1 Pecai RAMPAUBE sam a da gwang, rang eh, 2 "Mina nabo, Sier Deutu de pielu nah cairasam le penuide mmau lu. 3 Cide de ranglu, ‘RAMPAUBE aide rangla: Ainie! Ih nnuide renia la, Seir Deutu, nah Ih nnuide a ba le dap zie nah nnuide kemrwa ge nah ralie ge tei dizie. 4 Ih nnui namdidung tei ngkap dizie, nah nnuide kemrwa ge tei dizie; pecai Ih RAMPAUBE lie kecu nnui ci luzie. 5 Kedanemene nang Israel minadungde ngaurau la muila kelane, nah penui keherei kecu tingdau nang penuide kingtie ba gage kai di kecune, penui saja disüt kecu tingdau. 6 Ciziemne, Ih kelungtane, aide RAMPAUBE ne ndugai, Ih nnuide teitset kera mtei gai, nah tei ketset dene nnui de zui zie! Nnui mide tei ketset de de ngkau la kemakne, mide tei ketset de ne nnuide zui zie. 7 Ih Seir Deutu de gi kedi ge tei dizie keheibe de cikade tetkah mede cika caili kegwang mede teitsetdi zie. 8 Tsai kedime pau dele pe lamlwatudung tei pui dizie; kingtie le teitset kedime n kecehu deutudung nah langkamdung nah n reuceudung gage cakmie zie. 9 Ih ncu kelunghta kemrwa ge tei dizie. N namdidung ga mina lung ta dizie, dede Ih RAMPAUBE lie kecu nang ci luzie.

10 Nang rangda, "Heleuh ai kena de nah kideube kena aide agu dizie, nah cide anui ne luu dizie," RAMPAUBE penui da la liede. 11 Ciziemne, Ih kelungtane, aide RAMPAUBE ne ndu gai, N rata nah n riaksiet de Israel dage lia kegai nzwa Ih de nnui cikesiakge teigai zie, nah Ih nnuide tiak kecu dau Ih akatei acu penuide lia zie. 12 Cine Ih RAMPAUBE lie kecu nang ci luzie. Nang Israel lamlwatudung de rangkemsia leu Ih siu da, nang aide rang kecu dau, "Cidungde ngkap dida; anuide peu cide de tuityei lu kerane anuide peu dida." 13 Nang rang kegai gade a reuga ngkatei ncu tei cehu dida, nah nang acu mmau eh marang kiee la; nah Ih ci pelane siu da.

14 RAMPAUBE aide rangla: Ih ncu gi kedi ge tei dizie, kideube pelane penui sui yi kebam dau. 15 Israel mapwa de mrwa kedi ngau eh nang n suiyi kebamne, Ih n dage de cikesiak ge teigai zie. Nang de gi kedi ge dizie, Seir Deutu, nah Edomme leune, pelane! Iciu eh penui Ih RAMPAUBE lie kecu ci luzie.’"