1 "RAMPAUBE adage rangdi, mina nabo, nkatei n ziemne kingtie pemui keyi ge keulu tamkebitme kie nzwa, nah cipau kie de mpeu nah n tangkei mai reu gage teu kaa lu, cipau cai perüt teu pie lu nah cide zicum teilu. 2 Gwa kecu tingbazie cang kedi benai Jerusalem namdi sum gage zicum zige mi gage ru dilu, nah tam zicum gade zige keulwe cide kiengtie le bi kecai dilu namdi pelane twagwa eh. Cipaucai bangpwa kebam zi de pwa tingkai gage teizang gailo, nah Ih kiengtie züt mpet luzie minadung de zui kera. 3 Dede tam kie kemak ge penui da de keu lu nah penuide pairi gage kanglu. 4 Cipaucai tam kiee kemak ge keulu delwe mi sum gage samgaidi lu; nah mi gage rudi lu; cikade mi mpet eh Israelme pelane de ngkap dizie."

5 RAMPAUBE Tinggwang ainzwa rang, "Aide Jerusalem heleuhdung sum ga, Ih pecu kai kedi bam ga, nah Ih peu pecu keda deudung le twagwalu. 6 Dede pa au heleuh kedadung swa de makesia ketei gade a ajadung mlai kiee kidi, nah pecu twagwa kebam deudidung swade a zaidung mlai kiee kidi. Minadung a tutiakdung lu ta dida nah a zaidung ga tet ta dida." 7 Cine RAMPAUBE Tinggwang ainzwa ranggai, "Kedanemene nnui a zaidung nah ajadung mzai rau dida twagwa kebam heleuhdung swa de. Ncu twagwa kebam heleuhdung de nzwa eh nang lungh de ma," 8 cine RAMPAUBE Tinggwang ainzwa ranggai, "Ainie! Ih ncu renia cuh zie. Ih ncu saja peu zie nah heleuhdung de peu ngau kera. 9 Ih madaude teigai kemak pe nah madaude teidai kelak pe Ih n dage teigai zie, kedanemene nang kengkau tadung tei kelane. 10 Cine nang kebam gade mipeimedung penui name de tyei zie, nah pe namedung penui peimedung de tyei zie, kedanemene Ih ncu saja peu zie nah tu leune lebie ge bang kecume de tei zanggai dizie. 11 Ciziemne, Ih ring kela nzwa, aide RAMPAUBE Tinggwang ne ndugai, nang ngau nkau kecu pelane le nah kemneu tadung pelane le a kerecaki tei hera kedi ziemne, Ih n peupeime tei ncam dizie; nnuide Ih a ngaugia keulia si lakta, nah Ih nnuide bang beulak. 12 N mina zicum mateei gade tsai zie, nah penuide nnui kakgade herakum ne ngkap dizie. Ncu twagwa kebam zicum kingtie gade kau dizie. Pecai Ih zicum de tu leune gage tei zanggai dizie, nah penui cai zui kerane kingtie züt mpet zie.✝ 13 Cipaucai a rata cang dizie, nah peu Ih a ratadung de peu mtak dizie. Ih mnung luzie, nah penui ci zie Ih, RAMPAUBE, a rata gade rang kegai de Ih penui dage a ratadung de cang kedi dau. 14 Ih ncu heleuhdung luu ta kedi ge tei dizie nah heleuhdung ncu twagwa kebam miak ngau gade ncu henui tei dizie nah keheibe tetkah gwang kecume leune dade. 15 Cine Jerusalem cide mi kedame ne hengam ge tei di zie nah rang msia di zie, ncu twagwa kebam heleuhdung ziemne rang kemriak ge nah kehing ge zie. Ih rata nah lunghop teu n tutiakdung tei zie, nah rata süt eh kesiu zie, Ih, RAMPAUBE aide ndugai la! 16 Ih nnui dage herakum gu lakpitsidung kesia be langgai eh cide ne nnuide tei kengkap ge tei dizie. Kedanemene Ih nnui dage herakum tei ngkiee gai zie nah nnui taktyei ngaulu kelade keugi dizie. 17 Ih nnui dage herakum nah matei kengkapdung langgai zie ciu eh nang nagahpui ge dizie. Rapia nah hezaidung ncu tet kah gwang zie, nah Ih n dage kiengtie keu gwang eh renia zie, Ih, RAMPAUBE aide ndu gaila."✝