1 Mmi keheci bekum ziangrei benai anuide langgi kedi mmi ngkaiemengei bekum, namdi be de tui kelu cai mmi kereiemdai bekum, cipau benai, RAMPAUBE ba a reu ga bam nah pa ne acu cika ngngwa mie. 2 Tinggwang makengaudung gade pa acu Israel deu ga ngngwa gwang. Pa acu mtak kera lamlwatu husüt kecu ga ngngwa gwang; tingbangle ge namdi be ga ki kedidung ge nzwa ngau. 3 Pecai pa acu cika ngngwa gwang. Ainie, mipei ge! Pe rehi au hetageu rehi ge nzwa. Pe ba ga langcimpai kemdetria ge nah makemdet tie ge la, nah pa namdi be kirie ga sap bam.* 4 Mipei cide a dage ranggai, "Mina nabo, n miak le pielu nah n kwen le kingneilu, nah Ih n dage lia kegaidung ga n lung kailu, kedanemene ncu aikage Ih ngngwa gwang gai iciu eh penuide n dage lia gailu kerane. Nang ngau kegai leune Israelmedung dage reci lia lu."

5 Kerecaki twagwa kebam tangdeu ge bam. Mipei ba ga kebam makemdet tie de cubit herok tie ge*. Cubit petie ramsangne cubit ge nah mi badeu tie ge*. Cine pa tangdeu de mdet, nah cide metre kecum hu nah metre kecum siu.✝ 6 Pecai pa kerecaki kirie naimiak kepetle nreu gai pwa kebam de ga mie. Pa pe pihidokdung ga tet hang nah kirie kimui de mdet, pedi tsingpak ge cok ge*. 7 Kekwame kibungdung petie tsingpak ge tie ge *nah pedi tsingpak ge tie ge; kibung keheibe kena kakga cubit mengei bam, nah kerecaki kirie kimui pe tsingpak ge tie ge. 8 Pa kirie kigu bung de mdet; cide pe tie metre kecum. 9 Pa kirie kigu bung de mdet. Cide pe cok metre kecum. Kikam tsiadung de pe di cubit kena. Aide kerecaki cwa kebam kirie kigu deda. 10 Naimiak kepetle kirie tu nana lam ga kekwame kibung kecum bam, nah cidungde pe mdet nsam, nah tangdeu cidungde kakga kebam de de pe mdet nsam. 11 Pecai mipei be herieki lampuiki de pe di mdet, cubit kerei; nah pa herieki lampuiki de pe tie mdet, cubit kereiehkecum. 12 Kibungdung dwaga kebam tangdeu de pa mdet, pe hu cubit ge. Kibungdung de tu leune ga cubit herok. 13 Pecai pa kirielampui kibung ge kireu gade kibung kedage ga kecang mdet, cide cubit ngkaiemengei, kibung keraibe kimui gade pekenabe ga kecang. 14 Pecai pa kekwame kibungdung kakga kebam tangdeu de mdet, pe tie cubit riakherok; pa kirie kimui bung ga kecang mdet. 15 Kirie dwa ga kimuiki gade keda tu lambie kirie kimui bung ga kecang cide cubit riakngei. 16 Kibungdung taiga hebakidung nkui pwabam nah cipau tsiadung taiga heriekidung lungga twagwa kebam pelane ga; nah kimui bungdung de cide nzwa da. Pelung twagwa kebam pelane ga hebakidung bam, nah hebaki tsiadung gage palm bangdung le hezu tei pwabam.

17 Pecai mipei be acu kerecaki kigu gwale bie ngngwa mpet. Ainie, cika kibungdung bam, nah kigu ga lampui tei pwabam, cipau taiga kibungdung camrei bam. 18 Lampui cide kirie mbie ga hang, nah pe di de kirie be tie tiege. Aide lampui kehena de. 19 Pecai mipei de herieki kehena de dwa gade helung be herieki dwa ga kecang mdet; cide naimiak kepetle cubit haige, nah tingtünle de ci kesiakke da.

20 Pecai pa hegwale kibung gu tingtünle kebam herieki be gu pe tie nah pe di mdet gai. 21 Herieki lule ailam kibung kecum bam, nah herieki nah kimuiki pe mdet de herieki ditube de nzwa kap, pe tie cubit riakngei nah pe di cubit ngkaiemengei. 22 Hebakidung, kimuiki, kibungdung, nah palm bangdung naimiak kepetle rieki lambie ge cwagai. Cika pihidok hena cikage tetgai nah pe kimuiki ga. 23 Tingtünle ge cwa gai kebam dwaga helungle kibung ga kelüt herieki ge bam, naimiak kepetle ge herieki kebam nzwa; mipei de herieki ge gade herieki ge ga kecang mdet, pe mdei cubit haige.

24 Pecai mipeibe tingbangle ga kelüt kimuiki herieki ga ngngwa gwang, nah pe tangdeudung nah kimuiki de pe mdet hegwale heriekidung de nzwakap. 25 Herieki ga kebam nzwa herieki lampui nah pe kimuiki gade ngkui kebam hebakidung bam. Tingbangle kimuiki nah pe kimuiki de pe tie cubit riakngei nah pe di cubit ngkaiemengei. 26 Kirieki nah kimuiki kenghang ga pihidok hena bam, nah lule ailam tu ga palm bangdung mie heri gai pwabam. 27 Tingbangle ge helungle kibung ga kelüt kirieki ge bam, nah mipei be cipau kirieki gade tingbangle kelüt kirieki kecang mdet, pe mdei cubit haige.

28 Pecai mipei be de acu tingbangle kirieki lebie de acu helungle kigu gage ngngwa gai, cide pe mdetdung keda kiriekidung nzwakap. 29 Pe kibungdung, tangdeudung, nah kigu keda kiriekidung kemdet nzwakap. Helungle kirieki nah pe kimuiki pe tie riakngei nah pe di cubit ngkaiemengei. 30 Helungle tangdeu de twagwa kebam kimuikidung bam; aidungde pe tie cubit ngkaiemengei nah pe di cubit mengei. 31 Kimuiki aide kigu hegwale bie ge ncwa gai, pe tangdeudung ga palm bangdung bam nah cika hang kera pihidok heset ge bam.

32 Pecai mipei be de helungle kibung ga naimiak kepetle de acu ngngwa gai nah kirie de mdet, cide pe mdet keda kiriedung nzwakap. 33 Pe kibungdung, tangdeudung, nah kimuiki de penui mdet keda kiriedung de nzwakap, nah hebakidung dele twagwa bam. Helungle kirie nah pe kimuiki de pe tie cubit riakngei nah pe di de cubit ngkaiemengei. 34 Penui kimuiki de hegwale kibung lebie ge cwa gai bam; cide ga lule ailam palm bangdung bam nah cika hang kera pihidok heset ge bam.

35 Pecai mipei be de acu tingtünle kebam herieki ga ngngwa gai nah cide mdet; cide pe mdet keda heriekidung nzwakap. 36 Pe kibungdung, tangdeudung, nah kimuiki de penui mdet keda kiriedung de nzwakap, nah hebakidung dele twagwa bam. Kirieki nah pe kimuiki de pe tie cubit riakngei nah pe di cubit ngkaiemengei. 37 Penui kimuiki de hegwale kibung lebie ge cwa gai bam; cide ga lule ailam palm bangdung bam nah cika hang kera pihidok heset ge bam.

38 Kirie helungle ramsangne ga kibung ge kikam de si eh twagwa pwabam. Aide gade penui keru ratakdung tei mci la. 39 Kimuiki ramsang ga taktyeibam kena ge bam, cika keru ratak ziemne makaune daptset la, nah kemau reca nah maukedi raca de. 40 Tingtünle kebam kirie ga kehang kibung tangdeu taiga taktyeibam kena bam. Keda lam de kimuiki taiga taktyeibam kena bam. 41 Kirieki lule ailam ga taktyeibam mbai bam; penui taktyeibam heset reu gage makaune daptset. 42 Keru ratak ziemne tangtsu pang kelube le tei kelu kekaibam mdai bam, pe tie ket eh pempie, pe di ket eh pempie, nah pe hu cubit ket. Cidungde reu ga keru ratak ziemne makaunedung de dapketset netdung kaizeu pwabam. 43 Kagwak kena ge pe tie mibadeu tie ge kecu kimuiki pelane ga kai ntipbing twagwa pwabam,* nah heteihdung de taktyeibam reu gage kaizeu pwabam.

44 Helungle kirie gwale, helung kigu ga, helei keteime kibung bam, tingbangle cwa gai kebam tingtünle ge ket kebam, nah tingtünle cwa gai kebam tingbangle keda ge bam. 45 Pecai mina be a dage ranggai, "Kibung aide tingbangle cwa gai kebamde kerecaki ga bata tei kebam cingkumedung ziemne. 46 Kibung tingtünle cwa gai kebam de recabam ga bata tei kebam cingkumedung ziemne. Aidungde au Zadok napeimedung, RAMPAUBE tai mna eh pe tah tei kebamme; penui au Levi namedung." 47 Pecai pa kibung de mdet, pe tie cubit haige nah pe di cubit haige, cipau ki dwaga recabam bam.

48 Pecai mipei be de heki kimuiki ga ngngwa gwang nah pe tsiadung mdet, cide tunana lamde pe siu cubit mengei. Kenlüt lampui de kateide pe di cubit kereiemdai, nah tunana le kebam tangdeudung de pedi cubit kecum. 49 Kimuiki cide petie cubit ngkai, nah pe cok cubit kereieket. Cika kehang pihidokdung bam nah cika ciagwa tunana lam bam.