1 RAMPAUBE sam a da gwang dai eh, ranggai, 2 Mina nabo, nang au mina kesiame ki kakga lungh bam, Penui miak bam dede penui magede ngau ma; nah penui siu kera penui kün bam dede kingnei ma, kedanemene penui au samzai tei keraune.* 3 Cine cu, mina nabo, langgi kedidau ziemne n niadung mteilu, nah tingkeba ne penui kengau gage tet mpet kera mdeu lu, kedanemene penui kengau gade n bam gade keda heni gage ncu langgi dizie delu. Peu penuide ngau ndeu lu, penui suizwa kemak kiga bam cune. 4 Tingkeba ne nang penui miakngau gade n niadung keumpet luzie ncu langgi kegai dau; langgi di kerame keheibe de tinghegi penui miak ngau gade lampui ga tet mpet lu. 5 Penui miakngau gade tangdeu raklu, delwe cikade mpetlu. 6 Penui miakngau gade, ngu nia n hekeutu reu ga ge kailu, nah penuide kemui gade ngngwa mpet lu. N zu gumdi, kedanemene nang hangdeube ngau melu kerane, iciu eh Ih ncu tei pwa Israelme da saulia kenzwa ge teigai delu."

7 Cine Ih aide teilu, RAMPAUBE a dage tei lulo samkai kebeu nzwa, keda deu ga mie kerane ting keba dau agu niadung keu mpet lu, nah tinghegi tangdeu gage a bale pekoiki kui lu. Agu niadung keu mpet kemui gage kailu, nah penui miakngau gade cidungde pwa ncu a hekeutu gage kailu. 8 Ge pecai benai tingcang RAMPAUBE sam ada gwang eh, ranggai, 9 "Mina nabo, samzai tei kerau, Israelmedung, ‘Nang daipai tei au no, de kecu heteu dema?’ 10 Penui dage rangbeu lu, ‘RAMPAUBE Tinggwang ainzwa ranggai: Caihasam aide Jerusalem ga hegwang tei kebam nah cika kebam Israelme pelane ziemne.’ 11 Ainzwa ranglu, ‘Ih nnui ziemne marengei ge.’ Ih tei kegai nzwa, cine penui dage cide teigai zie; penui de langgi dizie nah mibaang tei dida. 12 Penui reu kedi kebambe ting kemuidau pegu niadung pe hekeutu ga pung zie, nah tangdeu gade mpet zie. Penui tangdeu kuilu eh penui gu niadung keumpet zie. Pa pe zu gum dizie, iciu eh pa miak le hangdeu de ngau melu kerane. 13 Ih a lang sam mpet pereu gage kai zie nah a tak gage pecu keu luzie; delwe Ih pecu ngngwa Babylon ga gwang luzie, Chaldeanme deu ga, dede pa cide ngau lak. Pa cikade tsai dizie. 14 Ih pekung leune pecu twagwa kebamme pelane pecu kenghame nah reugwame peciakne de de teizang dizie, nah Ih kingtie penui cai gage langgai zie. 15 Pecai Ih penuide heleuhdung kakga ge teizang kegai dau nah hangdeu leune gage penuide lang kegaidau, penui Ih RAMPAUBE lie kecu ci luzie. 16 Dede Ih penui kakgade mina kecam nage de kingtie, herakum, nah mateei gade bang beu zie, iciu eh Ih penuide ngngwa mie kegai deu gade penui kemneutadung de rau nzeulu kerane, iciu eh penui Ih RAMPAUBE lie kecu ci luzie."

17 RAMPAUBE sam a da gwang eh ranggai, 18 "Mina nabo, mbeu eh nang tangku tyei lu, nah nang dui sak eh mbeu nah mlung panglu, 19 Pecai hangdeu be minadung dage rang beulo, ‘RAMPAUBE Tinggwang Jerusalem ga kelunghme ziemne aide rangla, nah Israelme ziemne, "Penui penui tangku mbeu eh tyei zie nah mbeu eh penui dui sak zie, kedanemene hangdeu cika lungh kebamme zaisiet de ziemne hangdeu be cide puiting kebam de tei mta dizie kecune. 20 Cine namdidung ga lungh kebamdung de ngkap dizie, nah hangdeube kemta ge dizie; iciu eh nnui Ih RAMPAUBE lie kecu ci luzie."’"

21 RAMPAUBE sam a da gwang dai eh, ranggai, 22 "Mina nabo, (macisam) samregwa Israelme deu ga rang kela, ‘Tingbaziedung tei mtie dida, dede marengei leune teicang luma,’ aide daino? 23 Ciziemne, penui dage rang beulo, ‘RAMPAUBE Tinggwang aide rangla: Ih macisam aide penli tei dizie, nah Israelme cide teutie si gailak.’ Penui dage rangbeu lulo, ‘Mangdak leune tei canglu kera petingba gwang nna bam dida. 24 Kedanemene Israelme kakga magede kenret marengei mede siuneu kela caihasamdung Israelme kakga bam si lakta. 25 Ih RAMPAUBE! Ih rangla, nah Ih rang kegai samdung de tei la. Ma cide teimri si di lakta. Kedanemene nnui renia kelame nnui tingdau gage Ih aipau sam de ranggai zie, nah Ih cide tei gai zie!, aide RAMPAUBE Tinggwang ne ndugai.’"

26 RAMPAUBE sam a da gwang dai eh ranggai, 27 "Mina nabo! Ainie, Israelmedung rangdi, ‘Marengei pa kengau de au cu gade tingbaziedung kekiee ge ziemne, nah pa aipaucai peting ketiee ge gu caihasam rangla.’ 28 Cine penui dage rang beulo, ‘RAMPAUBE Tinggwang ainzwa rangla! A samdung magede teimri si dilak, dede sam Ih rang kedi be tei zie, aide RAMPAUBE Tinggwang ne ndugai.’"