1 Pecai mina be acu kerecaki kimui ga ngngwa cailigwang, nah kerecaki kimui kang gade dui lwapetbam naimiak kepetle ge, kedanemene kerecaki kimui be naimiak kepetle ge mcwa kebam ne, nah recabam zetle bie ge, dui kerecaki tingpile ge lwahung bam.✝ 2 Cine pa acu nreule rieki gade ngngwa mpet lwe naimiak kepetle mcwa kebam rieki de ngngwa twagwa, nah aipau dui de tingpile rieki gade lwapet bam.

3 Mina be naimiak kepetle ge tet gaidi, pe ba ga kemdet tie keu lwe; pa cubit cangge mdet lu* nah acu dui a pi-miak ga hang cang kebam gade ngngwa mpet. 4 Pecai pa cubit cangge mdet dailu eh acu dui a ngkokpui ga kecang ge ga ngngwa pet; nah pa cubit cangge mdet dailu eh acu dui a kia ga kecang gega ngngwa pet. 5 Pecai pa cubit keda cangge mdet dailu; dede cide reuki de cukzu kedine Ih kah mpet gai lak di nah zak lu kera cuk di, cide kah gai kelak reuki ge.

6 Minabe a dage ranggai, "Mina nabo, nang aide ngau de mi?" nah pa acu ngngwa mpet beu eh peu acu reunakikung gade tet cailigwang. 7 Ih cailigwang la ge, reunakikung lule ailam tsingbangdung kekieege bam eh ngaulu.✝ 8 Minabe a dage ranggai, "Dui aide naimiak kepetle cuikui gage lwapet eh Arabah ga ge lwa hung gaidi zie; dui aide Mcai Jaaidi ga ge lwa nlüt gai eh cide tei ring dai beu zie. 9 Kering makaune leune dui lwa kegai ga lungh dizie; heka kekiee ge bam dizie, kedanemene dui aidung de cika ge lwa gai kebamne. Cide mcai dui de tei ring dai beu zie. Reunaki lwa kegai leune ga maleune lungh luzie. 10 Ciu eh En Gedi ga heka ketuimedung bam dizie, nah En Eglaim gade penui langdung teicang kera bam bamzie. Jaaidi Kedi ga heka kebam kenzwa kiee ge, Mcai Jaaidi ga heka ketsamtsam kekiee ge bam dizie. 11 Dede duikedikung ga rejaaidung nah niasaidung ga duidung de tei mci gailak; cidung de cika mcai rwak tei eh bam dizie. 12 Hereukikung ga, lule ailam, tsingbang leune taktyei peu kera lungh cuh zie. Cipau neidung de madaude kidi lak nah penui madaude penui tsi kei mtakdi lak. Hekei ramsang tsingbang leune pe tsi bui zie, kedanemene kerecaki gu reunaki dui cidung de ga lwa gai kebam ne. Cipau tsidung taktyei ge zie, nah cipau neidung pwa minadung de teingkeilu zie.✝

13 RAMPAUBE Tinggwang aide rangla: Aide heleuh kereiekena ziemne nzi kerabe deu de da: Joseph qwa kena ngau zie. 14 Ih nnui paumedung dage penuide peu gum zie lie a sam pet kebeu de nzwa nang nzi siakte beu kerabe. Hangdeu aide nnui gu tei eh gum lubui da.

15 Hangdeu rai be tingpeule Jaaidi kedi gade Hethlon namdi ga, nah Zedad namdi ga kecang. 16 Berothah gade, Sibraim, Damascus nah Hamath deurai kakga kebam de, nah Hazer Hattikon namdi, Hauran deurai ga kebam de ga kecang. 17 Cine hangdeu rai be jaaidi gade Hazar Enan namdi gade tingpeule Damascus nah Hamath deurai ga kecang zie. Aide tingpeule deurai zie. 18 Naimiak kepetlebie deurai Hauran nah Damascus kakgade, Jordan reuki Gilead nah Israel deu kakga kecang. Nang hangdeu rai gade naimiak kepetle duidi ga kecang mdetlu. Aide naimiak kepetle hangdeu rai zie. 19 Tingpile deurai Tamar gade Meribah Kadesh duiring kecang, nah Egypt rai gade Jaaidi kedi kecang. Aide tingpile deurai zie 20 Naimiak kenlütlebie deurai Jaaidi kedi gade Lebo Hamath mcwa kebam ga kecang. Aide naimiak kenlütlebie deurai zie.

21 Aide nzwa nang hangdeu nzi zie nnui, Israel leuhmedung ziemne. 22 Cine nnui nah sangmedung nnui kakga kebamme, nnui kak gade pe name mna kelume nah nnuide ngngwa kelame, Israel leuhmedung nzwakap cu medung de si eh nnui gum lai eh kebam de nzi zie. Israel leuhme de ngngwa hangdeu penui qwa dacak eh nzi zie. 23 Sangme au pa ngngwa lungh kebam leuh de ngngwa peqwa ngau luzie. Nang pecu peu gumlu kera peu bi maisia, aide RAMPAUBE Tinggwang ne ndugai."