedwa mlai bam, nah penuide tingkehepik nzwa ngau! 15 Pecai Ih kering kaunedung de pie gai; nah zu mdai kebam kering kaunedung tai leune ga hangdeu ga ta ge ge kebam Ih ngau. 16 Cipau tadung rehi au ainzwa: Pe ta ketket kecu beryl nzwa, nah mdaidai de nzwa kap; nah ta ge keda gede sum gade kerekeu lwe kebam nzwa. 17 Ciciu eh penui mlai kegai dau, penui keheibe tu mdai lam tet, nreu mene penui tet. 18 Petah kungdung au hu nah kehing ge, pita kung ga miakdung le twagwapui pung kebam ziemne.✝ 19 Ring kela makaunedung keheidau de mlai kegai dau, pita cide penui tai ga mlai la. Ring kela makaune kideu gade cuh kecudau, petadung de cuhdi. 20 Kehei gade rabe tet kecu ga, penuide tet, nah peta de penui tai ga cuh, kedanemene kering kaune rabe petadung ga kela de ne. 21 Keheidau de makaunedung mlai kegai dau, pita cide de mlaila; nah makaune mlai tadi ge, pitadung cide de mtak dila; makaune cide hangdeu gade cuh kecu dau, petadung de penui tai ga cuh dila, kedanemene ring kela makaune rabe de pitadung ga kebam dene. 22 Kering kaunedung peureu ga tingkam kenzwa ge ga pe tie pe di disüt kecu ge bam; ma cide mimakecang crystal nzwa penui peureu ga bam.✝ 23 Tingkam kang ga, ket hesiu mzui eh ketwa pet nah keda kaune hesiudung tung. Ketket kaune de kena ramcau bam penuikatei penuide ha kera; ketket de kena ramcau bam pepum ha kera. 24 Ciciu eh Ih penui hesiudung kwa siu. Dui kedi kwadung nzwa. Penui nlai kegai kehei ga Kengkieng Tinggwang kwa nzwa. Dui kedi nswak kwa nzwa. Reugwame kwadung nzwa. Keheidau penui mtak kegai dau penui hesiudung tei hena dila.✝ 25 Penui peureu ga kebam tingkam de gade penui mtak kegai dau nah penui hesiu tei hena kegai dau makwa ge gwang.

26 Penui peureu ga tingkam reu ga hegwangbam kenzwa ge bam sapphire tangtsu rehi kenzwa ge, nah hegwangbam kenzwa ga kebambe de au mina rehi nzwa.✝ 27 Ih ma ge pekia nreu lebie hegeu mi ga ba kebam nzwa ngau, cide pekia nreulebie hegeu miga ba kebam nzwa; Ih pekia nkanglebie mi nah kebane ba twagwapung kebam ngau. 28 Tangningnaria ge hemwadung ga ting kerui benai pet kecu nzwa cide au baha eh keba twagwa kebam ge. Cide au RAMPAUBE gu kebaa nzwa ngau pet. Ih cide ngau kegai dau, Ih a zu kaumie, nah Ih marang kebam kwa ge siu.✝