1 Pa a dage rang eh, "Mina nabo, n pi cuh sap lu; cipaucai Ih ndage marang zie."✝ 2 Cipaucai, pa adage marang kebam dau, Tinggwang rabe a lung ga lütlu nah a pi ga peu saplu, nah pa acu resiu kebam Ih siu. 3 Pa adage rangdi, "Mina nabo, Ih ncu Israelme dage langgai la, acu mlai kedi leuh, penui nah penui paume hangnana adage kemau tei dida henai tingba kecang! 4 Penui caileu kelumedung samzai tei kemak zu pung nah penui mlung dung au tak. Ih ncu penui dage langgai la, nah nang penui dage rang zie, ‘RAMPAUBE Tinggwang ne ainzwa eh ranggai.’ 5 Penui siu de mede siu mede. Penui au renia kelame ge, dede penui kakga caihakeci ge la kedi ci luzie. 6 Nang, mina nabe, penuide hing kerabe ma mede penui samdung de. Ngngi so, nang cehei nah hetu bangdung kakga lade nah nang heruingapuidung de ngngwa lungh bam de. Penui samdung de hingdi so mede penui zudung dede, kedanemene penui mlai kelame ge lu. 7 Dede nang a samdung penui dage rang zie, penui siu de siu melie de, kedanemene penui ne renia mtei tu kecume kecune. 8 Dede nang, mina nabo, Ih ndage kerang de kingnei lu. Mlai kedi kidungde de nzwa mlai diso. N mui ngnga lu nah Ih ncu dai ha lai bam bie cide tyei lu!"✝ 9 Cipaucai Ih piegai, nah heba ge a dage hetwa pet; nah cide rau kelu kehezui laisiu ge. 10 Tinggwang a dwa gade teukezang gai; cide pedwa nah pecai kenana ga ma rau pwabam, nah cika rau pwa kebam be au kehapdung, suikesia, nah keherei.✝