1 Ciu eh RAMPAUBE sam a da gwang eh ranggai, 2 "Mina nabo, n minadung da aide ndulia eh penui dage rang beulo, ‘Ih heleuh keheibe dage kingtie ge pwa eh penuide renia kegaidau, cidau cika kideumena penui kakgage migede kekwabe helang luzie. 3 Pa penui deu ga kingtie teugwang kera de piebam la, nah pa minadung de peu cilu kerane pe telui be kwagai beula! 4 Telui be kwa kegai de minadung siulu eh mriak bamlu mecai, nah kingtie teugwang penuide ngkap dicai, ciucai keheibe de penui jai pet kegai de penui peu ga zie. 5 Magade mige telui kwa kegai de siulu liede mriak bamlu mecai, pe jai pet kegai de pekatei pe zie; dede pa mriak bamlu liecai, pa pekatei pe teilung keli luzie.✝

6 Iciuliede, magade kekwabe ngkap kera kingtie de gwang kela ngau liede, dede pa telui be kwagai beu mecai, cinzwa eh minadung de peu mriak bamlu mecai, nah kingtie teugwang eh mige kering de luuteu dicai, cipaude pekatei pe mau ziemne tsai dida, dede hejai cide ziemne Ih kekwabe de mmau zie.’

7 Cu au nang nkatei, mina nabo! Ih nnuide Israel ki de kekwa be teibeu dida; Ih a mui gade rangkegai kwa de nnui siu luzie nah a keleu gade penuide rang mriak beulu. 8 Ih mina kesia ge dage, ‘Kesia tei kelabo, nang au tsai bizie!’ de ranggai cai, dede nang pa kesia tei kelade pecu rang mriak beulu mecai, iciucai kesia tei kelabe pe mau de pung eh tsai dizie, dede pe jai de ziemne ncu mmau zie! 9 Dede magade nang penui lampui kesia gade penuide rang mriak beu, iciu eh penui cikade nreulu kerane, dede penui penui lampui gade nreugwang lu meliecai, iciucai penui penui mau ziemne tsai zie, dede nang nkatei n teilung keli luzie.

10 Cine nang, mina nabo, Israelme dage rang beulo, ‘Nang ainzwa rangbam, "Anui gikah kedi maudung anui da lala, nah cidungde ne anuide ngkap bam! Dainzwa anui ringbam lulai?"’ 11 Penui dage rang beulo, ‘Ih ring kebamtane, aide RAMPAUBE ne ndugai, Kesia keteime tsai kedi ga Ih a suiyi bam ma, kedanemene kesia keteime penui lung nreu lucai, pa ring luzie! Helung nreulu! Kesia ketei de gidi eh helung nreulu! Dai ziemne nnui tsai di lulai, Israelmedung?’ 12 Cine cu nang, mina nabo, n minadung dage rang beulo, ‘Kesamsangme ge pe kesamsangne dene pecu keli gailak kemau tei dicai! Kesiame ge kesia tei kedidung ziemne pecu ngkap di gailak pa pemau gade nreu lucai! Makesangme ge pe keyi dene pecu keli gailak pa kemau tei dicai. 13 "Nang ring bi luzie!" de eh Ih makesangme ge dage rang cai, nah pa pe masang de nlum bam eh kemmau tah tei dicai, Ih pe keyidung de nsungta dizie. Pa kesia tah tei kedidung ziemne pa tsai zie. 14 Cine Ih kesiabe keteibe dage, "Nang tsai bi zie," de rang cai, dede pa kemau gade nreulu eh kemzui nah keyibe tah teilu cai, 15 pa mi kemei tei eh releu keludung rui dai dicai, mede pa migu rega kedidung keleu gade peu dai dicai, nah teilung keyi peu kela zaidung teu eh lungh lucai nah kemau teisi ta dicai, ciucai pa ring bi luzie. Pa tsai dilak. 16 Pa kemau tei kedi leune Ih pe maudung de nsung dai lak. Pa kemzuibe nah petaube teilu, nah cine, pa ring bi luzie!

17 Dede n minadung rangla, "Rampaube lampui au petau ma!" dede nnui lampuibe be petau kemak ga la! 18 Kemzuime ge pe keyi de gidi nah kemau tei dicai, iciucai pa cide ziemne tsai zie! 19 Kesia keteime ge pe kesiadung de gade nreulu eh kemzuibe nah keyibe tah tei lucai, cidungde ne pecu keli luzie! 20 Dede nnui minadung rangla, "Rampaube lampui au petau ma!" Ih mige ge kecude pa tei kegai nzwa siakte eh pe tutiak zie, Israelmedung de!’"

21 Anuide baang pwa kebam mmi kereiehkena bekum, kei kerei lang mengei ne benai ainzwa teigai, Jerusalem ga miba gade pak mpet kelume ge a da gwang eh ranggai, "Namdi be de tuiteu dida!" 22 Hebaang gade pak kelube gwang kemak dwa tinghegi RAMPAUBE kengking a da gwang, nah tingcang pa a da kegwang tingdau a mui ngkei di. Cine a mui ngkei di; Ih mlei dai ludi!

23 Pecai RAMPAUBE sam a dage ainzwa ranggai, 24 "Mina nabo, Israel deu kau kedi de gum kebamme ainzwa eh rang, ‘Abraham au hangge rünne, nah pa hangdeu de gumlu, dede anui au kieesüt! Kideu de peu anui mabam teilu kerane anuide peu.’ 25 Cine penui dage rang beulu, ‘RAMPAUBE Tinggwang aide rangzeu: Nnui hejai tyeila, nah nnui ngang cuh nnui reca miedung de piela, pecai nnui mina jai teilwa mpetla. Deudibe de nnui gu bilu zieni? 26 Nnui nnui kingtiedung de ngngei lala nah kemneu ta tei gwang; mipeime leune pe kidabe nau de tei hera di. Deudibe de nnui gu bilu zieni? 27 Nnui penui dage ainzwa rang zie, ‘RAMPAUBE ainzwa ranggai: Ih ring kebamtane, ngkap kedi ga kelungme de kingtie le ngkap dizie, nah langkie ga kebamdung pwa ring kela kaune pok tei dizie, nah rie kelu namdi nah tsupop ga kebamdung rapia gade tsai dizie.* 28 Cidau Ih penui deu de teili pwa kemrwa nah ngau kehing bam ge tei dizie, nah kemdu kengking de gah dizie, Israel deu lamlwatu keyidung leune kemrwa deu ge dizie, nah penuide tetkah gwang kera migede gah dizie. 29 Cine penui Ih RAMPAUBE lie kecu ci luzie, Ih penui deu gi kedi ge nah kehera bam ge tei kedi dau kedanemene penui kengkau tah leune tei kegai ziemne.

30 RAMPAUBE rang eh, cine cu au nang, mina nabo, n minadung tangdeudung nah heki kiriedung tai gade n ha rangbam dida, nah keheibede ketket de rang mpau bam, hangge ge kecu pe sinabe dade, ‘Anui mie eh RAMPAUBE ne caihakecibe dage peu kegai samdung de kingnei go!’ 31 Penui n da gwang bammui kela nzwa eh a minadung n da gwang zie, nah n dwa ga bamlu eh n samdung kingnei zie, dede penui tei mzai gailak. Sam petaubedung penui mui ga bam, dede penui mlungdung au samsang kemak gade kemmi ngaulu kera ga la. 32 Penui ziemne nang au lei keyi ge tei kegai nzwa da, peria ketei leibung gade siu keyi kwa kegai nzwa, cine penui n samdung kingnei zie, dede migede cidungde tei mzai lak. 33 Cine ma aidungde teigwang kecudau, ainie! aidungde teigwang zie!, cidau penui kakga caihakecibe lalie kecu penui cilu zie."