1 Pecai minabe acu herieki naimiak kepetle lam ngkeilu kela gage ngngwa gwang. 2 Ainie! Israel Tinggwang kendu naimiak kepetle de gwang; pe kwa au dui kekiee ge kwa nzwa, nah kideube pe kendu le baa di.* 3 Cide Ih marengei gade ngau kegai nzwa da, marengei gade pa gwang eh Jerusalem namdi de ngkapti zie lie gwang kela de nzwa da, nah marengei aidungde Ih Kebar Kereuki gade kengau de nzwa da, nah Ih kaumie a zu ngkum pungdi. 4 Herieki naimiak kepetle ngkei pwa kebam gade RAMPAUBE kendu kerecaki ga lüt. 5 Pecai Rampaube Rabe ne acu teu cuhlu nah acu kilung helungle ge ngngwa gwangdi. Ainie! RAMPAUBE kendu ne kerecaki tei pui bam.

6 Minabe a taiga sap bam, nah mi kedage acu kerecaki gade resiu kebam Ih siu. 7 Pa a dage ranggai, "Mina Nabo, aide a hegwangbam da nah a pi kai kera ni ge, cika Ih Israel minadung kakga lungh lamui dizie. Israelme a zi kemci de rang msia si lakta, penui mede penui hegwangpeidung, penui kenlum kegah dene mede penui gwangpeidung paaudung penui heni kecehudung ga kebam de si eh. 8 Israel gwangpeidung penui kikam a kikam taiga, nah pe tsiadung a tsiadung taiga, nah anui kakga tangdeu rünne bam delwe a zi kemci de rang msia si lakta. Penui penui ta kemneu le a zi kemci de hengam tei dida, cine Ih a rata le penuide ngkap dida. 9 Cu penuide penui kenlum kegahdung nah penui gwangpeidung paaudung adwa gade keu gidi, iciu lucai Ih penui kakga kelunghta lungh la dizie.

10 Mina Nabo, nang nkatei Israelme dage aipau kerecaki ha de ranglia maisia iciu eh penui hengam tadung ziemne ngngamlu kerane. Ranglia kegai aide penui cetlu kerabe. 11 Kedanemene magade penui tei kedidung ziemne ngngam la liecai, iciucai kerecaki tei kera riem kelude ranglia beulo, pe giak, cika kempet nah kelüt kimuiki, nah pe rehidung, pe zaidung nah riet kelu leunedung. Pecai penui miak dwa gade aide raulu iciu eh penui kerecaki rehi de nah hezaidung de kailu, iciu eh cide mzai kerane. 12 Aide kerecaki ziemne hezaidung: Hangdeutu tün gade cide twagwa pwa kebam raidung de, cidungde mcitube henidung zie. Ainie! Aide kerecaki ziemne hezaidung da.

13 Aidung de recabam cubit gade mdet keludung zie, cubit aide teu bam kela cubit nah petie becai mi ba kwak langge. Cine recabam twagwa kebam hekwaki au pecok cubit ge, nah pedi de cubit ge. Petu ga twagwa kebam pemung becai span ge. Aide recabam singkam zie. 14 Hekwaki hangdeu be set gade recabam pi ga kecang cubit kena, nah tsing pak pekatei de pedi cubit ge. Tsingpak keceuna gade recabam tu ga kecang, cide cubit mdai, nah pe tu kedi de pedi cubit ge. 15 Recabam ga keru ratak bam de pehu cubit mdai, nah keru ratak bam ga ma ki mdai ge nreule ge hwa gai kebam dungge bam. 16 Ma bam cide petie cubit kereiekena nah pedi cubit kereiekena, petie pedi nsamram.* 17 Cide pe tu mdai gade pe mung petie cubit kereiemdai nah pedi cubit kereiemdai, nah pe tu au pedi cubit pempie ge. Hekwaki peciakne pedi cubit ge si eh pihidung naimiak kepetle lam ge nreu gai pwa bam."

18 Pecaide pa a dage ranggai, "Mina nabo, RAMPAUBE Tinggwang aide rangla: Aidungde recabam teicang keludau ziemne hezaidung ge, keru ratak cikage pwa ncuh gai kera ziemne, nah hejai cikage kezingai kera ziemne. 19 Cingkume Levi leuhme Zadok dade lungh kegwangme acu reca kera a taiga kegwangme de kemau ratak ziemne makaune hau gade nang hetumseu ge peu zie, aide RAMPAUBE Tinggwang ne ndugai. 20 Pecai pe jai kesa pwa recabam ga ma ki mdai de ga nah pe tu mdai de ga nah cipau tu twagwa kebam gage kai zie; nang cide tei mci luzie nah cide luulu kera ta tei luzie. 21 Pecai kemau ratak de ziemne hetumseu de keulu nah kerecaki gwale ge mtei pwa kebam kemci ni gage ru gailu. 22 Pecai benai* nang hemeudung kak gade hemeuseu zamra kemak ge teu kemau ratak teigai zie; cingkumedung recabam cide hetumseu le keu tei mci kecu nzwa tei mci zie. 23 Nang cide tei mci canglu de, makaune hau kak gade hetumseu zamra kemak ge nah hemeudung kak gade hemeuseu zamra kemak ge peulu. 24 RAMPAUBE de cide peulu; cingkume cikage mcai kezingai lwe cide keucuh RAMPAUBE dage keru ratak tei gaizie. 25 Lang henane ziemne tingnai ramsangne nang hemeuseu ge teu kemau ratak ziemne mteilu, nah cingkume de makaune hau kak gade hetumseu zamra kemak ge nah hemeudung kak gade hemeuseu zamra kemak ge mteilu maisia. 26 Lang henane recabam ziemne ratak teilu nah cide tei mcilu, nah ainzwa eh cide tei mcilu maisia. 27 Penui aide tei canglu maisia, nah lang heset ne benai cingkume ngu keru ratakdung nah n lungciep ratakdung recabam gage mteilu zie, nah Ih ncu luulu zie, aide RAMPAUBE Tinggwang ne ndugai."