1 Pecai minabe acu kerecaki heni kemci ga ngngwa gwang nah kikam tsiadung mdet, cide lam nana gade pedi cubit herok*. 2 Kenlüt kikam de pedi cubit kerei; lule ailam tangdeu petie cubit mengei. Pecai minabe kemci ni petie pedi mdet gai, petie cubit riakdai* nah pedi cubit ngkai*. 3 Pecai minabe helungtube kemci bam ga lüt eh kikam tsiadung de mdet, cide cubit kena, nah kikam de pe di cubit herok. Lule ailam kebam tangdeu de pe di cubit hena. 4 Pecai pa kibung petie mdet, cide cubit ngkai. Pedi, cide kemci kibung dwa lebie cubit ngkai. Pecai pa a dage ranggai, "Aide heni mcitube."

5 Pecai pa ki cide tangdeu mdet, cide cubit herok ge siu. Ki twagwa kebam kibungdung de pedi cubit mdai kwa. 6 Kibung aidungde set cum ga bam, kibung ge kibung kedage reu ga bam, set ge ga kibung camrei ge bam. Ki tangdeu ga tsing le kai twagwa lu, pe mbie ga kebam kibungdung de peu sap bamlu kerane, kedanemene ki tangdeu cika pe tsiadung bam swa kemakne. 7 Pembie kibungdung siu reureu eh pereu lebie hang, kedanemene ki cide hu reureu eh hang; ki nreu lebie hang reu eh kibungdung mza reureu di, nah takswa ge peset sum be set gade, hutu ga kecang hangcang. 8 Pecai Ih ki twagwa kecu ma teu ncuh pwa kebam ngau, pembie kibungdung bangdwa kelu; cide, cubit herok ge mdetlu. 9 Pembie kibungdung gu tangdeu hegwale pedi au cubit mengei. Kibung aidungde hegwale sung kemak heni kemci ge bam. 10 Sung kemak heni taiga cingkume hegwa kibungdung bam; aide kemci ni de twagwa pung kebam pedi cubit ngkai. 11 Keda sung kemak heni gade pembie kibungdung ga lüt kera kimuidung bam, kimui ge tingpeule bam, nah kedage tingpile bam. Sung kemak heni aide pelane pedi cubit mengei twagwabam.

12 Kigu naimiak kenlüt lebie ki de nreu gai pwa kebam de pedi cubit riakhena. Pe tangdeudung cubit mengei ge siu, nah petie au cubit riakhekui.

13 Pecai minabe kemci ni de mdet gai, petie cubit hai. Ki di pekatei tsamceu kebam, pe tangdeudung, nah kigu de petie cubit hai mdetlu. 14 Kemci ni dwa ga kebam kigu pe dwa de cubit hai.

15 Pecai minabe kemci ni caile kebam ki di de petie mdet, tingnaimiak kenlütle kebam, nah lule ailam kebam henidung, cubit hai ge. Kemci ni nah kenlüt kimuiki, 16 helungle tangdeudung nah hebakidung, hebaki kenrumdung de si eh, nah set kecum ga kebam henidung, aidung pelane tsing le teilu. 17 Kemci ni helungle kebam lampui nreule nah tangdeudung ga mdet kelu miedung ge bam. 18 Cide cherubim nah palm bangdung le hezu tei pwa bam; cherub kakga palm bangge ge bam eh, nah cherub ge pe zu kena: 19 tu ge lam mina zu palm bang de pie, nah keda lam hingho zu palm bang de pie. Ki pelane ga ainzwa eh tei twagwa pwa bam. 20 Hangdeu gade kenlüt kikam peu ga kecang, cherubim nah palm bangdung ki hegwale tangdeu ga tei pwa bam.

21 Kemci ni gu herieki tsiadung au n sam. Cidungde rehi au 22 tsing kereca ni kemci ni dwaga kebam rehi nzwa da, cide pehu cubit kecum nah petie kenana lam cubit kena. Pe kimiak tsiadung, pesingkam, nah pembiedung tsing le teilu. Pecai minabe acu ranggai, "Taktyeibam aide RAMPAUBE dwaga sap bamla." 23 Kemci ni nah mcitube ni ziemne kikam kena ge bam. 24 Kikam ai kena de makwak kena le tei pwa bam, kikam ge ga makwak kena nah kikam keda ga makwak kena. 25 Tangdeudung ga hezu teigai pwa kebam nzwa kemci ni gu kikamdung gade cherubim nah palm bangdung mie teigai pwa bam, nah kenlüt kimuiki reu tsing le tei pwa bam. 26 Kimuiki lule ailam ga kenrum hebakidung nah palm bangdung bam. Aidungde au pembie kibungdung, nah aidungde peureu ga n zu nhung kebam kigudung bam.