1 Pecai RAMPAUBE sam a da gwang eh, ranggai, 2 "Mina nabo, Jerusalem dage pe kemneutadung de ranglia beulo, 3 nah aide ndu gailu, ‘RAMPAUBE Tinggwang ne ma aide Jerusalem dage ranggai: N bangdwa au ncu Canaan deu gade mna lu; n pei au Amoritme ge, nah n pui au Hittitme ge.* 4 Ncu mna kelu benai, n pui ne n laria dang beu ma, mede dui gade ncu tei mci beu ma, mede ncu mcai pwa keniak ma, mede pai le ncu hezui ma. 5 Mige gade de ncu ngaunggia eh ma aidungde kette ncu tei beu ma, ncu nggia gai beu kera de. Ncu mna kelu benai, n teilungh de nneu eh, ncu luh gage kelien gaidi.

6 Dede Ih ncu tet kahgwanglu, nah nang n jai ga mlakkebam Ih ngau; cine nang hejai keniak pwa kebam gade Ih n dage ranggai, "Ringlu!" Nang hejai keniak pwa kebam gade Ih n dage ranggai, "Ringlu!" 7 Ih ncu peu luh ga mabang ge nzwa lungh. Nang lungh hing sütlu nah di petlu, nah nang au hezukeyi heteei heta ge di. N tung au ntip riep bam, nah n tam lungh hemisütlu, nang au paula nah paiheni teu meliede. 8 Ih ncu tetkah gwang dai, nah Ih ncu ngau. Pielo! N ziemne keku ting gwang bam, cine Ih a pai n reu gage bahgai beu nah nang paula kebam de halu. Pecai Ih n dage sampet gai nah ncu samkak kecu ga ngngwa gwang lu, aide RAMPAUBE Tinggwang ndugai, nah nang au agu dida. 9 Cine Ih ne ncu dui le hui lu nah n jai de hui gidi, nah Ih ncu olive ca le keniaklu. 10 Ih ncu pepa keteibe niadung kaibeu nah n pi gage teihgeu picumdung kaibeu. Ih ncu langcimpai keyibe le kezuilu nah ncu silk pai le halu. 11 Pecai Ih hetei-heta le ncu hezu keyi tei beu, nah Ih n badung gage heta kaibeu, nah hetei ge n nggwang gage kaibeu. 12 Ih n nkie gage nli ge kaibeu nah nlidung n kün gage kaibeu, nah hegwang peurwa hezu keyi ge n peu gage kaibeu. 13 Cine nang au kecak nah rangkanggeu le ncu hezu keyi tei lu, nah nang au langcimpai, silk, nah pepa raugaikelu paidung le balu; nang au tokkui yitube, heliadui nah maca tyei nah nang au hezuyi süt, nah nang hegwangpui ge teilu. 14 N zi heleuhdung kakgade nlang la dida kedanemene nang hezu kecu dene, kedanemene cide au Ih ne ncu pwapeu yicangsiak kecu ge, aide RAMPAUBE Tinggwang ndugai. 15 Dede nang nkatei n zuyi de de nlumdi, nah nang n nsa ziemne helipui ge nzwa di; nang mi keheibe tetkah kegwangme dage helipuime ge ta penui dage teigai, iciu eh n zuyi de pegu di. 16 Pecai nang n niadung keulu nah penuide ngngwa n ziemne mamie kereca bamdung de pegiak ketsamtsam le tei hezuyilu, nah cika nang helipuime ge nzwadi. Aide au tei di bui ma. Mede ci kenzwa be au peu bamdi kerabe ma. 17 Ih ncu pwa kepeu tangtsu pemi kewhung, nah kecak rangkanggeu keuteu dida, nah nang nkatei ziemne mipei miedung tei luda, nah nang penui dage helili kelame ge tei kela tah teigai dida. 18 Nang ngu peparaugaikelu paidung keulu nah penuide ba beu, nah nang agu macadung nah perim kehenguidung penui dwa gage kaibeu. 19 Agu tangku Ih ncu peu, tokkui yitube, maca, nah heliadui le tei kelube, nang perim kehengui de ziemne penui dwa gage kaigai, kedanemene aipau de au ci nzwa tei gwanglu, aide RAMPAUBE Tinggwang ndugai. 20 Pecai nang a ziemne mna kebeu n napeime nah n napuimedung de pwalu, delwe nang penuide mamiedung ziemne taktyeipok ge tei kerane ratak teigai. Nang helili kecu tadung ma keceu nage ni? 21 Nang a namedung de mamiedung dage teitset gai beu dida nah penuide pwa mamie dage rataktei eh reca beu. 22 N kemneu tahdung pelane nah nang helili kecu tahdung tei kebam dau nang n hena ting de nsung ma, nang paula kebam dau nah paiheni teu mene kela dau, n katei n jai ga mlakkebam dau.

23 Anie! Anie n dage!, aide RAMPAUBE Tinggwang ndugai, ciziemne, aipau kesia pelane gage si eh, 24 nang n katei n ziemne nlum kemak reca bam ge teilu nah n katei n ziemne mina makiee heni leune gage mamie reca bam ge teilu. 25 Nang lampui peu leune gage nlum kemakme reca bam teilu nah n zuyi de hengam ge teidi, nah nang mina tet kahkegwang keheibe da n pidung mbak beu, nah nang n helipui ta tei nkiee reu reudi. 26 Nang Egyptme, n kidamedung dage pumteih hengim tadung helipuime ge nzwa liagai, nah nang helipui ketei tadung kekiee ge teigai, a rata tei eh. 27 Pielo! Ih a ba le ncu kedeu zie nah n taktyei peu lak. Ih n ngauraume ba gage n teilungh kaibeu dizie, Philistinme napuidung, n kemmha zai de ngau nggam kelame dage. 28 Nang Assyriamedung dage helipuime ge nzwa lia gai kedanemene nang mnunglu kemakne. Nang helipui ta nzwa tei nah cude nang mnung canglu ma. 29 Nang helipui ketei ta kekiee ge heli keteime deu Chaldea gage teigai, nah aipaude ne de n mnung tei luma. 30 N mlung dai kenzwa gede sia no, aide RAMPAUBE ndugai, nang ma aidungde tei kera, ngngam kemak helipui tadung? 31 Nang nlum kemak reca bamdung lampui peu leune gage tei luda nah n reca bamdung mina makiee kebam henidung gage teilu. Iciude nang au helipuime ge nzwa ma kedanemene nang rangkang keu kemakne. 32 Nang kemmha pui, nang n nahpei de be mene sangme de be ngngwa. 33 Minadung helipuidung leune de rangkang peu, dede nang au hi keludung dele nang hung kelamedung pelane de peu nah nang penuide helipui tadung ziemne hetau henim tei eh luga aikade peu n da gwang. 34 Cine nang nah keda puidung kakga pe kentsam bam. Migede ncu helipui ta tei kera rangkang peu ma. Nang au tsam. Nangne penuide rangkang ha nah migede ncu au ha ma.

35 Ciziemne, nang helipui, RAMPAUBE sam kingnei lu. 36 RAMPAUBE Tinggwang aide rangla: Kedanemene nang n hengim liagai nah nang helipui ta gade n mraipeime nah ngu kemneu mamiedung dwa gade paaula bam kecune, nah nang n name jai penuide pwapeu kecune, 37 ciziemne, ainie, Ih nang redau kelu nang hung kelamedung pelane de peu gwang ngkwa luzie, nang hung kelame nah nang ngkau kelamedung pelane, nah Ih peu penuide gwang ngkwa lwe luga aika de ncu renia zie. Penuide peu nang paaula kecu ngaulu kerane Ih n painidung gau dizie. 38 Kedanemene kemha nah mide teitset kegai de ziemne Ih ncu saja peu zie, nah a rata nah lunghop gade Ih n dage hejai tei kelwa teugwang beu zie. 39 Ih ncu penui ba gage kaibeu dizie ciu eh penui ngu nlum kemak reca bamdung teikau dizie nah ngu mamie kereca nidung teipang teipop dizie nah penui ngu paihenidung lwak dizie nah ngu hetei-heta pelane keu teu dizie. Penui peu ncu paaula nah paiheni teu mene bam dizie. 40 Pecai penui mina maadi ge ngngwa gwang lwe ncu mmau zie nah tangtsudung le ncu sam zie, nah penui ncu penui kingtiedung le dang kecai dizie. 41 Penui n kidung ru zie nah mipuidung kekiee dwa gade ncu saja kekiee ge peu zie, kedanemene Ih peu ncu helipui ta tei kecu gade tei mtak dizie, nah nang ncu kehungmedung de rangkang peu sita dizie. 42 Iciu de Ih ncu a rata kelade nkung dizie; a rata de n dade tet dizie, kedanemene Ih mnunglu zie, nah a rata sita dizie. 43 Kedanemene nang n hena ting de nsunglu kemakne nah ma cidung pelane ziemne a rata tei kedine, ciziemne, ainie! Nang tei kegai de ziemne Ih n reu ga saja teu gwanggai beu zie, aide RAMPAUBE Tinggwang ne ndugai. Nang n kemneu ta kedadung pelane gage helipui ta ketei de si gai meni?

44 Ainie RAMPAUBE rangdi! Minadung n hangkiasam teu rang zie, Jerusalem, "Pe napui au, pe pui nzwa da de eh." 45 Nang au n pui napui kesang delie, pe nahpei nah pe name de ngkau, nah nang au n siname nzwa da, kedanemene penui penui nahpeidung nah penui name da ngkaula. N pui au Hittitme ge, nah n pei au Amoritme ge. 46 N swacingpui au Samaria nah pe napuidung au tingpeule kelunghmedung, n caihereipui au nkangle lungh bam, cide au, Sodom nah pe napuidung. 47 Nang penui kemaudung pwa kecu nah penui zai reli nah penui tei keladung reli kecu rünne ma, dede n lampui leune gade nang penui swa sia gwa dida. 48 Ih ring kebam nzwa, aide RAMPAUBE Tinggwang ndugai, n sinabepui Sodom nah pe napuidung, nang nah n napuidung kesia ketei kiee ge de tei ma. 49 Ainie! Aide n sinabepui Sodom mau lie kedanemene pa mtak kebam dau hegie di, sünne ma nah makeheibe ziemne cetla kemakne. Pa kegame nah teumai kesiame badung tei ngking beu ma. 50 Sodom ga minadung au ngang nah a dwa gade ngkau kela tadung teidi, cine Ih penuide ngkapdi, nang kengau de nzwa. 51 Samaria au nang kemau ketei pempie gede tei ma; meliene, nang au penui tei kegai swa de kengkaubedung tei kieeki gai, nah n sinabepuidung au nswa yiki kecu nang keulia da kedanemene nang kengkaubedung leune tei kegai ziemne! 52 Bamkeraide nang, n ngngam keulia gai lo; cinzwa lude n sinabepuidung be nswa yiki kecu nang keulia lu zie, kedanemene nang cidung kengkau kemneutadung leune gade kemau tei kedi ziemne. Cu au n sinabepuidung be nswa de yiki dida. Bamkeraide nang, n ngngam keulia gai lo, Kedanemene ci nzwa lude n sinabepuidung be nswa yiki lie kecu nang keu lia luda. 53 Kedanemene Ih penui maheidung peu dai beu zie, Sodom nah pe napuidung gu maheidung, nah Samaria nah pe napuime maheidung; dede n maheidung au penui kakga bam zie. 54 Ma aidungde ziemne nang n ngngam keulia zie; nang tei kegai leune ziemne ncu hengam tei zie, nah cinzwa lude nang au penui ziemne lungciep ge zie. 55 Cine n sinabepui Sodom nah pe napuidung de n daa lui gage teigai dai beu zie, nah Samaria nah pe napuidung de n daa mabam de peu dai zie. Pecai ncu nah n napuidung de n daa lui gage teigai dai beu zie. 56 Nang ngang kela ting dau n sinabepui Sodom zi de n mui gade rang pet de ma, 57 n kesiade keulia kemak dwa. Dede cu au nang Aram napuidung nah petai ga twagwa kebam Philistinme napuidung pelane dade henui ge tei dida. Minadung ncu ngkau kecu rünne dida. 58 Nang kengkau kemmeu tadung tei kedi de ziemne keherei maisia!, aide RAMPAUBE Tinggwang ndugai! 59 RAMPAUBE Tinggwang aide rangla: nang ngau lu kebui pwa Ih ncu peu zie, nang samkak tei pang kedi gade n sampet de masi pei tadi.

60 Dede Ih au nang hena dau ncu ngngwa samkak tei kelude nsung luzie, nah Ih ncu ngngwa kelunghta bam kera samkak ge tei luzie. 61 Pecai nang kemau tei kedi de nsung luzie nah n swacingpuidung nah n caihereipuidung de ngau keludau nang ngngam dizie. Ih penuide n napuidung nzwa ncu peu zie, dede n samkak de ziemne ma.✝ 62 Ih ncu ngngwa a samkak tei luzie, nah Ih RAMPAUBE lie kecu nang cilu zie.✝ 63 Kedanemene ma aidungde ziemne, nang maleune nsung luzie nah ngngam dizie, cine nang n mui ngkeilwe marang silak nang ngngam kedi ziemne, nang tei kedi pelane ziemne Ih n mau gi kebeu dau, aide RAMPAUBE ndugai.’" ✝