1 Tinggwang a dage rang eh, "Mina nabo, nang peei kelube tyeilu. Kehezui laisiu aide tyeilu, delwe Israelme ki ga maranglo."✝ 2 Cine Ih a mui ngnga gai nah pa acu kehezui laisiu de tyei kera peu. 3 Pa adage rang eh, "Mina Nabo, nza pok tyeilu nah aide kehezui laisiu le nza tei pui lu Ih ncu ha kebeu de le!" Cine Ih cide tyeilu, nah cide a mui ga heliadui nzwa kum.

4 Cipaucai pa adage rangdi, "Mina Nabo, Israelme ki ga mie delwe a samdung penui dage rang beulo. 5 Kedanemene Ih ncu sangme let ketsam ge rang kelame mede helet ci kepame dage langgai ma dede Israelme dage, 6 mina kekiee ge helet ketsam ge rang kelame mede helet ci kepame dage ma, penui samdung nnui cigai kelak be. Magade Ih penui dage ncu langgai cai, penui n sam kingnei bi zie. 7 Dede Israelme au n sam kingnei kera lungning pung lak, kedanemene penui a sam kingnei kera lungning pung melu. Cine Israelme pelane penui mlung tak. 8 Ainie! Ih n zu penui zudung nzwa teitak dida nah n mlung penui mlung nzwa teitak dida. 9 Ih n mlung tangtsu ketak ge nzwa tei dida, tangtsukang swa tak eh! Penuide hing so mede penui zudung ziemne nnui lung ceu diso, kedanemene penui au renia kelame ge lugu." 10 Cipaucai Tinggwang a dage rang eh, "Mina Nabo, Ih n dage sam rang kebeu leune, n mlung gage keu lu nah n kwen le siulu! 11 Cipaucai hebaangme da mie cu, n minadung da, delwe penui dage ranglo. Penui dage rang beulo, ‘Aide RAMPAUBE Tinggwang ne rang au lie eh,’ penui kingnei liede mede kingnei meliede."

12 Cipaucai Tinggwang Rabe ne acu teu cuh beu, nah Ih a cai gade nnui kedi keteu kwa ge siu: "Peu tinggim ga RAMPAUBE kendu de twa lulo!" 13 Cide ring kela kaune hesiu kwadung penui hangge ge de tung kegai dau, nah penui da kela pita kwadung, nnui nnuihdi keteu kwa nzwa. 14 Tinggwang Rabe acu teu ncuh lu delwe acu ngngwa tetdi, nah Ih a rabe rata ga kekaa pui eh tetdi, kedanemene RAMPAUBE ba ngkingsüt eh acu nim kebam ne! 15 Cine Ih Tel Aviv ga Kebar Kereuki tai ga lungh kebam hebaangme da mie, delwe Ih penui kakga lang henane bamdi, a swa gah süt eh.

16 Cipaucai lang henane benai RAMPAUBE sam ada gwang eh, ranggai, 17 "Mina nabo, Ih ncu Israelme kelakdung ziemne kekwabe teibeu dida, cine Ih rang kegai samdung de kingneilu, nah penuide rang mriak gai beulo.✝ 18 Ih kesiame ge de, ‘Nang tsai bi zie’ de eh ranggai beu dede nang pecu rang mriak beu tadi mede pa ringlu kerane pe bata kesia ketei gade pecu rang mriak beu mecai, kesiame de pe maudung ziemne tsai zie, dede n dade pe jai mi de luu zie. 19 Dede nang kemaudung gade rang mriak beu cai, nah pa pe kemaudung gade mede kemau tadung gade nreu lu mecai, iciucai pa pe mau ziemne tsai zie, dede nang nkatei n teilung keli luzie. 20 Magade makesangme ge pe kesangsang gade nreu tetdi eh kemau bata tei dicai, nah Ih pecu kengngi gage kai dicai, pa tsai dizie. Kedanemene nang pecu rang mriak beu kemak ma, pa pe kemau gade tsai dizie, nah Ih pa heta keyi tei kegaidung de nsung lak, dede pezai Ih m ba gade luzie. 21 Dede nang makesangme gede kemau ketei gade tei mtak lü pa kemau tei sita dicai, pa lungh lu bi zie kedanemene pecu rang mriak beu dida lu; nah nang nkatei n teilungh de kelilu zie." 22 Cine RAMPAUBE ba cika ada la, nah pa a dage rang eh, "Cuhlu! Langkam ga mie cu, nah Ih cika de ncu resiu zie!" 23 Cine Ih cuhlwe langkam ga mie, nah cika de Ih RAMPAUBE kendu de ngau, Kebar Kereuki tai gade kengau de kesiak ge; cine Ih hangdeu ga a zu keumie reca. 24 Rabe a da gwang delwe peu acu cuh saplu; nah pa acu resiu, nah a dage ranggai, "Mie delwe nkatei n ki gage ncu ngkui namlu, 25 cu ziemne, mina nabo, penui heria nreu gage kai zie delwe ncu kaangdi zie ciu eh nang penui kak ga mpet gailak dizie. 26 Ih n mleu de peu n mui reu gage kaupung bam dizie, iciu eh nang marang gailak dizie, nah nang penuide rang ledeu gailak dizie, kedanemene penui au renia kelame ge lugu. 27 Dede Ih ncu resiu kecudau, Ih n mui ngkei gai zie ciu eh nang penui dage rang zie, ‘RAMPAUBE Tinggwang ainzwa eh ranggai.’ Keheibe de siu keneume siu luzie; dede keheibe de kingnei neukemakme kingnei lak, kedanemene penui au renia kelame ge lugu!