1 Pecai RAMPAUBE sam a da gwang eh ranggai, 2 "Mina nabo, Israel maa pie kelame dage caihasam rang mmaulu. Caihasam rang eh penui dage rangbeulu, ‘Kwa kelame dage RAMPAUBE aide rangla: Ainie penui katei penuide kwa kelame da keherei gwang zieda. Kekwabe pe meurün de kwa kerabe meni? 3 Nnui pecadung tyei la nah mamai le nnuide cum lula. Hekaune kakgade pelui keyibe nnui gityei lula. Nnui meurünhaudung maa pie rengei lama.✝ 4 Mateei pung kebamdung de nnui pie eh lamlui beuma, nah sia kebamdung de pie eh telei hemi beuma. Hezam pung kebamdung de nnui pie eh dum gai beuma nah nnui zang kedidung mede gah kedidung de peei hekwa ma. Ciu kecube mene, kengking nah zaisiet teu eh nnui penuide kezeula. 5 Cine kekwabe kegah ziemne penui zangradi, nah penui kideu ga renaam kaune taktyeipok ge teidi, penui zangra kedi cai. 6 A kauhaudung lamlwatudung nah kideutudung leune gage pak zangra gai di, nah cidung kideu peureu ga pelam riep ga gwang di. Iciuliede migede cidungde de peei ma.✝

7 Ciziemne, kekwamedung, RAMPAUBE kerang de kingnei lulo: 8 Ih ring kebamtane, aide RAMPAUBE Tinggwang ne ndugai, kedanemene a kauhaudung de sütteu kap kedine nah kideudung ga renaam kaune taktyeipok tei kedine, kedanemene penuide kekwabe ge de kegah ziemne nah kekwame migede penuide pie rengei ma, dede kekwamedung penui katei penuide gumlu nah a kauhaudung de au pie rengei ma. 9 Cine, kekwamedung, RAMPAUBE sam kingnei lulo: 10 RAMPAUBE aide rangla: Ainie! Ih kekwame de mmau la, nah Ih penui ba gade gah kedidung de luu dai zie. Ciu eh Ih penuide kwa kebam gade keu mpet dizie; kekwamedung penui katei penuide de pie rengei gai lak dizie kedanemene Ih penui dade a kauhaudung keuteu dizie delu, ciu eh a kauhaudung penui ziemne taktyeipok tadi zie.

11 RAMPAUBE ainzwa eh rang: Ainie! Ih a kauhaudung de peei zie nah penuide hekwa luzie,✝ 12 kekwabe pe kauhau zang kedi dau peei hekwalu kela nzwa. Cinzwa eh Ih a kauhau de hekwa luzie, nah Ih penuide teizang kegai heni leune gade keli luzie hemwa le pui nah muiting eh kebam tingba benai. 13 Cidau Ih minadung kakgade penuide keuntsam mpet luzie; hangdeu aikade penuide ngngwa mpetlu eh penui deu gage ngngwa gai beuzie. Ih penuide Israelme deu lamlwatu cehei keyige, reunadung taiga, nah kideu peureu leune ga peu lungh zie. 14 Ih penuide cehei keyi gage ngngwa gai zie; Israel deu lamlwatu kehudung de penui taktyei bam ge dizie. Cika heni keyi ga penui mtak eh tyei zie, cehei kekiee ge kebam ga, nah penui Israel lamlwatudung gade tyei zie. 15 Ih ne a kauhaudung de kwa zie, nah Ih ne penuide peu mtak ziune luzie, aide RAMPAUBE Tinggwang ne ndugai, ✝ 16 Ih gah kedi nah gi kedidung de peei hekwa luzie. Ih meurün rezam kedidung de telei luzie nah mateei pung keladung de tei hemi beuzie dede pelui keyi be nah kengkiengbe de Ih ngkap dizie. Ih kemzuibe teu eh kekwabe tei zie.

17 Cine cu au, nnui a kauhaudung, RAMPAUBE ainzwa ranggai, ainie, Ih meurün kena kakga nah hemeuseu kena kakga penui tutiakbe zie.✝ 18 Cehei keyi tyei kelu rünne le mnunglu meni, cehei tyei kebangbe de nnui pi le dau msia di kecu; nah dui kemci sak kelu de le mnunglu meni, nnui kereuki dui de tei hera di kecu? 19 Nnui pi le dau msia kedi de a meuründung de peu tyei zie ni, nah nnui pi le dau hera kedi de sak zieni? 20 Cine RAMPAUBE ainzwa eh penui dage ranggai: Ainie! Ih meurün pelui keyibe nah kesiabe kakga hetu tiak zie, 21 kedanemene nnui penuide nnui pum nah nnui mbie le nia gi nah penui kideube gade tei zangra di kemaktane nnui kii le pwane kemnei be pelane de tei rezam. 22 Ih a kauhaudung de gum luzie nah penuide peu tui teu dai dilak, nah Ih meuründung kakga het tiak zie! 23 Ih penui reuga kekwabe ge kaigai zie, a kilabe David. Pa penuide kwa luzie, pa penui pok tei zie, nah pa penuide kekwabe tei luzie.✝ 24 Kedanemene Ih, RAMPAUBE, penui Tinggwang zie, nah a kilabe David penui kakga kedibe tei luzie, Ih, RAMPAUBE, aide ndugai.

25 Pecai Ih penui dage lungciep samkak tei zie nah hangdeu gade kesia renaam kaunedung de gwa dizie, iciu eh penui hetaideu nah hegungdung ga ziune eh lunghlu kerane. 26 Ih penuide nah a kideutu twagwa eh kebamdung de de samlam si beuzie, kedanemene Ih peting siak dau tingrui langgai beuzie kecune. Aide samlam tingrui zie. 27 Pecai luh ga tsingbangdung penui tsi buizie, nah kideube lungh yi luzie. A meurün pe deu ga kwak eh lungh luzie; iciulude penui Ih RAMPAUBE lie kecu ci luzie, Ih penuide kangteu kela ria de tei cak kedi dau, nah penuide hebaang tei kelame dade penuide kelibeu kecu dau. 28 Heleuhdung nah renaam kaunedung penuide tuityei dai kelakne penui keherei si lakta. Penui kwak eh lungh dizie, nah migede penuide tei ngngi silak.✝ 29 Kedanemene Ih penuide ma lungh keyi deu peu zie; iciu eh hangdeu cika herakum ziemne penui keherei dilak, nah heleuh kedadung penuide teu henui tei dilak.✝ 30 Pecai, penui Ih, RAMPAUBE, penui Tinggwang penuide ngngwa la lie kecu cilu zie. Penui a mina, Israelme, aide RAMPAUBE Tinggwang ne ndugai. 31 Kedanemene nnui au a meurünna, a cehei deu gu kauhau, nah a mina, nah Ih nnui Tinggwang, aide RAMPAUBE Tinggwang ne ndugai.’"