1 Ge RAMPAUBE sam a da gwang eh, ranggai, 2 "Tsaidikela mina nabo, n zu nreugwang Jerusalem ncwa lu, nah kerecakidung de de rang mmau dilu; Israel deu de caiha rang mmau lo. 3 Israelme dage rang beulo, ‘RAMPAUBE aide rangla: Ainie! Ih nnuide mmau la! Ih a kingtie pe cum gade zütlwe nnui keyime nah kesiame de de ncüt eh teitset dizie! 4 Ih nnui keyime nah kesiame de teitset kera ziemne, a kingtie pe cum gade mpet lwe tingtünle de gwang tingbangle kecang mina leune de mmau zie. 5 Iciude mina leune cilu zie, Ih RAMPAUBE, a kingtie pe cum gade züt mpet kelu de. Cide pecum gage pwa nlüt dai lak!’ 6 Nang dekecu mina nabo, n kia pang kedi nzwa mra lu! Penui miakngau gade lungrei hap mra gailu! 7 Iciude penui ncu keteu zie, ‘Dai ziemne nang hap zeu no? Pecai nang rang zie, ‘Kedanemene samlia ge gwang kelane, mileune mlung pang dizie, nah mileune ba mbeu dizie! Mileune rabe suiyi gah reu reu dizie, nah mileune ngkokpui dui nzwa lwa zie. Ainie! Cide gwang lada nah cide ainzwa zie!, aide RAMPAUBE Tinggwang ne ndugai.’" 8 Pecai RAMPAUBE sam a da gwang eh ranggai 9 "Mina nabo, caiha rangbeulu nah aide rangbeulu, ‘Rampaube aide rangla:

"Rangbeulu: Kingtie ge! Kingtie ge! Cide pemui kereei nah tei mzau luzie!

10 Pemui tei mzau kebam cide kekieege de gitset kera ziemne! Kereei kebam cide peu tingkehepik nzwa lu kera ziemne!

A napei gu hegwang tuitie ziemne anui sui yi zieni? Gwang kela kingtie de cinkenzwa tuitiedung de ngau neu ma!

11 Cine kingtie de kereei kerane peu dizie, nah pecai heba ne herak lu kerane!

Kingtie mui tei mzau luda nah kereei luda nah cide teitset gai kera be ba gage peu dida!"’"

12 Kengha kielu nah hei eh haplu, tsaidikela mina nabo! Kedanemene, kingtiebe gwang di delu a leuhme de mcau kerane! Cide Israel muiteume pelane de mcau bam.

Penuide a minadung si eh kingtie dwa gage kelien gai dida. Cine, nnui niepum kepeu lu!

13 Kedanemene kedeikepie ge bam, dede hegwang tuitie de sap tie luta dicai dainzwa lai?, aide RAMPAUBE Tinggwang ne ndugai.

14 Cu nang, mina nabo, caiha ranggai lo nah n ba kenana kepeu lu, kedanemene kingtie maa pekecumbe gwang gwaketang zie!

Teitsetti kerame ziemne kingtie ge! Kingtie cide mikekiee de gitset kerane, penuide keheiga kui kera!

15 Penui lung tei sui nah penui kekau de tei nkiee si kerane, Ih penui kiriedung leuga kingtie gitset kera ziemne telei gai dida. Ah! Cide au tingkehepik nzwa tei gai, cide gitset gai kerane kerak luda.

16 Nang, kingtie! Zetle bi gai! Hile bi gai! N zu nreu kegai leuga mie cu.

17 Kedanemene Ih de a ba kena le bi zie, nah iciu lude Ih a rata mtak dizie! Ih RAMPAUBE cide rang ndugai la!"

18 RAMPAUBE sam a da gwang dai eh ranggai, 19 "Cu nang, mina nabo, lampui kena telei gaibeu lu Babylon gwangpei kingtie gwang lu kerane. Lampui kena de, hangdeu ge gade bangdwa tei zie, nah giak kelu mamie tsia ge ne lampui ket be de namdibe gega mie kera saulia zie. 20 Lampui ket teiheci gai lu Babylon reugwame ziemne Rabbah ga gwanglu kerane, Ammonme namdi dega. Keda lampui de de tei heci gailu reugwame de ngngwa Judah ga gwanglu kerane nah Jerusalem namdi kuda kwa kelu dega. 21 Kedanemene Babylon gwangpei lampui puihai ga mtak luzie, kereka ciem tei reli kerane. Pa heleitu kesa kelak gai zie nah dailam tetgai ziebi mamiedung dade keteu zie nah pa ma nceu mcet zie.

22 Peba zetle Jerusalem ziemne marengei ge, renia kera tsinglwadung mteilu, pemui ngnga lwe gitset culo aja kaigai kerane,

hereu kwa sah mra kera, tsinglwadung de kiriedung ntau kera teleilu,

pehu tei nsam kera, nah makepiebam kehudung teilu kerane.

23 Marengei tei lia kegai cide

Jerusalem ga kebamme miak gade kemtage nzwa dizie, Babylonme dage reset tei kelume! Dede penuide tuilu kerane hegwangpei penuide penui samkak gikah kedine mmau zie.

24 Cine RAMPAUBE Tinggwang aide rangla: Kedanemene nnui nnui maudung de peu nsung dai kelune,

nnui nnui hezai gikah kegaidung de peu ngau gai, iciu eh nnui tah leu ga nnui kemaudung ngaulu kerane,

kedanemene nnui aide tei kedine nnuide nnui ngauraume ba gage kai dizie.

25 Nnui mcikemak nah Israel reu kedi tei kebam kenlienme, nnuide saja peu kera tingba gwang bam da, nah mateunsam mene kemau tei kelame gu peting canggwang kedime ziemne,

26 RAMPAUBE Tinggwang aide nnui dage rangla: nnui peukang nah kedipeurwa keu mpet dilu! Magede ndaa nzwa lakta! Kegahme de teucuhlu nah di kelame de teu henah lu!✝

27 Kengkap! Kengkap! Ih cide tei ngkap dizie! Cide teidai gai lak hetutiak kera kedet kelube gwang kemaktane.

28 Cine nang, mina nabo, caihasam ranggai lo, ‘RAMPAUBE Tinggwang aide Ammonme dage rang beu penui da hengam gwang kera de: Kingtie ge, kingtie ge züt luda! Cide pemui kereei luda gitset lwe ngkapdi kerane, cine cide tingkehepik nzwa zie. 29 Caihakecime nnui ziemne marengei mrwa kecu ngau kegai dau, penui nnui ziemne kenret reca ratakdung tei kera hang kecudau, kingtie aide mina kesiame teitsetti lai eh kebamme ngngwang ga bam dizie, saja ngau kerame tingba gwangcang kebamme da nah mateunsam mene kemau tei kelame ting cang kebamme da. 30 Kingtie pe cum gage kaidai lu. Ncu dam kelu ni gage, ncu nna kelu deu gade Ih ncu tiak zie. 31 Ih a rata nnui dage rui gai zie! Ih a rata miheu nnui reu gage gui gai zie nah Ih nnui de pezai kesiame ba gage kai dizie, ngkap kecime dage! 32 Nnui miheu yi kera ziemne maca ge dizie! Nnui jai nnui deu sumga bam zie. Nnuide nsung lak, kedanemene Ih, RAMPAUBE aide ndugai di delu!’"