1 RAMPAUBE sam ada gwang dai eh, ranggai, 2 "Cu nang, tsaidikela mina nabo, Tyre namdi ziemne nsuisia ndeu gai cu, 3 nah Tyre de ranglu, jaaidi kiriedung ga lungh kebamme de, duigwadeudung kekiee ge dage helila keteime, RAMPAUBE Tinggwang aide ncu ranggai la:

Tyre, nang ranggai da, ‘Ih au hezukeyi gade yicangsiak.’

4 N raidung au jaaididung mlung ga bam; n tah keteime n zuyi de teihemi cangbeu da.

5 Penui n tsingkwakdung pelane Senir gade cypress le teibeu da;

penui Lebanon gade cedar keu ngu tsiangdi teibeu kerane.

6 Penui Bashan ga oak tsingdung le ngu liemtautie teibeu;

penui Cyprus gade cypress tsing le liem ga mabamdung teibeu, nah penui hepwangeu le pereu ga kailu.

7 N liempaidung au Egypt gade langcimpai pegiak ketsamtsam le teilu, cide n pailim tei eh la;

Elishah duikungdung ga pegiakdung kepu nah gieremang kecule keu n liem ga msiu bam teilu.*

8 Sidon nah Arvad namdidung ga lungh kebamme n liem keteume da;

Tyre macidung de n da bam; penui au n liem pie kerengeime.

9 Byblos gade heciemta yisüt kecume ne n liem sia kebamdung de lamlui beu;

jaaidi liemdung pelane nah liem cidungde teu kelamedung nnui kakga nnui niadung zwa kera pungbam.✝

10 Persia, Lydia, nah Libya aidungde n regwame kakga bam, hereu ziemne n minadung.

Penui n dage penui hegeu nah peurwa gwak gailu; nah penui n kemdu de liagai.

11 Arvad nah Helek peimedung n reugwame kakga kebamdung de n kudadung ga ncu twagwa bam, nah Gammad minadung n hapiadung ga bam. Penui penui hegeudung n kudadung ga ncu twagwa lu eh pwa cuhlu! N zuyi de penui ne teicanglu.

12 Tarshish au n mabam kekiee ge zwalu kera kebamne helila ketei ga n zangna teila: Rangkanggeu, hegeu, tin, nah lead. Penui n niadung lui nah cidungde zwa! 13 Javan, Tubal, nah Meshech, penui kiladung le helila tei nah hetageu le tei keludung le helila tei. Penui n niadung luilu. 14 Beth Togarmah hekwendung, hekwenseudung, nah kwenceunadung le ngu heliniadung luilu. 15 Rhodeme duidikung kekiee gade ncu ngngwa helila tei. Maniadung n ba ga bam; penui telui, ivory, nah tsingketiakbe peu kensungta tei kerane lang caili gai daibeu! 16 Aram n niadung kekiee ge lui; penui emeralddung, pai gie, rong püt kelu pai, langcimpai keyibe, pearldung nah rubydung ngu nia teilu kera ha. 17 Judah nah Israelme ncu ngngwa heli tei. Penui Minnith gade wheat peu, tangkudung, heliadui, maca, nah balsam n helinia tei kera peu. 18 Damascus n niadung pelane gu heli tei, n mabam kekiee de gu, nah Helbon zau nah Zahar gu hemeu mai gu heli tei. 19 Izal gade Dan nah Javan ncu hegeu, cinnamon, nah calamus pwa peu. Aidungde n heliniadung teilu. 20 Dedan ncu ngngwa hekwen bamkam paidung le heli tei. 21 Arabia nah Kedar kedimedung ncu ngngwa heli tei; penui ncu meuründung, meurünseu nah hemeudung peu. 22 Sheba nah Raamah ga heli tei kelame n da gwang eh mosala yitube nah tangtsu pemi kehungbedung; penui kecak le n nia luilu. 23 Haran, Kanneh, nah Eden ncu ngngwa heli tei, Sheba, Ashur, nah Kilmad de si eh. 24 Aidungde ncu ngngwa pai pemi kehungbe paigie, nah pe pa rau kelube paidung, dak kelubedung, nah herui hemisüt kelu paidung n litaknidung gade heli tei. 25 Tarshish gu heliemdung ne n heliniadung punggwang beu.

Cine nang au jaaidi sum ga n liniadung le puipunglu!

26 N liem keteume ncu jaaidi ga ngngwa mie beu;

naimiak petle tingkai ne ncu cidungde sum gage pung nlim miedi.

27 N mabam, n heliniadung, nah rehiak kelu niadung; n liem ga tet kelame nah liem teukelame, nah liem keteleime; n helinia keluime nah n reugwame leune, nah nang liem ga n kangngwame leune, nang ngkap kedi benai penui pelane jaaidi kecok ga nlim mie dizie.

28 Jaaidi ga namdidung ngu liem keteume kehap kwa dene penui mbeu dizie;

29 Liemtaume leune liem gade nghung dizie;

liem ga tet kelame nah liem teu kelame leune hangdeu ga cuhsap dizie.✝

30 Pecai penui ncu peu penui kwa siu zie nah hapsüt dizie;

penui penui peu ga rebui pütgai zie. Penui mimüt ga mlak zie.✝

31 Penui n ziemne penui peu tai zie nah rosopai le penui katei penuide ba luzie,

nah penui n ziemne hapsüt gai zie nah sah pet zie.

32 Penui n dage suisiet lungrei lei teigai zie nah tsaibai lei teigai zie.

Cauge Tyre nzwa no, pecu au jaaidi sum gega peu zing de dida?

33 Ngu heliniadung jaaidi gwale keladau, mina kekiee ge nnung teilu di;

nang n heliniadung nah n mabam kedi le hegwang kekiee gede tei mahei beu!

34 Dede jaaididung ne nah dui kecok ne ncu tei ngkap kedi dau,

n heliniadung nah n kangngwame leune nlim nghung di!

35 Duikungdeudung ga kelunghme ncu ngau penuide keheu di,

nah penui hegwangmedung de keheusütdi! Penui zudung mbeu kwadi!

36 Helila tei kelame ncu ngau penui suilu tadi;

nang mide keheu kegai ge dida, nah nang kelungta bam si lakta."