1 RAMPAUBE sam ada gwang eh ranggai, 2 "Tsaidikela, mina nabo, RAMPAUBE Tinggwang ne Israelme dage aide ranggai."

Penli be! Hangdeu tudung pelane ga penli be gwang bam dida.✝

3 Cu penli au n da gwang bam dida, Kedanemene Ih a rata n da langgai, nah Ih nang tei keladung ria gade ntu tiak zie;

pecai Ih ngu kemneu tahdung de n reu ga teu gwang gai zie.

4 Kedanemene Ih ncu ngau nggia lak, nah Ih ncu bang beu lak. Meliene, nang tei keladung de Ih n da teu gwang gai beu zie,

nah n kemneu tahdung n da bam zie, iciu eh Ih RAMPAUBE lie kecu nang ci luzie.

5 RAMPAUBE Tinggwang aide rangla:

Kengkap! Kengkap tsamceu cu ge! Ainie, cide au gwangla dida.

6 Penli au gwang bi kera ge dida. Penli au ncu renia kera nrak cuh dida. Ainie, cide au gwangla dida!

7 Hangdeu ga lungh kebamme nnuide ngkap kera nnui da gwang lada.

Peting gwang lada; kengkap tingbazie nna dida, nah lamlwatudung ga suiyi bam si lakta.

8 Matie mene cu Ih a rata nnui dage ruigai zie nah a lunghop le nnuide tei pui luzie

nnui tei keladung ria gade Ih nnui tutiak kecu dau nah nnui zai kemneudung pelane nnui reu gage teu gwang.

9 Kedanemene Ih au mide ngaunggia eh pielak, nah Ih ncu bang beu lak. Nang tei kegai de nzwa, Ih de n dage tei gai zie;

nah nnui zai kemneudung nnui kakga bam zie cine Ih RAMPAUBE lie kecu nnui ci luzie, nnuide saja kepeube de.

10 Pielo, tingbazie! Pielo, kekap ting gwangla dida!

Matei kengkappe tet pet dida! Kekwa tie padida, ngang kecu pepa bwapet luda!

11 Zaisiet lungh cuh kenlien tie ge dida,

penui migede, nah penui gu magede, penui mabam gede, nah penui gu kendu gede bam tie lak!

12 Peting be gwangla dida; petingba zie gwang nna dida. Peu keluime de pesuiyi diso,

mede kezwame de hap diso, kedanemene a rata au mina leune da bam kedine.

13 Heli keteime ge pa tei ngngah kedi de ngau dailu kera tei ge lungh bam lakta, Kedanemene penai lungh kebam tane kezuabe pa zwa kedi deu ga caili gwang lak,

kedanemene mina leune ziemne marengei de teu nreu dailak;

nah kedanemene penui kemaudung ziemne, penui de migede tei ngkieng beu lak!

14 Penui telui kwagai nah ma pelane mteilu, dede migede hereu ga tetpet kera ga;

kedanemene a rata au mina leune da bam kedine.

15 Namdi gwale hereu tei bam, nah pelung ga rapia nah herakum bam.

Namdi kirie gwale kelame de kingtie le teitset dizie. Nah namdi ga kebamme de herakum nah rapiane ngkapdi zie.

16 Dede kang ge ring kelumedung penui kakgade nria luzie, nah penui lamlwatudung ga mie zie.

Cabakdung ga tamhaudung nzwa, penui pelane nra zie, mige ge de pemau ziemne.

17 Mileune ba kengkieng ga dizie nah mileune nkokpui dui nzwa nnei dizie,

18 nah penui rosopai bah zie, nah kengi penui da bam dizie;

nah mileune da kengngam bam dizie nah penui peudung pelane taikwak dizie.

19 Penui lampuikidung gage penui rangkanggeudung kelien gai zie nah penui kecak mlai kedi nzwa zie. Penui gu rangkanggeu nah penui gu kecak

dede RAMPAUBE pe rata süt kedi benai penuide keligai lak dizie. Penui teilungdung au keligai lak,

nah penui nzeu kebamde tyei mnunglu gailak, kedanemene penui kemau dene puikam ge kedine.

20 Piage penui au penui gu heteei hetadung ziemne hegie eh gwang, dede penui au cidungde keu kemneu miedung, nah penui ma kenkaudung teilu luda. Ciziemne, Ih aidungde tei keli pwa penui ziemne mci kemak ge teidi.

21 Pecai Ih ne ma cidungde süt teu kedi ge nzwa sangme ba gage peu dizie nah kideu gu kesiame dage süt teu kedi ge nzwa,

nah penui cidungde tei hera dizie.

22 Pecai Ih penui dade a zu pung nreu dizie penui Ih whung kela bam de tei hera kedi dau;

keregamedung cika lüt zie nah cide tei hera dizie.

23 Heria ge teilu, kedanemene hangdeu be au hejai gu tutiak ketei le pui dida,

nah namdi be au zaisiet le pui.

24 Cine Ih heleuhdung siatube teu gwang beu zie, nah penui kidung penui ne gum luzie,

nah Ih kengkiengme hegiekela de penli teu gwang beu zie, Kedanemene penui kemci bamdung tei hera kedine!

25 Kengngi gwang zie! Penui kezuyi pei zie, dede kette ngau gailak.

26 Kenkap reu kenkap gwang zie, nah samkiee reu samkiee petdi zie.

Pecai penui caihakecime dade marengei ge pei dizie, dede hezaibe cingkume dade ga di zie nah hecing hangkiame dade puisaube gah dizie.

27 Hegwangpei hap zie nah hegwangpei na keregui kega nia teu zie,

cidau hangdeu cika mina badung ngngi eh mbeu dizie. Penui tei keladung rehi (ria) gade Ih penui de ma aide teigai zie!

Penui Ih RAMPAUBE lie kecu cilu kemaktane Ih penuide penui n samdung gade penui tutiak zie.